Mga Sugyot Gikan sa Eksperyensiyadong Tigbiyahe sa Kahanginan
GANAHAN gyod akong mobiyahe sa kahanginan sukad pa kaniadto. Dili lang kay mapasayon niini ang paspas nga pagbiyahe gikan sa usa ka dapit ngadto sa lain kondili magtugot usab kini sa usa sa pagtadlas sa kapanganoran sa dulom nga adlaw ug pagsaka ngadto sa dapit nga nahayagan sa adlaw. Nalingaw gayod ako sa pagbiyahe sa kahanginan sukad pa sa akong unang biyahe sa bata pa ako sa 1956. Tungod niining tumang kaikag nahimo akong propesyonal nga piloto, apan naggugol usab ako ug panahon ingong imbestigador sa mga aksidente sa ayroplano.
Unsa ka luwas ang pagbiyahe sa kahanginan? Ug unsang mga panagana ang angay nimong himoon sa dihang may kahigayonan kang mosakay ug ayroplano?
Paghimo sa Luwas nga Matang sa Pagbiyahe nga Mas Luwas
Kada tuig sa tibuok kalibotan, duolan sa 18,000 ka kompaniya sa ayroplano ang regular nga molanding ug molupad diha sa libolibong mga erport, samtang naghatod sa kapin sa 1.6 ka bilyong pasahero ngadto sa ilang mga destinasyon—kining tanan diyutay rag aksidente. Gani, ang Lloyd’s of London, ang iladong kompaniya sa insyurans, nagbanabana nga 25 ka pilo nga mas luwas ang pagbiyahe sa kahanginan kay sa awto. Nan sumala sa estadistika, ang labing peligrosong bahin sa imong panaw mao ang pagpaingon ug paggikan sa erport. Bisan pa niana, ang pipila ka makataronganong mga panagana sa dihang nagbiyahe sa kahanginan makatabang sa paghimo niining medyo luwas nga matang sa pagbiyahe nga mas luwas.
● Ayoha pagpili ang imong kompaniya sa ayroplano: Dili tanang kompaniya sa ayroplano ang dunay susamang rekord sa kahilwas. Kasagaran ang establisado nang mga kompaniya sa ayroplano mao ang dunay luwas nga mga ayroplano. Sila naggamit ug modernong mga ayroplano ug dunay maayong reputasyon tungod sa ilang rekord sa kahilwas ug pagmentinar.
● Maampingong pilia ang imong sinina: Ang mga nakalabang-buhi sa pagkahagsa sa ayroplano nag-atubang sa kapeligrohan sa sunog ug aso. Busa, ang pagsul-ob ug sinina nga tag-as ang bukton ug pagsul-ob ug karsones o taas nga sayal makapanalipod pag-ayo sa imong panit batok sa kalayo ug kainit. Ang sinina nga gama sa kinaiyanhong mga lanot maghatag ug maayong proteksiyon, apan ang artipisyal nga mga materyal kasagarang matunaw o mokulo ug mopilit sa panit sa dihang mainitan, nga lagmit magpahinabog mas grabeng pagkapaso. Ang sinina nga gama sa panit mahimong mokulo usab kon mainitan ug wala isugyot. Ang pagsul-ob ug daghang sapaw sa sinina maghatag ug mas maayong proteksiyon kay sa pagsul-ob ug usa lang, ug ang dili lugom nga mga kolor mas maayong mopabanda sa kainit kay sa lugom nga mga kolor. Ang walay takon nga mga sapatos, ilabina kanang may liston, mas lagmit nga dili matangtang ug manalipod kanimo gikan sa mga samad ug pagkapaso, ug ang delana nga mga medyas mas maayo kay sa artipisyal ug lanot.
● Pamati sa mga instruksiyon labot sa kahilwas: Ang mga flight attendant mohatag kanimog malukpanon nga instruksiyon labot sa kahilwas sa dili pa molarga. Sa dili-kasagarang mahitabo nga aksidente, basin kinahanglang mogawas ka sa ayroplano ginamit ang impormasyon nga imong nahinumdoman gikan sa maong mga instruksiyon. Busa pamati pag-ayo sa impormasyon. Ang usa ka surbi sa Canadianong mga tigbiyahe sa kahanginan nagpadayag nga 29 porsiyento lamang sa mga pasahero sa ayroplano ang mobasa o bisan mopasiplat na lang sa safety card. Paggahin ug panahon sa pagtuon sa mga instruksiyon alang sa kahilwas, ilabina kadtong nagpakita kon sa unsang paagi ablihan ang mga gawsanan, kay basin ug ikaw ang unang makaabot didto. Hunahunaa kon unsaon nimo pagpangita ang gawsanan kon ngitngit o kon dili ka makakita tungod sa aso. Ang usa ka yanong pamaagi mao ang pag-ihap sa laray sa mga lingkoranan tali kanimo ug sa mga gawsanan. Nan, bisag ngitngit, imong makita ug maablihan ang gawsanan panahon sa emerhensiya.
● Limitahe ang gidaghanon sa imong bitbitong bagahe: “Ang kanunayng mahitabo nga kapeligrohan [alang sa mga pasahero] bisan sa normal nga biyahe mao ang mga butang nga mangahulog gikan sa mga butanganan sa ibabaw sa lingkoranan nga wala masira pag-ayo o giablihan sa mga pasahero samtang naglupad ang ayroplano, nga nagpahinabog grabeng kadaot sa ulo ug bisan kamatayon,” nag-ingon ang mantalaang Flight International. Busa hinumdomi, ang bug-at nga bitbitong bagahe mahimong peligroso. Busa, panahon sa pagluwas sa kinabuhi, biyai ang TANAN nimong bagahe. Isentro ang pagtagad sa pagluwas sa imong kaugalingon! Ang imong bagahe mailisan ra sa ulahi.
Panahon sa Emerhensiya
Ang labing peligrosong paggawas sa ayroplano mao kanang dunay kalayo, aso, ug alisngaw. Ang usa ka taho bahin sa aksidente nag-ingon: “Sa dihang ang ayroplano milanding walay makita diha sa sulod sa kabina sa gitas-on nga usa ka piye ibabaw sa salog sa kabina [tungod sa aso]. Ang mga naluwas nag-ingon nga nawad-an silag umoy ug kapasidad sa panghunahuna aron makaabot sa mga gawsanan.” Ang kaluwasan nagdepende sa paggawas dayon sa ayroplano.
Ang mga tripulante gibansay sa pagtabang sa paggawas sa ayroplano sa dali ug hilwas nga paagi. Busa, tumana dayon ang ilang mga instruksiyon. Apan, ang mga butang dili kanunayng mahitabo sumala sa plano. Tungod sa mga problema sa mga sound system, pagkasamad sa mga tripulante, kalibog, ug mga epekto sa kasaba, kainit, ug aso, ang kinamaayohang mga paningkamot sa mga tripulante dili tingali mosaler. Ang kompaniya sa ayroplano nga imong gisakyan dili tingali makasulti sa imong lumad nga pinulongan, ug kini usab makapugong sa maayong komunikasyon tali kanimo ug sa mga tripulante.
Ang pag-analisar sa mga aksidente nagpakita nga ang imong kaugalingong determinasyon nga maluwas hinungdanon sa imong tsansa nga makalabang-buhi sa usa ka emerhensiya. Nagkinahanglan ka ug espesipikong plano sa kon unsay buhaton ug magmaandam sa pag-abaga sa responsabilidad alang sa imong kaugalingong kaluwasan. Ang imong plano angayng maglakip ni bisan kinsa nga kauban nimo sa biyahe, ilabina ang mga bata o mga tigulang, ug sa mga paagi nga magkauban kamo kanunay aron matabangan ang usag usa iniggawas sa ayroplano. Ang magasing Flying Safety nagsugyot: “Kon kinahanglan kamong mogawas agi sa aso, pagunita sila sa usag usa. Ang paggunit nila sa imong bakos mahimong makaluwas kanila.” Ingna ang imong kauban o mga kauban sa pagbiyahe kon unsay imong giplanong buhaton engkaso nga may emerhensiya.
Ang tanang matang sa pagbiyahe naglangkit ug usa ka kapeligrohan, apan ang modernong depasaherong mga ayroplano motabang kanato sa paglikay sa daghang kapeligrohan ug motugot kanato sa pag-abot sa atong destinasyon nga narepreskohan ug andam nga motrabaho o maglingawlingaw. Magmaandam apan dili mabalak-on. Relaks ug pagkalipay sa imong pagbiyahe sa kahanginan—ingon gayod niana ang akong gibati.—Tinampo.
[Hulagway sa panid 13]
Nagbansay alang sa emerhensiyang paggawas sa ayroplano
[Hulagway sa panid 13]
Pamati sa mga instruksiyon labot sa kahilwas