Gikan sa Kinabuhi sa Krimen Ngadto sa Kinabuhing may Paglaom

SUMALA SA GIASOY NI COSTA KOULLAPIS

AKO MITUTOK SA HUGAWNG MGA BUNGBONG SA AKONG ATOB SA BILANGGOAN UG MIHUKOM NGA KINAHANGLANG AKO MANGITAG PAAGI ARON MAKASAPIG DAKONG KANTIDAD ARON MAKAGAWAS AKO SA ESTILO SA KINABUHI SA KRIMEN NGA AKONG NASUDLAN UG MAKASUGOD UG BAG-ONG KINABUHI.

SAMTANG naglingkod ako didto—nga makaluluoy ug masulub-on—akong gidumdom nga sulod sa miaging tuig, 11 sa akong mga higala ang namatay. Ang usa gibitay tungod sa pagbuno, ang lain naghikog samtang naghulat sa husay tungod sa pagbuno, tulo naoberdos sa droga, duha gikulata hangtod namatay diha sa mga away sa kalye, ug upat namatay sa mga aksidente sa motorsiklo. Lain pa, ubay-ubay sa akong mga higala anaa sa sulod sa nagkalainlaing mga bilanggoan nga nagsilbig mga sentensiya tungod sa seryosong mga krimen.

Busa sa kangiob sa atob sa akong bilanggoan, ako tim-os nga miampo sa Diyos, bisan kon kinsa man siya, nga ipadayag kanako ang dalan sa paggula sa maong kalibotan sa krimen. Sa ulahi nga panahon lang nadawat ko ang tubag sa maong pag-ampo. Kasamtangan, nakalikay ako sa seryosong sumbong nga pag-atake sa tuyo nga mohimog grabeng kadaot sa lawas. Ang plea bargain o usa ka pakigsabot labot sa kaso nakatabang, ug ako nakalikay sa bug-at nga silot tungod sa menosmenos nga sumbong ug gipamenosan nga sentensiya. Apan paasoya una ako kon sa unsang paagi nasugamak ako nianang kahimtanga.

Natawo ako sa Pretoria, Habagatang Aprika, sa 1944 ug nagdako didto. Masulub-on ang panahon sa akong pagkabatan-on, ug ang among pamilyahanong kinabuhi sagad masulub-on tungod sa mabangisong mga pagsilaob sa kasuko ni Papa, nga gipagrabe sa iyang sigeng pagkahubog. Sugarol usab siya kaayo, ug ang iyang pagkasapoton mosangpot sa grabe nga binabang pagtampalas ug lawasnong pagdagmal kanamong tanan, ilabina sa akong inahan. Aron makaikyas sa sigeng mga away, ako nagpunay ug adto sa kalye.

Akong Pagsubay sa Kinabuhi sa Krimen

Ingong resulta, ako nahimong maalamon sa kalibotanong mga paagi sa linghod kaayong edad. Pananglitan, sa otso anyos pa ako, nakakat-on akog duha ka pagtulon-an. Ang una maoy sa dihang nadakpan ako nga may mga dulaan nga gikawat nako gikan sa balay sa usa ka silingan. Giayoayo akog bunal sa akong amahan. Mabatian ko pa ang iyang masuk-anong bahad: “Kon hisakpan tika pag-usab nga may kinawat, balion ko nang imong liog!” Mihukom ako dili gayod nga dili na ako mootrog pangawat kondili nga dili na gayod ako magpadakop pag-usab. ‘Sa sunod higayon tagoan ko kini ug dili gayod madiskobrehan,’ naghunahuna ako sa akong kaugalingon.

Ang ikaduhang pagtulon-an nga nakat-onan ko sa bata pa ako walay kalabotan niana. Panahon sa usa ka klase bahin sa Kasulatan sa eskuylahan, gitudloan kami sa among magtutudlo nga ang Diyos adunay personal nga ngalan. “Ang ngalan sa Diyos maoy Jehova,” miingon siya sa among katingala, “ug siya magpatalinghog sa bisan unsang pag-ampo nga inyong litokon, basta kamo mangayo diha sa pag-ampo sa ngalan sa iyang Anak, si Jesus.” Kadto nahipatik sa linghod kong hunahuna, bisan pag wala kadto makapugong sa pagkaganoy nako ngadto sa kinabuhi sa krimen. Sa pagkatinuod ako nahimong batid sa pagpangawat sa tindahan ug pagpanglungkab sa panahong ako naghayskul na. Ang akong mga higala sa eskuylahan wala makatabang, sanglit daghan kanila ang nakagugol na ug panahon sa mga tunghaan sa reporma tungod sa nagkalainlaing mga krimen.

Sa paglabay sa katuigan, ako nahimong nagbatasang kriminal. Nalangkit ako sa di-maihap nga mga pangatake aron makakawat, mga panglungkab, mga pangawat sa kotse, ug mabangisong mga pag-atake sa wala pa gani ako magbayente anyos. Sanglit ako kanunayng nagyampungad sa mga bilyaran ug sa mga bar, nga gihimong masugosugo sa mga bugaw, mga pampam, ug mga kriminal, wala gani nako makompleto ang una kong tuig sa teknikal hayskul.

Nagkuyogkuyog ako sa way-tanlag nga mga kriminal, kinsa dili magpanuko sa pagkulata kang bisan kinsang magluib kanila. Nakat-onan ko nga maayo ang pagtak-om sa akong baba ug dili manghambog sa akong mga nahimo o magpakitakita ug kuwarta. Ang pagbuhat niana magsibya lamang nga nahimo ang usa ka krimen, nga mahimong mosangpot sa pagmatikod sa mga polis ug sa lisod sagubangon nga pagsukitsukit. Daotan pa, basin mosangko kana sa wala-damhang mga pagduaw sa ubang mga kriminal nga gustog bahin sa mga kinawat.

Ugaling, bisan pa sa maong mga panagana, may panahong gibantayan ako sa mga polis gumikan sa katahap nga nalangkit ako sa ilegal nga mga buhat. Apan ako nag-amping nga dili gayod magbaton ug bisan unsa nga basin maglangkit kanako sa usa ka krimen o makadahig kanako. Kas-a, ang mga polis nagronda sa among balay sa alas tres sa buntag. Gisusi nila ang tibuok balay sa duha ka higayon, nga nangitag elektrikal nga mga butang—gikawat ang estak sa lokal nga tigbaligyag dinaghan. Wala silay nakaplagan. Gidala ako ngadto sa presinto sa polis alang sa pagkuha sa mga luta sa tudlo apan wala ikiha.

Pagkalangkit sa Droga

Sukad sa 12 anyos, ako regular nang naggamit ug mga droga nga makapadaot sa hunahuna. Nagsugod sa pagkadaot ang akong panglawas gumikan sa maong pag-abusar, ug sa daghang higayon ako hapit maoberdos. Sa wala madugay ako gipailaila ngadto sa usa ka doktor nga may lig-ong mga koneksiyon sa sindikato. Kadto misangpot sa akong pagkahimong tigbaligyag mga droga, ug sa wala madugay akong nasayrang ang pagsuplay sa pipila ka tigpanagtag menos kaayog risgo alang kanako tungod kay ako magpabiling dili makita samtang uban ang nameligro.

Ikasubo, pipila sa mga tawo nga akong gibaligyaan sa mga droga naoberdos ug nangamatay o nakahimog seryosong mga krimen samtang nahubog sa mga droga. Usa ka “higala” nagpatay sa usa ka inilang doktor. Kadto nahimong ulohang-balita sa tibuok nasod. Unya gisulayan niya ang pagdahig kanako, apan wala gani ako makadungog sa hitabo hangtod nga nangabot ang mga polis sa ang-ang sa akong pultahan. Ngani, ang mga polis kanunayng moanha ug magsukitsukit kanako bahin sa lainlaing mga krimen nga nahimo.

Apan, usa ka adlaw, may gihimo akong binuang kaayo. Human sa tibuok-semanang pagpatuyang sa paggamit sa droga ug pag-inom ug alkoholikong ilimnon, giatake ko ang duha ka lalaki sa dakong kasuko human sa usa ka di-pagsinabtanay ug grabeng nagkulata kanila. Sa pagkabuntag ako ilang gipaila ingong ilang mangangatake, ug ako gidakop pinasukad sa sumbong nga pag-atake sa tuyo nga mohimog grabeng kadaot sa lawas. Kanay hinungdan nga ako nahibanlod sa bilanggoan.

Mahimong Dato, Dayon Magminatarong

Sa pagkagawas sa bilanggoan, nakadungog ako bahin sa bakante nga tigdumalag suplay sa usa ka kompaniya sa tambal. Ako miaplay ug nagkombinsir sa tag-iya nga ako may-katakos alang sa trabaho. Tungod sa usa ka rekomendasyon sa usa ka higala nga nagtrabaho na sa kompaniya, ako nakatrabaho. Kini, ako naghunahuna, mao ang paagi nga ako makasapig dako ug makalakaw ngadto sa laing dapit aron magbag-o sa kinabuhi. Busa ako nagkugi sa pagkat-on sa tanang bahin sa negosyo sa labing madali ug nagpulaw sa matag gabii sa pagtuon sa mga ngalan sa tanang tambal. Gipaneguro ko nga kadto mao ang dalan ngadto sa usa ka bag-ong kinabuhi.

Ang akong plano mao ang paghulat ug sa pag-angkon sa pagsalig sa akong mga amo. Dayon, sa nahiangayng panahon, ako manglungkab ug mangawat ug daghan kaayo sa linaing mga tambal nga akong nasayrang mahal kaayo sa ilegal nga baligyaan, ibaligya kana, ug mahimo dayong dato. Akong gimugna kon unsay akong gituohan nga way-pagkasayop nga pasangil aron masegurado ang akong kagawasan ug ang usa ka bag-ong kinabuhi.

Ang panahon miabot aron akong ipatuman ang plano. Usa ka gabii, human sa mabinantayong pagsulod sa bodega, akong gitan-aw ang mga estanteng punog mga tambal nga mobilig ginatos ka libolibong dolyares. Akong nakita didto ang akong higayon sa pagsugod sa usa ka kinabuhi nga gawas na sa krimen ug kabangisan. Apan, sa unang higayon gayod, ako gitugaw sa akong tanlag. Unsay nagpahinabo sa maong kalit nga pagtulisok sa tanlag sa dihang halos nalimtan ko na nga ako may tanlag diay? Paasoya ako kon sa unsang paagi kini nahitabo.

Pipila ka semana una pa niini, ang manedyer ug ako may panaghisgot bahin sa kahulogan sa kinabuhi. Ingong tubag sa butang nga iyang gisulti, ako mitubag nga ingong kataposang dangpanan, ang usa makaampo. “Kang kinsa?” nangutana siya. “Sa Diyos,” ako mitubag. “Apan adunay daghang diyos nga giampoan sa mga tawo,” siya miingon, “busa kinsa kanila ang imong ampoan?” Ako miingon: “Sa Labing Gamhanang Diyos.” “Oh,” mipadayon siya, “ug unsa ang iyang ngalan?” “Unsay buot nimong ipasabot?” ako nangutana. “Aw, sama kanimo ug kanako ug sa tanan nga uban pa, ang Diyos nga Labing Gamhanan adunay personal nga ngalan,” mao ang iyang tubag. Kadto daw makataronganon, apan ako nagkapikal na. Busa mapikalon akong nangutana: “Aw, unsa ang ngalan sa Diyos?” “Ang ngalan sa Labing Gamhanang Diyos maoy Jehova!” mitubag siya.

Sa kalit ang usa ka tin-awng hulagway sa kagahapon misantop sa akong alimpatakan, ug ang panumdoman niadtong pagtulon-an sa lawak-klasehanan sa dihang ako otso anyos pa miagos pagbalik. Sa akong katingala, ang epekto kanako sa pakighisgot uban sa manedyer maoy makapakurat. Kami nanglingkod sa daghang oras nga ugdang nga nagkabildohay. Sa pagkaugma gidad-an niya ako sa librong Ang Kamatuoran nga Motultol sa Kinabuhing Dayon.a Akong gibasa ang tibuok libro niadtong gabhiona ug nakombinsir dayon nga akong nakaplagan ang kamatuoran ug ang tinuod nga kahulogan sa kinabuhi. Sulod sa sunod duha ka semana, ang halos gibuhat lamang namo mao ang paghisgot sa nagkalainlaing mga ulohan nianang makapahinganghang asul nga libro.

Busa, samtang ako naglingkod diha sa kangitngitan ug kahilom sa bodega, ang akong tanlag nagdumbol kanako nga ang akong mga plano sa pagpangawat ug pagbaligya sa mga droga daotan gayod. Ako mahilomong mibiya ug mipauli, nga determinado nga sukad niadto ako dili na mangawat.

Usa ka Bug-os nga Kausaban

Sa misunod nga mga adlaw, gisultihan nako ang akong pamilya nga ako nakahukom nga sugdan ang usa ka bag-ong dalan sa kinabuhi, ug gisugdan ko ang pagpakig-ambit kanila sa pipila sa mga kamatuoran sa Bibliya nga akong nakat-onan. Gusto sa akong amahan nga palayason ako sa balay. Apan ang akong manghod lalaki nga si John nagdepensa kanako, nga miingon ngadto sa akong amahan: “Kini ang unang higayon sa iyang kinabuhi nga si Costa nalangkit sukad sa butang nga dili kriminal, ug gusto nimo siyang palayason? Kini susihon ko sa dugang.” Sa akong kahingangha, gihangyo ako ni John nga magtuon sa Bibliya uban niya. Sukad niadto, ang tanan nga nanganha kanako nga nangitag mga droga nahatagan hinuon sa librong Kamatuoran! Sa wala madugay ako nagdumalag 11 ka pagtuon sa Bibliya sa tabang nianang libroha.

Unya akong nasayran nga ang manedyer sa kompaniya dili diay Saksi mismo. Ang iyang asawa maoy Saksi sulod sa mga 18 anyos na, apan siya “wala gayod makapanahon nga may himoon bahin sa kamatuoran.” Busa gihikay niya nga ang usa ka eksperyensiyadong Saksi magdumalag regular nga pagtuon sa Bibliya uban nako. Ang akong mga pagtuon sa wala madugay nakatabang nako sa pagkasabot sa panginahanglan nga atubangon ang ubang mga isyu sa kinabuhi, ug wala magdugay nga ang kamatuoran sa Pulong sa Diyos nagsugod sa pagpahigawas kanako gikan sa akong kalibotanong mga paagi.—Juan 8:32.

Ugaling, sa kalit gibati ko nga nabug-atan sa katulin sa pagkahitabo sa mga butang latas sa pila ra ka semana. Giatubang nako ang dagkong mga kausaban, ug nakaamgo ako nga ang usa ka dakong pakigbisog tali sa unod ug sa espiritu nagpaabot kanako kon ako magpadayon sa pagsubay sa direksiyong gipunting kanako sa akong mga pagtuon sa Bibliya. Sa laing bahin, nakaamgo ako nga ang posibleng kamatayon, o labing menos taas nga sentensiya sa bilanggoan, naa sa unahan kon ipadayon ko ang akong paagi sa kinabuhi hangtod niadtong panahona. Busa human sa dako kaayong pamalandong ug tim-os nga pag-ampo, mihukom ako sa pagsubay sa dalan sa kamatuoran. Akong gipasimbolohan ang akong pahinungod kang Jehova nga Diyos pinaagig bawtismo sa tubig unom ka bulan sa ulahi, sa Abril 4, 1971.

Mga Balos Gumikan sa Pagminatarong

Sa dihang ako maghinumdom, usahay ako dag-on sa emosyon samtang ako maghunahuna sa mga panalangin nga akong natagamtam sukad sa paghimo sa akong desisyon nga biyaan ang kinabuhi sa krimen. Sa 11 ka tawong gisugdan ko sa pagtuon sulod niadtong unang pipila ka gubot nga mga semana, 5 ang nagasubay gihapon sa dalan sa kamatuoran. Ang akong inahan midawat usab ug pagtuon sa Bibliya ug nahimong bawtismadong Saksi, nga nagpadayon sa pag-alagad sa Diyos nga matinumanon hangtod nga siya namatay sa 1991. Ang akong duha ka manghod nga mga lalaki nagpahinungod sa ilang mga kinabuhi kang Jehova ug karon nag-alagad ingon nga mga ansiyano. Nakatabang usab ako sa akong iyaan sa pagkakat-on sa kamatuoran, ug siya nag-alagad sa bug-os panahon sa ministeryo sulod sa miaging 15 ka tuig.

Ang manedyer sa kompaniya sa tambal nga akong gitrabahoan nadasig kaayo sa mga kausaban sa akong kinabuhi nga siya misugod sa pag-isip nga mas ugdang sa kamatuoran sa Bibliya. Usa ka tuig human ako mabawtismohi, siya nagpasimbolo usab sa iyang pahinungod ngadto sa Diyos pinaagig bawtismo sa tubig. Sa ulahi siya nag-alagad nga usa ka ansiyano sa daghang tuig sa usa sa mga kongregasyon sa mga Saksi ni Jehova sa Pretoria.

Ako karon naminyo sa usa ka nakapahinungod nga Kristohanong igsoong babaye. Si Leonie ug ako milalin sa Australia niadtong 1978. Didto natawo ang among duha ka anak lalaki, si Elijah ug Paul. Ang pagdasig sa akong pamilya maoy dakong tinubdan sa kalig-on kanako. Ako may pribilehiyo sa pag-alagad nga usa ka ansiyano sa Canberra, ang kaulohan sa Australia. Kada adlaw ako nagpasalamat kang Jehova, kinsa nagluwas kanako gikan sa usa ka haguka nga kinabuhi sa krimen nga nagpadulong sa kaalaotan ug kamatayon. Labaw pa niana, iyang gihatagan ug kahulogan ang akong kinabuhi pinaagi sa pagtaganag tinuod nga paglaom alang nako ug sa akong mga minahal.

[Footnote]

[Hulagway sa panid 18]

Sa 12 anyos pa ako

[Hulagway sa panid 18]

Uban sa akong asawa ug duha ka anak lalaki karon