Gikan sa Among mga Magbabasa
Kahupayan Alang sa Masakiton Ako maoy 22 anyos, ug ako nag-antos sa usa ka makaut-ot nga kanser sa halos tibuok kong kinabuhi. Nalingaw ako sa seryeng panghapin nga “Kahupayan Alang sa Masakiton.” (Enero 22, 2001) Pagkamakapahupay ang pagkahibalo nga si Jehova nakasabot sa mga pagbati sa kapakyasan ug kalagot nga nagpabug-at kanako! Akong nasabtan si William ug Rose Meiners ug ang paagi sa ilang pagdumala sa ilang kahimtang. Nahibalo si Jehova kon unsaon sa pagpalig-on niadtong nahigugma kaniya!
A.C.C., Chile
Mga Igpapalong sa Sunog Salamat sa artikulong “Sunog! Unsa nga Igpapalong ang Angay Nimong Gamiton?” (Enero 22, 2001) Palihog pagpadala ug 130 ka kopya niini nga isyu aron among ikaapod-apod kini sa matag usa sa among mga empleyado aron dad-on ngadto sa ilang pamilya.
D. F., Tinipong Bansa
Salamat sa inyong makugihong pagsulat niini nga artikulo. Walay laing 32-panid nga magasin nga nagtanyag ug daghang matang sa makatabang nga impormasyon. Apan, buot kong ipasiugda nga sa dihang kamo naghisgot bahin sa “uga nga polbos” nga igpapalong, nagtuo ako nga ang inyong gipasabot mao ang “uga nga kemikal” nga igpapalong. Ang uga nga polbos nga mga igpapalong, nga adunay dalag nga bituon nga may letrang D, mahimong gamiton lamang sa mga sunog gumikan sa metal, samtang ang uga nga kemikal nga mga igpapalong mahimong gamiton alang sa ABC o BC nga mga sunog.
J. H., Tinipong Bansa
Salamat sa katin-awan. Sa pipila ka nasod ang terminong “uga nga polbos nga mga igpapalong” naglakip sa nailhan sa Tinipong Bansa ingong uga nga kemikal nga mga igpapalong. Sanglit ang “Pagmata!” maoy usa ka internasyonal nga magasin, dili kalikayan nga ang panagkalahi sa terminolohiya motungha matag karon ug unya.—ED.
Bata pa Kaayo Aron Makigdeyt? Nalingaw gayod ako sa artikulong “Mga Batan-on Nangutana . . . Komosta Kon ang Akong mga Ginikanan Maghunahuna nga Bata pa Ako Kaayo Aron Makigdeyt?” (Enero 22, 2001) Ako maoy 17 anyos, ug nakahinapos ako nga ako dili pa andam nga magminyo o mobuhi ug usa ka sa pamilya. Kining artikuloha mitabang kanako sa paghunahuna pag-ayo sa dili pa makigdeyt ug sa paggamit usab sa panabot sa dihang ako makahukom na unya nga makigdeyt ug magminyo.
A.M.H., Tinipong Bansa
Kay 15 anyos lamang, ang pagpit-os sa pagpakigdeyt nga akong naagoman sa hayskul makapaluya gayod. Makapadasig ang pagkahibalo nga mabatonan ko ang kahupayan gikan sa Bibliya ug gikan sa kaubang mga Kristohanon. Nakatabang kini kanako sa pagpabiling lig-on sa akong baroganan!
L. M., Canada
Akong nasabtan ang kahimtang sa duha ka batan-on sa hulagway nga nagsultihanay diha sa telepono tungod kay akong nahanduraw ang akong kaugalingon nga mosangpot sa samang kahimtang. Kinahanglan kong putlon ang pagpakig-uban sa usa ka lalaki tungod kay nasayod ako nga ako dili pa andam makig-deyt. Ang mga artikulo nga sama niini nagdasig kanako nga barogan ang akong desisyon nga maghulat.
M.R.C., Tinipong Bansa
Ako maoy 14 anyos. Kining artikuloha nakatabang gayod kanako sa pagkaamgo kon unsa ka peligroso ang pagpakigdeyt sa akong pangedaron, tungod kay ako dili pa gayod andam nga magminyo. Ang artikulo nakatabang kanako sa pagkakita sa panginahanglan sa pag-ugmad sa akong relasyon uban kang Jehova karon mismo inay kay tinguhaon ang pagpakigtrato.
A. P., Canada
Maorag kining artikuloha gisulat alang gayod kanako. Abi nakog ang akong mga ginikanan estrikto ra kaayo kanako ug wala makasabot sa akong mga pagbati. Karon nasabtan ko na nga sila naghimo sa tanang maarangan sa pagtabang ug pagpanalipod kanako. Mahinamon ako nga naghulat sa pagbasa sa umaabot nga mga artikulo sa “Mga Batan-on Nangutana”!
H. E., Romania