Ang Kamatuoran Bahin sa mga Anghel
SAMA sa ato nang nasabtan, ang popular nga mga ideya ug mga sugilanon bahin sa mga anghel dili kanunayng magkauyon nianang gitudlo sa Bibliya. Hinungdanon ba gayod nga adunay panagsumpaki? Duna bay daotan sa pagdawat sa popular nga mga pagtuo bahin sa mga anghel? Tino nga aduna.
Tagda, pananglitan, ang mga tinamdan nga gidasig sa “bag-ong espirituwalidad.” Ang modernong mga libro bahin sa mga anghel nagdasig ug samag-bata nga pagkadili-aktibo, sa dili paggamit sa katakos sa panghunahuna. Talagsa ra nga dasigon ang mga magbabasa sa pagsulbad sa ilang mga problema o sa pagpangitag pagsabot sa Bibliya ug sa kahibalo sa Diyos. Ang mga libro bahin sa mga anghel nagpasalig kanato nga kita naglakaw sa kinabuhi nga dunay malumo ug mahigugmaong anghel sa atong kiliran ug nga dili na kinahanglang malisang, sanglit kay kita nagkinabuhi diha sa usa ka malipayong uniberso diin anaa ang tanang butang sa iyang angay nga nahimutangan. Sa dihang dunay motunghang problema, kita maghulat lamang sa pagsalga sa anghel. Apan, kon mao kini, nganong ang Bibliya nagsugo kanato nga “kusganong makigbugno alang sa pagtuo”?—Judas 3.
Daghang libro bahin sa mga anghel nagtagbaw sa tawhanong garbo ug kakawangan. Ang ilang gisentro mao ang kaugalingon. Sumala sa maong mga libro, ang modernong-adlawng mga anghel buot nga kita mahibalo kon unsa kita ka maanyag ug ka malipayon. Bisan pag maayo nga aduna kitay positibong hunahuna sa atong kaugalingon, ang pangunang tema sa “bag-ong espirituwalidad” mao ang paghigugma sa atong kaugalingon nga walay-kondisyon. Usa ka awtor nag-ingon nga ang una ug kinadak-ang sugo mao ang “paghigugma sa imong Ginoo nga Kaugalingon.” Pagkasukwahi kini sa mga pulong ni Jesus! Siya nag-ingon: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan. Kini ang kinadak-an ug unang sugo.” (Mateo 22:36-39) Kita ang labing malipayon sa kinabuhi kon atong pangitaon ang intereses sa Diyos nga una kay sa atoa.
Ang paghatag ug dakong pagtagad sa mga anghel supak sa tinuod nga Kristiyanidad. Si apostol Pablo nagsaway sa pagsimbag mga anghel. (Colosas 2:18) Ang pagsimba nagkahulogang “pagpasidungog o paghimaya sa usa ka balaang persona o labaw-tawhanong gahom.” Bisan pa, ang pagpasidungog ug paghimayag mga anghel mao gayoy gidasig sa daghang popular nga mga libro bahin sa mga anghel nga himoon sa mga magbabasa. Apan, hinumdomi kon unsay nahitabo sa dihang gihangyo ni Satanas si Jesus sa pagtanyag kaniya ug usa ka buhat sa pagsimba. Si Jesus mitubag: “Si Jehova nga imong Diyos ang imong pagasimbahon, ug kaniya lamang ikaw magahatag ug sagradong pag-alagad.” (Lucas 4:8) Sa ulahi, sa dihang si apostol Juan mihapa atubangan sa usa ka anghel, ang anghel miingon kaniya: “Pagbantay! Ayaw kana buhata! Ako usa lamang ka isigkaulipon nimo ug sa imong mga igsoon nga may buluhaton sa pagpanaksi bahin kang Jesus. Simbaha ang Diyos.”—Pinadayag 19:10.
Kon sa Unsang Paagi ang mga Anghel Makatabang Kanimo
Ang usa nga duolon alang sa pagtultol ug tabang mao ang Diyos, dili ang mga anghel. Siya andam ug malipay sa paghatag ug gugma sa tanan nga mosunod sa iyang matarong nga mga kinahanglanon. Gisulatan ni apostol Juan ang mga isigka-Kristohanon: “Mao kini ang pagsalig nga atong gibatonan ngadto kaniya, nga, walay sapayan kon unsay atong pangayoon sumala sa iyang kabubut-on, kita iyang dunggon. Dugang pa, kon nahibalo kita nga iya kitang dunggon mahitungod sa bisan unsa nga atong ginapangayo, nahibalo kita nga mabatonan nato ang mga butang nga gipangayo sanglit ato mang gipangayo kini kaniya.”—1 Juan 5:14, 15.
Dunay daghang butang nga kita wala mahibalo bahin sa matinumanong mga anghel sa Diyos. Hinunoa, kita nahibalo nga sila nag-alagad sa Diyos, nga nagbuhat sumala sa iyang katuyoan ug pagtultol. Sila maikagon sa pagpalambo sa kamatuoran bahin sa Diyos. (Pinadayag 14:6, 7) Sila wala magtinguha sa atong pagsimba. Sanglit kita dili man makakita kanila, kita walay kasayoran kon diin kutob nga gamiton sila sa Diyos sa pagtabang sa iyang katawhan sa adlaw-adlawng mga butang. Apan kita nahibalo nga si Jehova nga Diyos nagapanalipod ug nagatultol sa iyang katawhan ingong usa ka pundok.
Pagkamaayong panig-ingnan ang gipakita kanato sa matinumanong mga anghel! Sila naghimaya ug nagdayeg sa Diyos. (Salmo 148:2) Bisan tuod sila adunay dakong gahom sa hunahuna ug sa espirituwal, sila nagpakita ug lalom nga pagtahod sa pagkasoberano ni Jehova. (Judas 9) Sila interesado gayod nga matuman ang mga katuyoan sa Diyos. (1 Pedro 1:11, 12) Diha sa Pulong sa Diyos, ang Bibliya, nga makat-onan nato kining mga butanga. Oo, ang Bibliya mao ang basahon nga nagtug-an kanato sa kamatuoran bahin sa mga anghel.
[Blurb sa panid 10]
Ang mga anghel maikagon sa pagpalambo sa kamatuoran bahin sa Diyos
[Hulagway sa panid 8, 9]
Sa dihang misulay si apostol Juan sa pagsimba sa usa ka anghel, ang anghel miingon: “Ayaw kana buhata!”