Mas Bililhon kay sa Salapi

SINULAT SA KORESPONSAL SA PAGMATA! SA CANADA

“[Siya] mihatag sa iyang anak nga babaye ug usa ka gasa nga mas bililhon kay sa bisan unsang kantidad sa salapi,” miangkon ang usa ka komento sa editoryal sa The Monitor nga mantalaan sa Bridgetown, Nova Scotia. Unsa ang gasa? Kadto mao ang iyang “talagsaong panig-ingnan sa kamatinud-anon.”

Si Anna ug ang iyang anak nga babaye nga si Tanya mihapit sa usa ka baligyaanag segunda-mano nga mga butang ug mipalit ug puti nga bag aron sudlan sa Bibliya ni Tanya. Sa dihang sila midangat sa balay, giablihan ni Tanya ang siper sa sulod sa bag ug nakurat sa pagkakita ug $1,000 nga papel de bangko. Dihadiha, ang inahan ug anak mibalik sa baligyaanag segunda-mano nga mga butang ug gitunol ang salapi ngadto sa babaye nga nagbaligya kanila sa bag. Dayag, ang talagsa-rang-magamit nga bag gipanag-iya sa iyang dili pa dugayng namatay nga inahan, nga nag-antos sa sakit nga Alzheimer, ug wala gayod kadto masusi pag-ayo sa wala pa ibaligya. Hilabihan ka mapasalamaton, ang babaye miingon: “Kini nagpabalik sa akong pagsalig sa mga tawo . . . Makapadasig ang pagkahibalo nga aduna pay naglungtad nga matinud-anong mga tawo.”

Usa ka panghaping artikulo bahin sa maong panghitabo diha sa lokal nga mantalaan nagkutlo kang Anna nga miingon: “Ingong mga Saksi ni Jehova, kadto maoy usa ka natural nga reaksiyon. Kami adunay gipasukad-sa-Bibliya [nga tanlag]. Buot usab namong tudloan si Tanya kon unsay matarong.” Alang kang Tanya, ang bag-ong puti nga bag mahimo unyang usa ka linaing pahinumdom sa usa ka pagtulon-an sa pagkamatinud-anon.