Usa ka Talagsaong Kausaban Ngadto sa Pagkamaayo

“Ang kalibotan sa 1900 talisulod sa usa sa labing talagsaong mga yugto sa kausaban sa kasaysayan sa tawo. Ang usa ka bag-ong kahikayan miiway alang sa bag-o.”—The Times Atlas of the 20th Century.

SAYO sa ika-20ng siglo, “ang kalibotan misulod sa usa ka yugto sa talagsaong kasamok ug kabangisan,” nag-ingon ang gikutlo-sa-itaas nga atlas. Kining sigloha nakasinatig mas daghang gubat kay sa ubang siglo, nga may kapig 100 milyon nga namatay.

Niining yugtoa, ang mga gubat nakapatayg mas daghang sibilyan kay sukad masukad. Sa Gubat sa Kalibotan I, 15 porsiyento sa mga patay maoy mga sibilyan. Apan sa Gubat sa Kalibotan II, sa pipila ka nasod ang namatay nga mga sibilyan milabaw sa namatay nga mga sundalo. Sa milyonmilyon nga namatay sa mga gubat sukad niadto, ang kadaghanan mga sibilyan. Kining tanang kabangisan nagtuman sa tagna sa Bibliya bahin sa nagsakay sa “usa ka kalayog-bulok nga kabayo,” kinsa “gitugotan sa pagkuha sa pakigdait gikan sa yuta.”—Pinadayag 6:3, 4; Mateo 24:3-7.

Kausaban sa mga Batakan

Ang ika-20ng siglo nagtuman sa tagna sa 2 Timoteo 3:1-5, nga nag-ingon: “Sa kataposang mga adlaw moabot ang makuyaw nga mga panahong lisod sagubangon. Kay ang mga tawo unya maoy mahigugmaon sa kaugalingon, mga mahigugmaon sa salapi, mapasiatabon-sa-kaugalingon, mapahitas-on, mga tigpasipala, dili-masinugtanon sa mga ginikanan, dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, walay pagpugong-sa-kaugalingon, mabangis, walay gugma sa pagkamaayo, mga mabudhion, gahig-ulo, managburot sa garbo, mga mahigugmaon sa kalipayan inay nga mga mahigugmaon sa Diyos, managbaton ug dagway sa diyosnong pagkamahinalaron apan nagapanghimakak sa gahom niini.”

Sa usa ka sukod, ang dili-hingpit nga mga tawo kanunayng nagpadayag nianang mga kinaiyaha. Sulod sa ika-20ng siglo, ang maong mga tinamdan migrabe ug mikaylap. Ang mga tawo nga nagagawi sa gibatbat-sa-itaas nga mga paagi kaniadto giisip nga kontra-sosyedad—kon dili man bug-os nga daotan. Karon bisan ang mga tawong ‘nagbaton ug dagway sa diyosnong pagkamahinalaron’ mausbawong nag-isip sa maong panggawi ingong normal.

May panahon sa nangagi nga ang mga tawong relihiyoso nag-isip nga dili maayong mag-ipon ang babaye ug lalaki nga wala magpakasal. Ang gipaangkang dalaga giisip nga makauulaw, ingon man ang mga relasyong homoseksuwal. Alang sa kadaghanang tawo ang mga aborsiyon bug-os nga dili dalawaton, ug ingon man usab ang diborsiyo. Ang panglimbong sa negosyo salawayon. Apan karong adlawa, sumala sa giingon sa usa ka magsusulat, “ang bisan unsa gitugotan.” Ngano? Sa usa ka bahin, “kini magtagbaw sa kinaugalingong interes niadtong dili buot sultihan sa uban kon unsay dili himoon.”

Ang pagbiya sa hataas nga mga sukdanan sa pamatasan niining sigloha nagpahinabo sa pagkausob sa mga pinalabi o mga prioridad. Ang The Times Atlas of the 20th Century nagpatin-aw: “Sa 1900 ang mga nasod ug mga indibiduwal nagsukod pa sa ilang bili sumala sa mga terminong dili salapi. . . . Pagkatapos sa siglo ang mga nasod nagsukod sa ilang kalamposan sumala sa halos bug-os mga termino sa panalapi. . . . Ang susamang mga kausaban nahitabo sa paagi sa pag-isip sa mga tawo sa bahandi.” Karong adlawa ang pagsugal nagpausbaw sa gugma sa salapi, samtang ang radyo, telebisyon, mga sine, ug mga video nagdasig sa materyal nga mga tingusbawan. Bisan ang mga salida bahin sa mga bangga sa pangutok ug mga bangga sa panganunsiyo nagpadala sa mensahe nga ang salapi maoy, kon dili man labing bililhon, labing menos halos labing bililhon.

Nag-uban Apan Naglagyo

Sa sinugdanan sa ika-20ng siglo, kadaghanang tawo nagpuyo sa kabanikanhan. Giingon nga sayo sa ika-21ng siglo, kapig katunga sa populasyon magapuyo sa mga siyudad. Ang librong 5000 Days to Save the Planet nag-ingon: “Ang tahas sa pagtaganag igo nga sukdanan sa pagpuyo alang sa mga molupyo sa siyudad karong adlawa, labi na alang sa umaabot nga mga kaliwatan, daw dili-mabuntog nga mga suliran.” Ang magasin sa HK nga World Health nag-ingon: “Ang proporsiyon sa mga tawo sa kalibotan nga nagpuyo sa mga siyudad nagkataas. . . . Ginatos ka milyon . . . karon nagpuyo sa mga kahimtang nga makadaot sa ilang panglawas ug magpameligro pa gani sa ilang mga kinabuhi.”

Pagkasumpaki nga samtang nagdug-ol diha sa mga siyudad, naglagyo usab ang mga tawo! Ang telebisyon, mga telepono, ug Internet, uban sa pagpamalit pinaagig kompiyuter, bisan pag mapuslanon, molaktaw sa nawongay nga mga pakiglabot. Busa ang Alemang mantalaang Berliner Zeitung mihinapos: “Ang ika-20ng siglo dili lamang ang siglo sa sobrang populasyon. Kini usab mao ang siglo sa pagkamamingawon.”

Kini mosangpot sa mga trahedya sama sa usang didto sa Hamburg, Alemanya, diin ang lawas sa usa ka lalaki nakaplagan diha sa iyang apartment lima ka tuig human sa iyang pagkamatay! “Walay usa nga gihidlaw kaniya, wala bisan mga paryente ni mga silingan ni mga awtoridad,” matod sa Der Spiegel, nga midugang: “Alang sa daghang lungsoranon kini nagsimbolo sa makalilisang nga sukod sa pagkawala-hiilhi sa adlaw-adlaw ug kakulang ug sosyal nga panag-uban diha sa dakong siyudad.”

Ang sala nianang makapasubong mga kahimtang wala diha sa siyensiya ug teknolohiya. Kini sa panguna anaa sa mga tawo. Kining sigloha nagpatunghag labi pang daghang tawo kay sa nangagi nga maoy “mahigugmaon sa kaugalingon, mga mahigugmaon sa salapi, . . . dili-mapasalamaton, . . . walay kinaiyanhong pagbati, dili ikasabot sa bisan unsa, . . . walay gugma sa pagkamaayo, . . . mga mahigugmaon sa kalipayan inay nga mga mahigugmaon sa Diyos.”—2 Timoteo 3:1-5.

1914, Usa ka Tiniman-ang Tuig

Sumala ni Winston Churchill, “ang sinugdanan sa ikakawhaang siglo daw masanagon ug malinawon.” Daghan ang naghunahuna nga kadto magpatungha sa usa ka panahon nga may way-ingon nga pakigdait ug kadagaya. Apan, niadtong 1905 ang Watch Tower sa Septiyembre 1 nagpasidaan: “Aduna unyay dugang gubat sa dili madugay,” nga nagpahayag usab nga ang usa ka “dakong katalagman” magsugod sa 1914.

Sa pagkamatuod, ingon ka sayo sa 1879, kanang basahona mipunting sa 1914 ingong usa ka makahuloganong petsa. Sa ulahing mga tuig kini nag-ingon nga ang mga tagna sa Bibliya diha sa basahon ni Daniel nagpunting nianang petsaha ingon nga mao ang panahon sa pagkatukod sa Gingharian sa Diyos sa langit. (Mateo 6:10) Bisan pag ang 1914 dili ang panahon nga ang Gingharian bug-os magagahom sa kahikayan sa yuta, kadto ang panahon aron mosugod kini sa pagmando.

Ang tagna sa Bibliya nag-ingon: “Sa mga adlaw nianang mga haria [nga naglungtad sa atong panahon] ang Diyos sa langit magatukod ug usa ka gingharian [sa langit] nga dili gayod malumpag.” (Daniel 2:44) Ang maong Gingharian, nga si Kristo ang Hari, nagsugod pagtigom dinhi sa yuta sa mahadlokon-sa-Diyos nga mga tawo nga matinguhaong mahimong mga ginsakpan niini.—Isaias 2:2-4; Mateo 24:14; Pinadayag 7:9-15.

Atol sa nahitabo sa langit, ang 1914 mao ang sinugdanan sa “kataposang mga adlaw,” ang sinugdanan sa usa ka yugto sa panahon nga matapos duyog sa pagkalaglag sa sistema sa mga butang nga karon naglungtad. Si Jesus nagtagna nga ang sinugdanan niining yugtoa pagatiman-an ug mga gubat sa kalibotan, mga kanihit sa pagkaon, mga epidemya sa sakit, malaglagong mga linog, ug mausbawong pagkamalapason ingon man pagkabugnaw sa gugma sa katawhan alang sa Diyos ug sa tawo. Kining tanang butanga, matod niya, magtimaan sa “sinugdanan sa mga kasakitan.”—Mateo 24:3-12.

Bug-os nga Bag-ong Kalibotan sa Dili na Madugay

Milabay na kanato ang 85 ka tuig sa maong “kataposang mga adlaw,” ug kita tuling nagkaduol sa kataposan niining presenteng dili-makapahimuot nga sistema sa mga butang. Sa dili na madugay ang Gingharian sa Diyos, ubos ni Kristo, “magadugmok ug magatapos niining tanang gingharian [nga naglungtad karon], ug kini mobarog hangtod sa mga panahong walay tino.”—Daniel 2:44; 2 Pedro 3:10-13.

Oo, ang Diyos magpapha sa pagkadaotan gikan sa yuta ug magpasulod sa matarong-ug-kasingkasing nga katawhan nganha sa bug-os bag-ong kalibotan. “Ang mga matul-id mao ang magapuyo sa yuta, ug ang walay-ikasaway maoy ibilin diha niana. Kon mahitungod sa mga daotan, sila pagaputlon gikan sa yuta.”—Proverbio 2:21, 22.

Pagkamakalipay nga mensahe—angay gayod nga imantala sa bisan diin! Ang Gingharian sa Diyos sa dili madugay magsulbad sa mga suliran nga misamot lamang sa ika-20ng siglo: gubat, kakabos, sakit, inhustisya, pagdumot, pagkapanatiko, kawalay-trabaho, krimen, kasub-anan, kamatayon.—Tan-awa ang Salmo 37:10, 11; 46:8, 9; 72:12-14, 16; Isaias 2:4; 11:3-5; 25:6, 8; 33:24; 65:21-23; Juan 5:28, 29; Pinadayag 21:3, 4.

Ang kalaoman ba nga mabuhing walay kataposan diha sa usa ka matarong nga kalibotan nga may dili-ikabatbat nga kalipay madanihon alang kanimo? Pangayog dugang impormasyon sa mga Saksi ni Jehova. Ipakita nila kanimo gikan sa imong kaugalingong kopya sa Bibliya nga ang makuyawng katuigan sa kausaban nga nagtimaan sa ika-20ng siglo matapos na sa dili madugay ug human niana makatagamtam ka sa dili-matapos nga mga panalangin!

[Hulagway sa panid 10]

Bug-os nga bag-ong kalibotan sa dili na madugay