Gikan sa Among mga Magbabasa

Relihiyosong Kagawasan Ako usa ka magbabasa sa Pagmata! sulod na sa daghang dekada karon, ug ako nagsulat sa pagpahayag sa akong apresasyon alang sa seryeng “Imong Relihiyosong Kagawasan—Kini ba Gihulga?” (Enero 8, 1999) Ako nahibalo nga naglungtad ang relihiyosong pagkadili-matinugoton sa Uropa panahon sa gitawag nga Mangiob nga Katuigan ug nga ang Iglesya Katolika milampos sa pagkontrolar sa mga awtoridad aron mapugngan ang mga tawo sa paggamit sa ilang kagawasan sa tanlag ug relihiyon. Karon nga akong nasayran kon unsay nagakahitabo sa Pransiya karon, akong gipangutana ang akong kaugalingon, ‘Ngano man nga gihugawan niining nasora ang ngalan niini pinaagi sa paghikaw sa gipasalig nga relihiyosong mga kagawasan?’ Palihog pahibaloa ang minilyon ninyong mga magbabasa bahin sa resulta niining kahimtanga. Ako may pagsalig nga ang Pransiya magpakitag pagkamatinugoton ug magpasundayag ug maayong panig-ingnan alang sa ubang nasod.

C. C., Puerto Rico

Pagmatutog Pito ka Anak nga Lalaki Salamat sa eksperyensiya ni Bert ug Margaret Dickman sumala sa giasoy diha sa Enero 8, 1999, nga gula. Kini nagdasig gayod kanamo sa pagmatuto sa among tulo ka anak sa paagi nga maghatag kanilag usa ka maayong espirituwal nga panulondon. Ang among mga anak nalipay usab sa maong artikulo. Amo silang madunggan nga magpahinumdomay sa usag usa bahin sa leksiyon ni Doug, nga wala makakaon sa iyang keyk! Salamat sa pagpatik sa maong makapadasig nga eksperyensiya.

S. J., India

Balaang Espiritu Buot ko kamong pasalamatan sa nindot nga artikulong “Ang Hunahuna sa Bibliya: Unsa ang Balaang Espiritu sa Diyos?” (Enero 8, 1999) Bisan tuod ako usa ka Saksi ni Jehova sulod na sa pipila ka tuig, gusto ko gayod kanunayng makakat-on ug dugang pa bahin kang Jehova nga Diyos. Maayo kaayong pagkatubag niining artikuloha ang ulohang pangutana ug sayon nga sabton. Samtang ako mas nakasabot bahin kang Jehova ug sa iyang mga buhat, labi pa akong natugob sa gugma alang kaniya.

Y. B., Rusya

Bulawan Akong nabasa ang inyong artikulo nga “Bulawan—Ang Pagkamisteryoso Niini.” (Septiyembre 22, 1998) Kamo nag-ingon nga ang mga sundalong Alyado nakadiskobreg daghan kaayong bulawan sa mga minahan sa asin sa Kaiseroda, sa Alemanya, pagkahuman sa pagsurender sa Alemanya sa 1945. Sa pagkatinuod, nailog sa mga Alyado ang minahan tulo ka semana sa wala pa matapos ang gubat.

J. S., Alemanya

Salamat sa katin-awan. Ang mga minahan sa Kaiseroda tinuod nga nailog niadtong Abril 4, 1945, kapin sa usa ka bulan sa wala pa misurender ang Alemanya niadtong Mayo 8, 1945.—ED.

Linay-anay nga Panagtrato Ang artikulong “Mga Batan-on Nangutana . . . Sa Unsang Paagi Akong Ikapadayon ang Usa ka Linay-anay nga Panagtrato?” (Enero 22, 1999) ulahi nang miabot alang kanako. Ako taga-Tinipong Bansa ug nagsugod sa pagpakigsulat sa usa ka batan-ong lalaki nga taga-Latin Amerika. Wala gayod ako makaagi ug hilabihan nga kalisod sa akong kinabuhi. Dili mo gayod mailhan ang usa ka tawo pinaagi sa sulat, bisan pag gihimo nimo ang imong maarangan nga magmatinud-anon. Sanglit kamong duha layo kaayo sa usag usa, mokiling ka sa pagpanghanduraw. Sa among kaso, magkalahi ang among mga kultura. Sa dihang natapos na gayod ang among relasyon, akong gibati nga wala nay pulos ang kinabuhi. Tungod sa tabang sa akong mahigugmaon, mapaluyohong pamilya, akong nasagubang kini nga kasinatian.

S. H., Tinipong Bansa

Nakigsulatay ako sa usa ka babaye nga akong nahimamat sa internasyonal nga kombensiyon sa mga Saksi ni Jehova. Lisod isaysay ang hunahuna sa usa ka tawo ngadto sa laing tawo kon nalangkit ang mga kalahian sa kultura ug pinulongan. Busa nagsugod ako sa pagtuon sa iyang pinulongan. Ang sugyot bahin sa paggamit ug teyp rekorder maayo kaayo. Daghang salamat.

A. S., Alemanya

Akong nahimamat ang usa ka sister nga taga-Asia sa usa ka internasyonal nga kombensiyon sa Tinipong Bansa. Dili ko kaayo segurado kon unsaon pagpakigsulatay kaniya. Akong giampo kini, ug pipila lamang ka adlaw sa ulahi, akong nadawat kining nindot nga artikulo. Ako kining gibalikbalik ug basa. Gitubag niini ang akong tanang pangutana.

G. R., Italya