Milyonmilyon ang Moadto—Moadto Ka Ba?
KAPIG walo ka milyong tawo sa tibuok kalibotan ang motambong sa tinuig nga distritong mga kombensiyon sa mga Saksi ni Jehova kada tuig. Sa Disyembre 1999 ug Enero 2000, 52 ka tagtulo-ka-adlawng “Matagnaong Pulong sa Diyos” Distritong mga Kombensiyon ang gieskedyul sa Pilipinas. Lagmit, usa himoon duol sa dapit nga imong gipuy-an. Gidasig ka namo sa pagkaatua didto sa dihang ang programa mosugod uban sa musika sa alas 8:30 s.b. sa Biyernes.
Ang programa sa buntag maglakip sa usa ka pakigpulong sa pag-abiabi ingon man sa paninugdang pakigpulong nga “Tagda ang Matagnaong Pulong sa Diyos.” Sa hapon ang simposyum nga “Kahimut-i ang Pagbasa sa Pulong sa Diyos” mohatag ug praktikal nga mga sugyot bahin sa kon unsaon paghimo sa pagbasa sa Bibliya nga mapuslanon ug makalipay. Ang kataposang diskurso sa maong adlaw, “Ang mga Makig-away Batok sa Diyos Dili Makadaog,” magsubli sa pakig-away nga gibugno sa modernong kapanahonan batok sa mga magmamantala sa Gingharian sa Diyos.
Ang programa sa buntag sa Sabado maglakip sa usa ka paghisgot sa bawtismo, ug ang higayon nga mabawtismohan itagana alang niadtong kuwalipikado. Sa hapon ang makapadasig nga mga taho ipahayag mahitungod sa kahibulongang sanong sa katawhan ngadto sa kamatuoran sa Bibliya diha sa pipila ka nasod sa Latin Amerika, Aprika, ug Silangang Uropa, ingon man sa dako kaayong Asianhong nasod sa Kazakhstan. Ang bahin nag-ulohang “‘Tilinguhaong mga Butang’ Nagapuno sa Balay ni Jehova.” Ang programa sa Sabado matapos uban sa duha ka diskurso, “Matagnaong mga Kasulatan Makapaigmat Kanato nga Magmabinantayon” ug “Ang Matagnaong Pulong sa Panahon sa Kataposan.” Ang kataposan magpunting sa basahon ni Daniel sa Bibliya ug maghatag ug mga katarongan sa pagpamati sa tagna niini.
Sa buntag sa Dominggo ang tulog-bahin, usa-ka-oras nga simposyum nga nag-ulohang “Matagnaong mga Pulong Alang sa Tinudlong Panahon” maghisgot sa tagna ni Habacuc. Imong makita kon unsa ka makapadasig kining mubong basahon sa Bibliya alang sa mga Kristohanon karong adlawa. Human niana ang usa ka full-costume nga drama, nga nagpasundayag sa asoy sa Bibliya bahin kang Jacob ug Esau, magpalutaw sa temang “Pagpabili sa Atong Espirituwal nga Panulondon.” Ang programa sa buntag sa Dominggo matapos uban sa makapalihok nga pakigpulong nga “Unsay Kahulogan sa Atong Bililhong Panulondon Alang Kanimo?” Dayon, sa hapon, makapahimulos ka sa pakigpulong publiko nga “Pagbag-o sa Tanang Butang—Sumala sa Gitagna.”
Pagplano karon sa pagtambong. Aron hisayran ang dapit sa asembliya nga labing duol sa inyong balay, kontaka ang labing duol nga Kingdom Hall of Jehovah’s Witnesses o pagsulat ngadto sa mga magpapatik niining magasina.