Ang Akong Iro Maoy Akong Tigpaminaw!
SINULAT SA KORESPONSAL SA PAGMATA! SA BRITANYA
“AMBOT lang kon unsay akong himoon kon wala ang akong gamayng iro!” si Dorothy miingon, nga mahigugmaong naglantaw sa bata pa nga puti-ug-kapehon nga mestisong Jack Russel terrier nga kontentong naghigda sa ilalom sa iyang lingkoranan. “Akong nabatonan si Twinkie sulod pa lamang sa pipila ka bulan, apan napauswag na niya ang kalidad sa akong kinabuhi!”
Mitan-aw sa duol, akong nakita nga si Twinkie nagsul-ob ug hugot nga dalag nga dyaket nga niana nasulat diha sa klarong itom nga mga letra ang “TIGPAMINAWNG IRO ALANG SA BUNGOL.” ‘Pagkatalagsaon nga mananap!’ nahinumdom ako nga naghunahuna. ‘Unsay mahimo niini?’
Sulagma lang ang among paghimamatay taliwala sa 44,000 ka tawo nga nagtambong sa “Iya sa Diyos nga Dalan sa Kinabuhi” Internasyonal nga Kombensiyon sa mga Saksi ni Jehova sa miaging Hulyo sa London, Inglaterra. Pinaagi sa paglingkod duol sa trompa, si Dorothy nakadungog sa programa, busa ngano mang magkinahanglan siya ug usa ka tigpaminaw nga iro? Samtang naglingkod kami nga nag-estoryahanay panahon sa pahulay sa tingpaniudto, gisuginlan ako ni Dorothy sa iyang estorya.
Ang Papel ni Twinkie
Grabe ang pagkabungol ni Dorothy ingong resulta sa pag-atake sa rheumatic fever sa edad nga tulo ka tuig. Sukad sa pagkamatay sa iyang bana 23 ka tuig kanhi, siya nagkinabuhi nga inusara, apan, sumala sa pagsaysay ni Dorothy, siya nagkinahanglan ug labaw pa kay sa pakig-uban samtang siya nagkatigulang. “Ang mga tawong bungol nga sama nakog edad mobatig dakong pagkawalay-kasegurohan,” siya miingon. “Ako 74 anyos ug nagpuyo sa usa ka apartment nga dunay tigbantay, apan kon duawon ako sa tigbantay, dili gayod nako madungog ang akong timbre sa pultahan. Kay naghunahuna nga tingali nasakit ako, usahay mosulod siya nga wala akoy kalibotan; ug kana nagpalisang kanako. Apan karon si Twinkie makadungog sa timbre, ug moduol siya ug modagpi sa akong tiil ug tultolan ako ngadto sa atubangang pultahan. Sa susama, sa dihang madungog ni Twinkie ang tunog sa orasan sa akong oven, modagan siya nako, ug ako siyang sundon. Kon mahitabo nga motingog ang alarma sa sunog tungod sa aso o kalayo, si Twinkie gibansay sa pagkuha sa akong pagtagad ug dayon mohigda aron ipahibalo ang posibleng kapeligrohan. Sa matag higayon nga iya akong tabangan, ako siyang gantihan ug usa ka espesyal nga pagkaon, usa ka lamiang pirasong kalan-on.”
Pagbansay sa Katakos
Naikag ako. “Sa unsang paagi nakuha mo ang imong iro, ug kinsay nagbansay niini?” ako nangutana. Ilhanan kini kang Dorothy aron ako suginlan bahin sa mga Irong Tigpaminaw Alang sa mga Tawong Bungol, usa ka buhat sa kaluoy kansang katuyoan mao ang pagtabang sa mga tawong bungol sa Britanya nga makabatog mas dakong kagawasan ug sa ingon magpauswag sa kalidad sa ilang kinabuhi. Sukad sa 1982 kini nakataganag gatosan ka iro alang sa bungol nga mga indibiduwal sa Britanya. Sa dihang bug-os na nga nabansay, ang iro ibalhin ngadto sa bag-ong tag-iya niini pinaagig pagsagop, nga walay bayad.
Ang mga iro nga pilion kasagaran maoy mga saag, nga sagad kuhaon gikan sa mga sentro nga nag-atiman sa saag nga mga iro sa tibuok nasod, bisan tuod ang pipila maoy gidonar sa mga tigpasanay. Moabot ug 12 ka bulan ang pagbansay sa usa ka iro. Ang gasto sagad nga bayran sa usa ka esponsor, usa ba kaha ka kompaniya o grupo sa mga tawo kansang ginagmayng mga kontribusyon gitapo. Giingnan ako ni Dorothy nga ang usa ka klab sa ehersisyo sa pagpaniwang malulotong nag-esponsor kang Twinkie.
Sa dihang mapili na, ang kada usa nga posibleng mahimong irong tigpaminaw, nga lainlain ug edad gikan sa pito ka semana ngadto sa tulo ka tuig, bansayon sa pagsanong sa pipila ka tunog. Apan, sa sinugdanan kini iasayn sa usa ka tigpasinati, usa ka boluntaryo nga magdala sa iro ngadto sa iyang balay sulod sa duha hangtod walo ka bulan, depende sa edad ug kasinatian sa iro. Ang pagpasinati maglakip tingali sa paninugdang pagbansay sa iro nga dili mangihi sa sulod sa balay o modaot sa muwebles, apan ang pangunang tumong mao ang pagpasinati sa mananap sa mga dapit ug mga sakyanan sa publiko ug paghatag niini ug nagkadaiyang matang sa kasinatian uban sa mga tawo sa tanang edad, lakip sa mga bata ug mga masuso. Ang tumong mao ang pagbansay sa iro sa dalawatong panggawi diha sa bisan unsang balay nga kini tingali sa ngadtongadto itudlo.
Dugang pa, akong nasayran nga ang ubang mga organisasyon mogamit ug mga iro sa pagtabang niadtong adunay linaing mga panginahanglan. Gawas nga gibansay nga mosunod sa mga sugo, kining mga iroa gipaanad sa espesipikong mga talan-awon ug mga baho. Usa ka retriever nga nag-atiman sa usa ka babayeng nag-wheelchair ang gitudloan sa pagkuha sa iyang telepono ug mga sulat ug sa pagtila sa mga selyo alang sa koreyo! Ang laing iro mosanong sa 120 ka sugo, bisan pagkuhag mga lata ug mga bulsita gikan mga estante sa supermarket. Ang baldadong tag-iya mogamit ug laser dot aron itudlo ang mga butang nga iyang napili, ug dad-on dayon kini sa iyang iro ngadto kaniya.
Usa ka Makalipayng Panag-uban
“Ang tanan ba nakasabot sa pagkamapuslanon ni Twinkie?” ako nangutana. “Wala pasudla sa usa ka tindero ang akong iro,” si Dorothy mitubag. “Sa akong hunahuna tungod kadto kay may mga pagkaon siyang gidispley, apan ang iyang tinamdan sa pagkatinuod usa ka eksepsiyon, tungod kay wala siya makasabot kon nganong akong gikinahanglan si Twinkie.”
Ako nang nasabtan karon ang pagkamapuslanon sa usa ka irong tigpaminaw diha sa panimalay, apan ako may usa pa ka pangutana. Unsay pulos ni Twinkie sa dihang si Dorothy malipayong nakig-uban sa daghan kaayong isigka-Kristohanon? “Maayo akong mobasa sa ngabil, ug ang akong hearing aid makatabang kanako nga makapakig-estorya,” si Dorothy miingon. “Inigkakita sa mga tawo sa dalag nga dyaket ni Twinkie, sila mahibalo gilayon nga bungol ako. Sila mosulti dayon nga direkta kanako, nga kasagarang mas klaro taman sa ilang maarangan. Sa ingon, dili na nako kinahanglang ipatin-aw ang akong diperensiya, ug kana naghimo sa kinabuhi nga mas sayon alang kanako.”
Ang mga sesyon sa kombensiyon hapit nang mosugod, ug si Twinkie nagkinahanglang ilakawlakaw sa dili pa magpahiluna alang sa maong hapon. Sa wala pa ako molakaw, miyuko ako sa paghapohap kaniya. Gibuka ni Twinkie ang iyang sigang mga mata ug dayon mitan-aw kang Dorothy ug gikitiw ang iyang ikog. Pagkabuotan, mapuslanon nga gamayng higala—ug bug-os ang ilang pagkasuod!
[Hulagway sa panid 20]
Dako kaayong tabang si Twinkie sa mga kombensiyon