Sayo Kaayo o Ulahi Kaayo?

DAGHAN ang ginasulti karon bahin sa sinugdanan sa ika-21ng siglo ug sa ikatulong milenyo human sa pagkatawo ni Jesu-Kristo. Ang magasing Newsweek miingon nga “ang ika-20ng siglo, nga nagsugod ingon nga Siglo sa Bug-os nga Gubat ug nahimong Atomikong Panahon, daw nagkatapos ingon nga Panahon sa Kalingawan.” Sa isyu niining Enero 22, 1997, kini mitaho: “Ang mga hotel sa tibuok yuta kompletong nareserba” alang sa mga selebrasyon sa Bisperas sa Bag-ong Tuig, Disyembre 31, 1999.

Bisan pa niana, ang pipila ka tawo moingon nga ang mga selebrasyon nagakahitabo nga sayo kaayo. Gipunting nila nga kasukwahi sa pagtuo sa daghan, ang ika-21ng siglo ug ang bag-ong milenyo dili mosugod sa Enero 1, 2000, kondili sa Enero 1, 2001. Sanglit walay tuig 0, ang unang siglo nagsugod sa tuig 1 hangtod 100, ang ikaduhang siglo gikan sa 101 hangtod 200, ug padayon. Busa gipangatarongan nga ang ika-20ng siglo, nga nagsugod sa Enero 1, 1901, ug ang ikaduhang milenyo, nga nagsugod sa Enero 1, 1001, matapos lamang sa Disyembre 31, 2000.

Adunay laing punto nga pagatagdon. Ang atong kalendaryo nagbahin sa panahon pinasukad sa pagkahimong una o human sa pagkatawo ni Kristo. Ang mga eskolar karon nag-ila nga si Jesus natawo nga mas sayo kay sa gihunahuna sa nangagi, sa ingon nakapasayop sa puntong sukaranan sa kausaban diha sa kalendaryo. Ang mga opinyon naglainlain bahin sa kon kanus-a natawo si Jesus, apan ang kronolohiya sa Bibliya nagpunting sa tuig 2 W.K.P. Pinasukad sa maong pag-ihap, ang ikatulong milenyo human sa pagkatawo ni Kristo aktuwal nga nagsugod sa tinghunlak karong tuiga! Ang dugang impormasyon makaplagan diha sa mga isyu sa Pagmata! sa Mayo 22, 1997, sa panid 28, ug sa Disyembre 22, 1976, sa panid 27.a

Sa bisan unsang paagi, maalamong molikay sa pagpahayag nga dogmatiko nga ang ika-21ng siglo ug ang bag-ong milenyo magsugod na sa pipila na lang ka semana. Bisan pa niana, tungod sa popular nga mga hunahuna, gibati sa Pagmata! nga angayng hisgotan karong panahona ang ulohang “Ang Ika-20ng Siglo—Makuyaw nga Katuigan sa Kausaban.”

[Footnote]