Kon ang Ulan Dili Moabot

SINULAT SA KORESPONSAL SA PAGMATA! SA BRAZIL

SA MIAGING tuig, gidaot sa grabeng hulaw ang dakong bahin sa amihanan-sidlakan sa Brazil. Sumala pa sa magasing Veja, ginatos sa linibong nordestino, nga maoy pagtawag sa mga molupyo sa amihanan-sidlakang bahin sa nasod, nakakaplag sa ilang kaugalingon nga “nailalom sa gahom sa ulan nga dili moabot.” Gidaot sa hulaw ang mga humay, bean, ug mga pananom nga mais, nga misangpot sa kaylap nga kagutom—ang kinagrabehan sulod sa 15 ka tuig. Sa ubang mga lugar, bisag tubig ilimnon nihit kaayo.

Ang mga taga-Brazil nakaagi nag daghang hulaw. Sa 1877, sa kinagrabehang hulaw sa nasod, duolan sa 500,000 kanila nangamatay sa kagutom. Niadtong panahona ang emperador sa Brazil, si Dom Pedro II, nanumpa nga mangita siyag solusyon sa problema sa hulaw bisag ibaligya pa niya ang tanang mutya diha sa iyang korona aron kana masulbad! Kana nahitabo kapin sa 100 ka tuig kanhi; apan, karon, ang problema nagpabilin. Sa panahon sa miaging tuig nga hulaw, gibanabana nga kini makaapekto ug mga diyes milyones ka tawo nga nagpuyo sa 1,209 ka siyudad sa amihanan-sidlakan sa Brazil.

Kaubang mga Saksi Mahigugmaong Misanong

Sa dihang ang mga taho sa hulaw miabot sa sangang buhatan sa Watch Tower Society sa Brazil, dihadihang may gihimo. Ang nagapanawng mga hawas gipadala ngadto sa mga dapit nga naigo sa grabeng hulaw sa mga estado sa Bahia, Ceará, Paraíba, Pernambuco, ug Piauí aron sa pagsusi sa gidak-on sa problema. Ang nagapanawng mga magtatan-aw nakakita nga 900 ka Saksi ug mga estudyante sa Bibliya nga nagpuyo niadtong mga dapita dako kaayog panginahanglan. Ang pipila kanila nangaon lamang ug gabi; ang uban kan-ong humay lamang. Usa ka pamilya walay makaon ug nanginom lamang ug gatas sa pamahaw, paniudto, ug panihapon. Gibaligya sa usa ka Kristohanong sister nga nagsakit ug kanser ang iyang katre aron makapalit ug gamayng pagkaon. Nakaon sa usa ka pamilya nga may unom ka membro ang ilang gihunahunaang kataposang pagkaon sa dihang miabot ang tabang gikan sa ilang Kristohanong mga igsoon.

Ang mga komite sa pagtabang dalidaling giorganisar aron sa pag-apod-apod sa pagkaon ug mga suplay. Ang mga Saksi sa Recife ug ubang kasikbit nga mga siyudad dagayang nanghatag ug donasyon sa mga nanginahanglan. Apan sa dihang gikinahanglan ang dugang tabang, ang mga Kristohanon sa Rio de Janeiro miduyog usab sa pagtabang sa ilang mga igsoon. Sa mubong panahon ang mga Saksi nakadonar ug 34 ka toneladang pagkaon ug maoy nagbayad sa gastos sa paghatod sa mga suplay sa 2,300 kilometros nga gilay-on ngadto sa Recife.

Sa mga kaulohan sa mga estado sa Piauí ug Paraíba, unom ka toneladang pagkaon ang natigom dayon. Usa ka Kingdom Hall sa siyudad sa Fortaleza gihimong temporaryong bodega sa gidonar nga pagkaon. Apan dihay problema. Unsaon sa paghatod sa mga Saksi sa pagkaon ngadto sa destinasyon niini? Usa ka tawo nga dili Saksi ni Jehova malulotong mitanyag sa pagpagamit sa iyang trak. Apan, ang mga komboy nga nagdalag pagkaon ug mga suplay gipahunong ug gikawatan. Makaabot kaha ang gidonar nga pagkaon sa destinasyon niini? Desididong mahibalo ang mga Saksi. Uban sa bug-os nga pagsalig kang Jehova, ilang gipadagan ang trak nga punog pagkaon ngadto sa dapit. Ang mga suplay miabot nga hilwas ug mapasalamatong gidawat.

Kalipay sa Paghatag ug Pagdawat sa Tabang

Ang mga Saksi nga nalangkit sa pag-organisar sa paghatag ug hinabang nalipay sa higayon nga makatabang sa ilang mga igsoon. Usa ka ansiyano sa kongregasyon nga nagpuyo sa São Paulo miingon: “Sa miagi dihay kagutom, kami wala hangyoa sa pag-amot ug pagkaon. Pagkadako sa among pasalamat nga kami gihangyo ning higayona!” Ang mga Saksi sa Fortaleza nagsulat: “Kami malipayon kaayo nga nakatabang sa among mga igsoon, ilabina tungod kay kami nakaseguro nga nakapalipay kami sa kasingkasing ni Jehova. Wala gayod namo kalimti ang mga pulong sa Santiago 2:15, 16.” Kadtong mga bersikuloha sa Bibliya nag-ingon: “Kon ang usa ka igsoong lalaki o usa ka igsoong babaye anaa sa hubo nga kahimtang ug walay pagkaong igo alang sa maong adlaw, apan usa kaninyo moingon kanila: ‘Lakaw nga malinawon, pagpainit ug pagpabusog,’ apan wala ninyo sila hatagi sa mga kinahanglanon alang sa ilang lawas, unsa may kapuslanan niini?”

Usahay ang mga Saksi nga nanghatag ug mga suplay nagsukip ug makapadasig nga mga mensahe diha sa mga putos sa pagkaon. Ang usa ka mensahe nag-ingon: “Ibutang sa hunahuna ang saad nga makita diha sa Salmo 72:16 nga sa dili madugay, sa bag-ong kalibotan sa Diyos, abunda unya ang pagkaon.” Busa, ang giigo-sa-hulaw nga mga Saksi mapasalamaton kaayo sa kalulot sa ilang mga igsoon. Usa ka Saksi kansang pamilya nakadawat sa gikinahanglan-pag-ayong tabang mapasalamaton nga nagsulat: “Ang akong pamilya ug ako naglantaw niining buhata ingong makitang pagpasundayag sa gugma sa atong maluluy-ong Diyos ug Amahan, si Jehova, ug sa mahigugmaong pagtagad sa iyang organisasyon alang kanato, nga mga sakop niini. Nagpabati kini kanamo nga mas suod kaniya ug sa iyang katawhan.”

Usa ka Malungtarong Solusyon

Sa kabaliskaran, daghan kaayog tubig ang amihanan-sidlakan sa Brazil; adunay dagat sa tab-ang nga tubig ilalom sa yuta, maingon man hilabihan ka daghang tubig sa mga pondohanag tubig. Kon posible pa unta nga kining mga tuboran sa tubig mabatonan sa tanan, ang yuta mapuno unta sa pananom.

Sa dili madugay, ang problema nga nagsakit kang Emperador Dom Pedro II masulbad sa dayon. Kanang adlawa moabot sa dihang ang Gingharian sa Diyos ilalom ni Jesu-Kristo magsulbad sa tanang problema sa yuta, apil ang kagutom. Dayon ang giigo-sa-hulaw nga yuta makakita sa katumanan sa tagna sa Isaias: “Diha sa kamingawan magagula ang tubig, ug mga sapa diha sa ugang kapatagan. Ug ang napagbang yuta mahimong linaw nga puno sa tangbo, ug ang uhaw nga yuta ingon sa mga tubod sa tubig.”—Isaias 35:1, 2, 6, 7.

[Kahon/Mga hulagway sa panid 15]

‘Buhata ang Maayo Ngadto sa Tanan’

Gitambagan ni apostol Pablo ang mga isigkamagtutuo: “Buhaton nato ang maayo ngadto sa tanan, apan ilabina kanilang iglabot nato sa pagtuo.” (Galacia 6:10) Ang dili pa dugayng hulaw sa Brazil naghatag sa mga Saksi ni Jehova ug higayon sa pagpadapat sa tambag sa praktikal nga paagi. Ilang gipakita ang mahigugmaong kabalaka dili lamang ngadto sa mga isigkamagtutuo kondili sa uban usab. Tungod niini, ang ubang mga tawo nga supak niadto sa buluhaton sa mga Saksi ni Jehova nagbag-o sa ilang panghunahuna bahin kanila.

Usa ka tawo sa sinugdan wala malipay sa dihang ang iyang asawa midesidir sa pagtuon sa Bibliya uban sa mga Saksi ni Jehova. Sa ngadtongadto, ang asawa nagsugod sa pagpaambit sa iyang bag-ong napalgang pagtuo ngadto sa uban. Sa dihang sa panahon sa grabeng kagutom ang lokal nga mga Saksi miabot sa balay sa magtiayon nga nagdalag pagkaon, ang tawo nakadayeg kaayo nga siya midesidir sa paghimog usa ka butang nga iyang gipanumpa nga dili gayod niya himoon—pagtambong sa lokal nga Kingdom Hall. Bisag nagduhaduha gihapon siya labot sa pagkadinasig sa Bibliya, kining kanhi supak nga tawo midawat sa pagtuon sa Bibliya diha sa balay.

Sa laing lokal nga lugar ang mga Saksi nagtaho: “Nakurat kami nga miabot dayon ang mga suplayng hinabang. Ang gidaghanon sa pagkaon nga gihatag mas daghan kay sa among gidahom. Busa human sa pag-atiman sa mga panginahanglan sa among mga igsoon ug sa ilang mga pamilya, among giapod-apod ang pagkaon ngadto sa mga estudyante sa Bibliya, sa ilang mga paryente, ug usab sa mga silingan sa mga Saksi ni Jehova.”

Ang mga Saksi nga nagpuyo sa usa ka baryo nanghatag ug mga putos sa pagkaon ngadto sa pipila sa ilang mga silingan. Ang usa ka mapasalamatong tagbalay miingon: “Inyong gibuhat ang gitudlo ni Kristo; kamo nanghatag nga wala magpaabot ug bisan unsang balos.”

[Hulagway sa panid 14]

Ang mga epekto sa hulaw

[Picture Credit Line sa panid 13]

UN/DPI Photo by Evan Schneider