Sa Dihang ang Ginagmayng mga Sayop Nahimong mga Katalagman
NIADTONG Hulyo 6, 1988, ang mga trabahante sa Piper Alpha nga makinaryang gigamit sa pagkuhag aseite didto sa lawod sa North Sea nag-ayo sa gas-condensate nga bomba apan wala nila mahuman ang trabaho. Tungod sa kakulang sa komunikasyon taliwala sa mga trabahante, ang bomba gipaandar sa mirelyebo nga grupo sa mga trabahante. Misugod ang sunog. Tungod kay ang mga trabahante didto man sa tumoy sa maong makinarya ug wala nay kaikyasan, 167 ka tawo ang nangamatay.
Dose ka tuig sa ulahi, sa Hulyo 25, 2000, usa ka supersonic nga ayroplanong Concorde ang misugod paglupad diha sa tugpahanan sa Charles de Gaulle Airport sa Paris, Pransiya. Sa nagkakusog na ang dagan sa ayroplano, usa ka gamayng tipaka sa titanium diha sa tugpahanan ang nakaingon sa pagbuto sa ligid nga, sa baylo, misiak sa tangke sa gasolina diha sa pako sa ayroplano. Ang gasolina miagos ngadto sa mga makina sa wala, mao nga wala na kini makaandar ug dihay 60-metros ka taas nga morag dila sa kalayo. Human sa mga duha ka minutos, ang ayroplano nadasmag ngadto sa usa ka hotel, nga nakapatay sa tanang pasahero maingon man sa pipila ka tawo diha sa ubos.
Sa pagpalandong sa maong mga aksidente, si James Chiles nag-ingon diha sa iyang librong Inviting Disaster—Lessons From the Edge of Technology: “Sa atong bag-ong kalibotan, nga gilibotan sa mga makina nga usahay dili na mapugngan, angay natong ilhon ang talagsaong kadaot nga ipahinabo karon sa ginagmayng mga sayop.” Sa pagsubli sa libro ni Chiles, ang mantalaang Science nag-ingon: “Makapahinam kaayo ang talagsaon, nagkakusog nga pag-uswag sa siyensiya ug teknolohiya latas sa miaging pipila ka gatos ka tuig. Kini nagpabati kanato nga dunay halos way-kinutobang posibilidad sa pagsabot ug pagmaniobra sa pisikal nga kalibotan. [Apan] walay katarongan sa paghunahuna nga mas menos ang atong sayop karon kay kaniadto.”
Mahitungod sa mas peligrosong mga teknolohiya, ang Science nag-ingon: “Bisan ang kinagamyang risgo [sa sayop] maoy dako na kaayo. Alang sa maong mga teknolohiya, atong iinsistir gayod ang kahingpitan.” Apan gipaila ba sa kasaysayan sa tawo nga mabatonan ang kahingpitan? Wala gayod! Busa ang nagkalainlaing mga katalagman tungod sa kasaypanan magpadayon gayod.
Apan dili kini magpadayon hangtod sa hangtod. Ang mahinadlokon-sa-Diyos nga mga tawo makalaom sa usa ka umaabot sa dihang wala nay mamatay tungod sa kapakyasan o mga limitasyon sa tawo. Ngano? Tungod kay ang Diyos, pinaagi sa iyang langitnong Gingharian nga kagamhanan, magwagtang sa tanang hinungdan sa kamatayon, kagul-anan, ug kasakit.—Mateo 6:9, 10; Pinadayag 21:3, 4.
[Picture Credit Line sa panid 31]
AP Photo/Toshihiko Sato