Pagtino sa Pagkatinuod sa mga Sugilanon

ANG mga tawo mosanong sa modernong-adlawng mga sugilanon bahin sa pagkakita ug mga anghel sa daghang paagi. Una, hisgotan nato ang mga magtutuo. Sila mangatarongan nga tungod kay daghan kaayo ang maong mga sugilanon ug kaylap kaayo, kini tingali tinuod. Ikaduha, anaa ang mga maduhaduhaon. Sila moingon nga walay lig-ong ebidensiya nga mopaluyo sa mga pangangkon. Ang kaylap nga pagtuo, sila mangatarongan, dili maghimo sa usa ka butang nga tinuod. Gani, ang mga tawo kaniadto nagtuo ug mga sirena. Ikatulo, anaa ang mga tawo nga neyutral niining bahina. Naghisgot bahin niining neyutral nga panghunahuna, ang librong Angels—Opposing Viewpoints nag-ingon: “Daghang tawo ang nangangkong nakakita ug mga anghel. Kining mga pagkakita dili mapamatud-an; kini gituohan pinasukad sa pagtuo. Hinunoa, dili kini mapamatud-ang bakak sa mga maduhaduhaon ug pipila lang ang misulay.”

Daghang tawo mouyon nga ang Bibliya maoy usa ka kasaligang tuboran sa impormasyon bahin sa kalibotan sa mga espiritu.a Kini makatabang kanato sa pagtimbangtimbang sa modernong mga sugilanon bahin sa mga anghel. Sumala sa imo na tingaling nahibaloan, ang Bibliya nagpasalig kanato nga ang mga anghel maoy tinuod, gamhanan, mahimayaong espiritu nga mga linalang. Ang Bibliya nasudlan ug mga asoy bahin sa mga anghel nga naghatag ug mga mensahe ug nagluwas sa mga alagad sa Diyos gikan sa kadaot.—Salmo 104:1, 4; Lucas 1:26-33; Buhat 12:6-11.

Ang Bibliya nagpakita usab nga adunay daotang mga anghel. Kining espiritu nga mga linalang naglimbong ug nagpahisalaag sa mga tawo, nga nagpalayo kanila gikan sa Diyos. (2 Corinto 11:14) Adunay maayong katarongan nga nagpasidaan ang Bibliya: “Ayaw ninyo tuohi ang matag inspiradong pahayag, hinunoa sulayi ang mga inspiradong pahayag aron masuta kon kini ba sila nagagikan sa Diyos.” (1 Juan 4:1) Pananglitan, una pa kita motuo sa mga tagna sa nagproklamar-sa-kaugalingon nga propeta, maalamon natong itandi ang iyang ipamulong diha sa Pulong sa Diyos, nga tingali siya nangangkon nga naghawas. Siyempre, atong dahomon gayod nga ang modernong-adlawng mga asoy sa mga pagpakita sa mga anghel makabarog sa samang pag-usisa. Nan, unsa kining modernong-adlawng mga pagkakita ug mga anghel kon itandi nianang narekord sa Kasulatan?

Ang mga Anghel Dili Maoy Ingon sa Gituohan sa Daghan

Magsugod kita pinaagi sa pagtin-aw sa duha ka kaylap nga sayop nga mga pagtuo bahin sa mga anghel. Sukwahi sa gituohan sa kadaghanan, ang mga anghel wala magsugod sa ilang kinabuhi ingong mga tawo. Sila naglungtad sa langit dugay na kaayo sa wala pa lalanga sa Diyos ang kinabuhi dinhi sa yuta. Ang Bibliya nag-ingon nga sa panahon nga “gitukod [sa Diyos] ang yuta . . . , ang tanang [anghel nga] anak sa Diyos nanagsinggit sa kalipay.”—Job 38:4-7.

Laing modernong sayop nga ideya mao nga ang mga anghel mapinasagdanon ug matugoton sa sayop nga buhat. Hinunoa, ang matinumanong mga anghel nagbayaw sa matarong nga mga sukdanan sa Diyos ug naglihok sumala sa iyang pagtultol. Sila nag-alagad sa Diyos, dili sa mga tawo.—Salmo 103:20.

Ang mga Anghel Interesado sa Atong Espirituwal nga Kaayohan

Apil sa bag-ong mga sugilanon bahin sa mga anghel, ang mga sugilanon bahin sa pagluwas daghan kaayo. Diha sa usa ka himalitan kaayong libro, atong mabasa ang bahin sa usa ka batang babaye nga malumong giagak pagawas sa usa ka nagkalayo nga balay sa usa ka dili-makita nga kamot. Laing libro nag-asoy bahin sa duha ka estudyante sa kolehiyo nga nasapnan sa unos nga yelo. Sa kalit, usa ka trak mitungha ug giguyod sila sa luwas nga dapit, apan kini walay nabilin nga mga marka! Sa laing dapit, laing estorya nag-asoy bahin kang Ann, nga gikanser. Tulo ka adlaw una pa siya ipaospital alang sa operasyon, usa ka taas nga estranghero mitunga sa iyang pultahan. Iyang gipailaila ang iyang kaugalingon ingong si Thomas ug miingon nga siya gipadala sa Diyos. Gihawiran ni Thomas ang iyang kamot, ug nabati ni Ann ang mainit, puti nga kahayag nga miagi sa iyang lawas. Sa dihang miabot siya alang sa iyang operasyon, ang mga doktor nahibulong. Ang iyang kanser nawala!

Kining mga sugilanona mopatunghag klaro nga pangutana, Kon ang tanan dunay anghel nga magbalantay, nganong ang ubang mga tawo giluwas, samtang daghan wala? Dili maisip nga minilyon ang nangamatay gumikan sa sakit, mga gubat, kagutom, ug kinaiyanhong mga katalagman. Siyempre, daghan ang kinasingkasing nga nangayog tabang diha sa pag-ampo. Nganong wala man sila luwasa sa ilang anghel nga magbalantay?

Ang Bibliya nagtanyag ug tabang niining pangutanaha. Kini nag-ingon nga ang Diyos dili mapihigon. (Buhat 10:34) Dugang pa, samtang ang maunongong mga anghel sa Diyos interesado sa atong pisikal nga kaayohan, sila mas interesado sa atong espirituwal nga kaayohan. Gipakita kini ni apostol Pablo pinaagig pangutana: “Dili ba [ang mga anghel] tanan mga espiritu alang sa publikong pag-alagad, gipadala aron mag-alagad niadtong mga magapanunod ug kaluwasan?” (Hebreohanon 1:14) Ang pisikal nga tabang mohatag ug temporaryong mga kaayohan, apan ang espirituwal nga tabang mohatag ug walay-kataposang kaayohan.

Daghang sugilanon bahin sa mga anghel daw walay hinungdan. Ang mga anghel ginaingon nga motabang sa gikapoyng inahan sa pag-ilis sa mga gamit sa higdaanan, magpahinumdom sa pumapalit sa pagpalit ug mga posporo, ug motabang sa mga drayber sa pagkakitag lugar nga kaparkingan. Usa ka batan-ong babaye sa Scotland nag-ingon nga nag-agik-ik: “Giparking nako ang akong awto sa lugar nga gidili ang pagparking diha sa St Mary’s Street sulod na sa tulo ka semana ug gihangyo ang akong anghel nga libotan kinig gugma ug kaluoy. Kon dunay moduol nga polis trapiko sila mahupngan pag-ayo sa mga pagbati sa gugma nga dili nila ako tiketan. Wala pa gayod ako makadawat ug tiket.” Dili ikahibulong nga itandi sa uban ang modernong-adlawng anghel nga magbalantay sa usa ka fairy godmother o Santa Klaus sa mga hamtong.

Ang Matinumanong mga Anghel Dili Mosupak sa Pulong sa Diyos

Ang mga libro bahin sa mga anghel puno sa mga sanglitanan ug tambag nga ginaingong gikan sa kalibotan sa espiritu. Pananglitan, usa ka libro nangangkon nga nasudlan sa mga pagtulon-an nga gipasa gikan sa arkanghel nga si Miguel ngadto sa usa ka babaye sa Colorado, T.B.A. Apil sa “mga panultihon” nga gikan ni Miguel mao kini: “Ang tanang dalan motultol paingon sa Diyos. Ang tanang pagtulon-an, ang tanang kamatuoran sa kahayag motultol paingon sa Diyos.” Sa kasukwahi, si Jesus miingon nga dunay duha lamang ka relihiyosong mga dalan ug nga usa lamang niini ang motultol paingon sa pag-uyon sa Diyos ug kinabuhing walay kataposan. Ang lain motultol paingon sa pagkawala sa pag-uyon ug walay kataposang kalaglagan. (Mateo 7:13, 14) Tin-aw, kining mga pahayaga dili mahimong tinuod ang duha.

Unsay baroganan sa “mga anghel” sa “bag-ong espirituwalidad” bahin sa kaminyoon ug moralidad? Diha sa usa ka libro mahibaloan sa magbabasa ang bahin kang Roseann, kinsa gisultihan sa iyang “anghel”: “Daghan ka pa ug abton, ug ang pagpakig-uban [sa imong bana] dili na mao ang dalan sa imong kinabuhi. Gihigugma mo siya ug ikaw iyang gihigugma, apan panahon na nga kamo magbulag.” Siya nakigdiborsiyo. Apan, ang Bibliya nagpakita nga ang Diyos nagdumot sa diborsiyo nga walay hustong katarongan. (Malaquias 2:16) Laing sugilanon nag-asoy bahin sa usa ka magtiayon nga nanapaw, nga nagtuo nga nalipayng nagtan-aw ang mga anghel ug naglibot kanila ug talagsaong atmospera. Apan ang Bibliya nag-ingon: “Ayaw pagpanapaw.”—Exodo 20:14.

Mahimo ba kaha nga gibag-o niining modernong-adlawng mga mensahe ang Bibliya? Dili, ang pulong sa Diyos dili mausab. Gisulatan ni apostol Pablo ang pipila sa unang siglo: “Nahibulong ako nga dali ra kaayo kamong napahilayo gikan sa Usa kinsa mitawag kaninyo pinaagi sa dili-takos nga kalulot ni Kristo ngadto sa laing matang sa maayong balita. Apan dili kay lain kini; lamang adunay pipila kinsa nagapahinabog kasamok kaninyo ug nagatinguhang tuison ang maayong balita bahin sa Kristo. Hinuon, bisan pa kon kami o usa man ka anghel gikan sa langit maoy magpahayag kaninyo ug butang ingon nga maayong balita nga nahisaylo sa kon unsay among gipahayag kaninyo ingong maayong balita, ipahimo siyang tinunglo.”—Galacia 1:6-8.

“Gisangpit ang Tanang Anghel!”

Angay ba natong sangpiton ang mga anghel sa pagpangayog tabang sa pag-atubang sa mga problema ug mga kapeligrohan sa kinabuhi? Kini mao ang topiko sa daghang libro. Aniay duha ka pananglitan. Ang librong Ask Your Angels ginaingon nga nagpakita sa mga magbabasa ‘kon sa unsang paagi makakuha sila ug gahom gikan sa mga anghel aron mabalik pag-usab ang ilang nangawalang kinailadmang mga pagbati ug makab-ot ang ilang mga tumong.’ Usa sa susamang libro mao ang Calling All Angels!: 57 Ways to Invite an Angel Into Your Life.

Apan, ang Bibliya wala gayod magdasig kanato sa pagsangpit sa mga anghel. Gitin-aw kini ni Jesus diha sa sulondang pag-ampo. Siya nag-ingon: “Busa, kinahanglang mag-ampo kamo niining paagiha: ‘Amahan namo sa mga langit . . .’” (Mateo 6:9) Sa susama, si apostol Pablo nagsulat: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos.”—Filipos 4:6.

Sa Ngalan sa mga Anghel

Ang “bag-ong espirituwalidad” naghatag ug dakong importansiya sa pagkasayod sa mga ngalan sa mga anghel. Ang popular nga mga libro nagtanyag sa ginaingong mga ngalan sa libolibong anghel. Ngano? Dili sa pagtagbaw sa walay-hinungdang pagkamakisayoron kondili sa pagtawag kanila. Kini nalambigit gayod sa madyik. Ang Encyclopedia of Angels nag-ingon nga duyog sa rituwal, mga butang sa madyik, ug mga orasyon, “ang paggamit sa ‘mga ngalan sa gahom,’ o sa mga ngalan sa espesipikong mga espiritu, mopagawas ug gamhanang mga pag-uyog nga mobukas sa pultahan sa pisikal nga gingharian ug sa gingharian sa mga espiritu, nga makahimo sa mga madyikero sa . . . pagpakigsulti sa mga espiritu.” Bisan pa niana, ang Bibliya tin-awng nag-ingon: “Ayaw kamo paghimog mga madyik.”—Levitico 19:26.

Ang Bibliya mismo nagpadayag sa mga ngalan sa duha lamang ka matinumanong mga anghel, si Miguel ug Gabriel. (Daniel 12:1; Lucas 1:26) Sa paghatag niining mga ngalana, ang Bibliya nagpakita nga ang mga anghel maoy talagsaong espiritu nga mga persona. Nganong diyutay rang ngalan ang gihatag? Lagmit ang katarongan mao ang pagsanta sa mga tawo sa pagbayaw sa mga anghel sa usa ka posisyon nga dili angayng pasidunggan—usa ka butang nga ang mga anghel mismo wala mangako sa pagkab-ot. Busa, sa dihang gipangutana ni Jacob ang usa ka anghel sa pagpadayag sa iyang ngalan, ang anghel mibalibad. (Genesis 32:29) Sa ulahi, ang anghel nga nagpakita kang Josue nagpaila sa iyang kaugalingon dili sa ngalan kondili ingong ang “prinsipe sa panon ni Jehova.” (Josue 5:14) Sa susama, sa dihang ang amahan ni Samson nangutana sa usa ka anghel sa iyang ngalan, siya gisultihan: “Nganong mangutana man kamo sa akong ngalan, nga usa man kini ka katingalahan?” (Maghuhukom 13:17, 18) Ang matinumanong mga anghel sa Diyos nagtinguha nga kita magpasidungog sa Diyos ug magsangpit kaniya, dili kanila.

[Footnote]

[Blurb sa panid 6]

“Alang niadtong mibati nga sobra ra kaayong pinig-otan sa Diyos ug sa iyang mga balaod, . . . ang [Bag-ong Panahon nga] mga anghel mao ang kombenyente kaayong kompromiso . . . maluloton, dili-mahukmanon. Ug sila mabatonan sa tanan, sama sa aspirin.” —Time nga magasin

[Kahon sa panid 5]

Modernong-Adlawng “mga Pagkakita” ug mga Anghel ug mga Taga-Laing Planeta

Daghang tawo karon nangangkon nga sila nakakita ug mga anghel ug nakigsulti kanila. Ang uban miingon nga sila nakakontak ug mga taga-laing planeta. Ang librong Angels—An Endangered Species naglistag mga kaamgid-amgid niining mga asoya, nga nangangkon nga ang duha lagmit adunay usa ra ka katin-awan.b Ang mosunod maoy sumaryo sa pipila ka kaamgid-amgid nga nalista diha sa libro.

1. Ang mga anghel ug mga taga-laing planeta nagagikan sa ubang mga kalibotan.

2. Ang duha maoy labaw kaayong mga matang sa kinabuhi, espirituwal man o teknolohikal.

3. Ang mahigalaong matang maoy batan-on ug ambongag panagway, ug sila malulot ug mahangawaon kaayo.

4. Ang duha walay problema sa pinulongan, nga makasulting matin-aw sa pinulongan sa mamiminaw.

5. Ang duha hawod kaayong molupad.

6. Ang panagway sa mga anghel ug sa mga taga-laing planeta giubanan ug sanag kaayong kahayag.

7. Ang duha makita nga nagsul-ob ug besti, nga kasagaran nagsul-ob ug kapa o huot nga mga tunic. Puti o asul ang paboritong mga kolor.

8. Ang duha kasagarang samag gitas-on sa mga tawo.

9. Ang duha nabalaka sa kahimtang sa mga tawo ug sa planeta.

10. Ang ebidensiya sa pagkakita ug taga-laing planeta ug mga anghel mao ang pahayag sa nakakita.

[Footnote]

[Hulagway sa panid 7]

Ang Bibliya nasudlan sa tinuod nga mga asoy bahin sa mga anghel nga nagpakita sa mga tawo