Gikan sa Among mga Magbabasa
Kapintas Nganha sa mga Hayop Ako nagsulat aron sultihan kamo nga maayo kaayo ang inyong nahimong trabaho sa inyong artikulong “Ang Hunahuna sa Bibliya: Kapintas Nganha sa mga Hayop —Sayop ba Kini?” (Nobyembre 8, 1998) Sa akong hunahuna dalayegon nga inyong gipakita nga dili uyonan sa Diyos ang kapintas nganha sa mga hayop, ilabina niadtong nag-angkon ingon nga Kristohanon.
J. L. C., Tinipong Bansa
Mga Batan-ong Walay mga Ginikanan Dulot akong mapasalamaton sa artikulong “Mga Batan-on Nangutana . . . Nganong Kinahanglan Kong Magkinabuhi nga Wala ang Akong mga Ginikanan?” (Nobyembre 22, 1998) Ako 39 anyos na karon. Apan niadtong nagpangedaron akog 11, ang akong inahan namatay ug ang akong amahan mibiya sa balay. Hangtod karon wala pa gayod ako makahimo sa pagpasabot sa mga tawo sa timawang mga kinabuhi nga naagoman nako ug sa akong mga igsoon. Apan karon ako mibati nga ang uban nakasabot kanamo. Salamat.
K. Y., Hapon
Ang akong amahan namatay sa nag-edad pa akog siyam ka bulan, ug ang akong inahan, una pa ako nag-12 anyos. Makapahupay kaayo ang inyong artikulo ug nagpakita kon unsa gayoy gibati sa mga ilo. Pagkanindot ang pagkahibalo nga banhawon ni Jehova ang among mga minahal!
M. S. S., Brazil
Nag-edad na akog 40 anyos ug akong nabasa ug nasubli pagbasa ang artikulo. Nanglugmaw ang akong mga luha gikan sa sinugdan hangtod sa kataposan, tungod kay ako nailo sa nag-edad akog dos anyos. Hangtod karon, ako mohilak kon motan-aw ako sa hulagway ni Mama ug Papa. Salamat sa pagsulat sa maong mga artikulo!
J. C. V., Pransiya
Buhi ang akong mga ginikanan, apan ako kanunayng nagmagul-anon (bipolar) ug interesado sa bisan unsang artikulo nga maghisgot kon unsaon pagsagubang ang lisod nga mga panahon. Buot ko lang sultihan kamo nga gusto ko ang tinuod-kinabuhing mga kasinatian ug gipasukad-sa-Bibliyang tambag nga makaplagan diha sa “Mga Batan-on Nangutana . . .”
S. H., Canada
Paggama Ginamit ang Kahoy Ako nagabasa niining magasina sulod sa mga dekada, ug morag kanunayng nag-uswag ang kaundan, estilo sa pagsulat, ug pagpili sa ulohan sa materyal niini. Apan, gusto nakong komentohan ang artikulong “Pagsuhid sa Karaang Katahom sa Kahoy.” (Nobyembre 8, 1998) Palihog pasidan-i ang mga magbabasa nga madani tingali sa pagsulay niining trabahoa nga ang aswela maoy usa ka peligroso kaayong himan. Sa nagtubo ako niadtong 1920, gigamit pa gihapon kini ug niadto komon nga nailhang aswela sa tiil. Sumala sa gipakita sa inyong hulagway, ang kahoy gipugngan tali sa mga tiil, ug ang himan hait kaayo. Apan, gitawag usab kini nga kadaot sa tiil tungod sa daghang panahon nga ang mga tiggamit nagsamad sa ilang mga tiil. Akong gibati nga kini peligroso kaayong gamiton sa usa ka tawo nga wala mabansay.
W. G., Tinipong Bansa
Among gipabilhan kining pahinumdom nga magbantay.—ED.
Maalamong Rayna Ang inyong makaiikag nga artikulo bahin kang Catherine Parr (“Usa ka Maalamong Rayna nga Nakapildig Daotag Tuyong Obispo,” Nobyembre 8, 1998) nagpahinumdom kanako sa asoy sa Bibliya ni Rayna Ester. Pagkalalom nga kaalam ang gipakita niining mga bayhana! Bisag ako dili usa sa mga Saksi ni Jehova, wala gayod nako laktawi ang usa ka isyu sa Pagmata! Sagad akong mahibulong kon nganong dili pabilhan sa uban ang inyong literatura sama sa akong pagpabili niini.
M. D. S. F., Brazil
Akong nakaplagan ang makasaysayanhong asoy bahin kang Henry VIII ug sa iyang asawa nga si Catherine Parr nga makaiikag kaayo. Dawata ang akong mga pahalipay. Maayo kaayong pagkapanukiduki, laktod, ug tin-aw ang artikulo.
C. G., Italya
Ang paagi sa pag-asoy sa artikulo nakapabati kanamo nga morag kami nakig-uban sa tanang gutlo kang Rayna Catherine. Salamat sa pagpatik ug mga artikulo nga sama niini aron kaming nagpuyo niining bahina sa kalibotan mahibalo bahin sa mga kultura sa lagyong dapit.
L. G. ug L. G., Venezuela