Mga Batan-on Nangutana . . .

Sa Unsang Paagi Ako Makahunong sa Pagpaningkamot nga Magmahingpit?

“Ang pagkamahingpiton maoy nagkontrolar sa akong kinabuhi.”​—Carly.

ANG pagkamahingpiton​—ang pagtuo nga ang usa kinahanglang bug-os magmahingpit sa tanang butang nga iyang ginahimo​—naghasol sa panghunahuna sa daghang batan-on.

Ang librong Perfectionism​—What’s Bad About Being Too Good? nag-ingon: “Adunay dakong kalainan tali sa makataronganong pagpanglimbasog nga mohawod ug sa dili-makataronganong pagpaningkamot nga kab-oton ang kahingpitan. Ang mga tawong maningkamot nga mohawod aduna tingaliy dakong panginahanglan sa kahapsay ug organisasyon ug taas nga mga panahom alang sa ilang kaugalingon, apan sila usab modawat sa ilang mga sayop ug dunay positibong mga paagi sa pagdumala sa ilang mga kasaypanan. . . . Sa laing bahin, ang mga tawong mahingpiton mabalak-on kanunay nga makahimog mga sayop. Sila dunay taas kaayong mga sukdanan.”

Naghubit ba kana kanimo? Kon ang imong mga sukdanan taas ra kaayo, dali ka rang mapugngan sa paghimo sa usa ka butang. Makaplagan tingali nimong maglikay ka na sa pagbuhat ug bisan unsang butang nga bag-o. O makiling ka nga dili dayonon paghimo ang hinungdanong mga butang tungod kay nahadlok kang mapakyas. Gusto pa gani tingali nimong isalikway si bisan kinsa nga wala makakab-ot sa imong mga sukdanan, ug makaplagan nimong wala ka nay higala.

Kon ang gihisgotan sa ibabaw naghubit kanimo, tagda ang giingon sa Bibliya diha sa Ecclesiastes 7:16: “Ayaw pagpalabi sa pagkamatarong, ni magpakita nga ikaw hilabihan ka maalamon. Nganong laglagon mo ang imong kaugalingon ?” Oo, ang usa ka tawong mahingpiton ‘makapahinabo ug kalaglagan’ sa iyang kaugalingon! Sa pagkatinuod, ang pagkamahingpiton gilangkit pa gani sa mga abnormalidad sa pagkaon sama sa anorexia nervosa ug bulimia nga magpameligro sa kinabuhi.a

Busa makapangutana ka tingali, ‘Sa unsang paagi ako makahunong sa pagpaningkamot nga magmahingpit?’ Sa pagkatinuod, lisod mausab ang panghunahuna sa usa ka tawo maylabot niini. Apan uban sa tabang sa Diyos, kini mahimo. Busa, atong susihon ang panglantaw sa Diyos bahin sa pagkamahingpiton.

Kahingpitan​—Makab-ot ba nga Tumong?

Una sa tanan, posible ba nga ikaw magmahingpit sa bug-os nga diwa? Dili sumala sa Bibliya, kay kini nag-ingon: “Walay tawo nga matarong, wala bisan usa . . . Ang tanang tawo misimang, silang tanan nahimong walay-kapuslanan.” (Roma 3:10-12) Makapukaw-sa-hunahuna nga mga pulong, dili ba? Nagpaila kana nga si bisan kinsa nga maningkamot nga mahimong hingpit sa bug-os mapakyas gayod.

Tagda si apostol Pablo, kinsa dayag nga usa ka talagsaong panig-ingnan sa espirituwalidad. Apan, bisan si Pablo dili makaalagad sa Diyos nga walay sayop. Siya miangkon: “Sa dihang buot nakong buhaton ang maayo, ang daotan ania kanako. Nahimuot gayod ako sa balaod sa Diyos sumala sa akong pagkatawo sa sulod, apan nakita ko sa akong mga sangkap ang laing balaod nga nakigbugno batok sa balaod sa akong hunahuna ug nagbihag kanako ngadto sa balaod sa sala nga ania sa akong mga sangkap.” (Roma 7:21-23) Uban lamang sa tabang sa Diyos nga si Pablo nahimong matinumanon nga Kristohanon.

Maayo na lang, ang Diyos wala mangayo o magdahom ug bug-os nga kahingpitan gikan kanatong tanan. “Siya nahibalo pag-ayo sa atong pagkaumol, nga nahinumdom nga kita abog.” (Salmo 103:14) Sa bag-ong kalibotan lamang sa Diyos nga ang mga tawo sa kataposan makakab-ot sa kahingpitan.

Usba ang Imong mga Panahom

Nan, sa pagkakaron, dili realistikanhon ang paghunahuna nga ikaw mahimong hingpit sa bug-os. Sa pagkatinuod, angay mong dahomon nga makahimo kag mga sayop matag karon ug unya. (Roma 3:23) Usahay, dili gani nato mamatikdan ang atong mga sayop! Ang Salmo 19:12 nag-ingon: “Walay usa nga makakita sa kaugalingon niyang mga sayop.” (Today’s English Version) Ang usa ka batan-on nga ginganlag Matthew nagpahayag sa maong teksto niining paagiha: “Ikaw dili hingpit​—walay tawong hingpit dinhi sa Yuta. Kon nagdahom kag kahingpitan sa imong kaugalingon, dili ka gayod magmalipayon. . . . Kana dili realistikanhon, kana dili posible.”

Samtang naghunahuna niana, nganong dili mo sulayan ang pag-usab sa imong mga panahom? Pananglitan, naningkamot ka ba pag-ayo aron mahimong kinamaayohan sa usa ka butang? Gipaila sa Bibliya nga ang maong makahago nga paningkamot, sa pagkatinuod, mapamatud-ang “kakawangan ug usa ka paggukod sa hangin.” (Ecclesiastes 4:4) Ang tinuod mao nga pipila lang ang nahimong kinamaayohan. Ug bisan pag duna nay kinamaayohan, kasagaran dili kana magdugay ug ngadtongadto may motungha na usab nga mas maayo pa.

Si apostol Pablo nagtambag: “Ako magasulti sa tanan dinha sa inyong taliwala nga dili maghunahuna ug labaw bahin sa iyang kaugalingon kay sa angay nga hunahunaon; kondili maghunahuna sa paagi nga makabaton sa maayong panghunahuna.” (Roma 12:3) Magmarealistiko! Usba ang imong mga panahom aron kini magbanaag sa imong mga katakos ug mga limitasyon. Paningkamoting mabuhat ang labing maayo, apan ayaw paningkamoti nga mahingpit. Paghimog espesipiko apan makab-ot nga tumong.

Pananglitan, gidasig ni Pablo si Timoteo nga mahimong “usa ka mamumuo nga walay angayng ikaulaw, nga nagagamit sa pulong sa kamatuoran sa hustong paagi.” (2 Timoteo 2:15) Oo, si Pablo nagdasig sa pagbuhat sa labing maayo, apan dili sa pagkahingpit. Sa samang paagi, paghimog makataronganong mga tumong alang sa imong kaugalingon. Ug kon wala ka makaseguro kon unsay giisip nga “makataronganon,” pakigsulti sa imong mga ginikanan o laing hamtong nga imong gisaligan.

Ang uban nagrekomendar pa gani nga sulayan ang pagbuhat sa pipila ka butang nga dili ka batid sa paghimo, sama sa pagdula ug usa ka bag-ong esport o pagtugtog ug instrumento sa musika. Tinuod, samtang nagtuon ka pagbuhat sa usa ka bag-ong butang, makahimo ka ug daghang sayop. Apan wala ra nay kaso. Tingali makatabang kana kanimo sa pagsabot nga ang paghimog mga sayop maoy bahin lamang sa proseso sa pagkat-on.

Bisag unsay imong paningkamotan nga himoon​—pagsulat ba kaha ug usa ka report sa eskuylahan o pagkahimong batid sa pagtugtog sa usa ka awit diha sa piano​—tagda ang lain pang tambag gikan kang apostol Pablo: “Ayaw paglangaylangay sa [imong] buluhaton.” (Roma 12:11) Oo, ayaw paglangaylangay sa paghimo sa mga butang tungod lang kay nahadlok kang mapakyas.

May usa ka batan-on nga nagbatasan sa paglangaylangay sa iyang mga proyekto sa eskuylahan pinaagi sa pagpasumangil nga siya “nag-organisar sa iyang kaugalingon.” Bisan pag maayo ang personal nga organisasyon, magbantay nga dili kana mahimong pasangil nga maglangaylangay. Naamgohan sa maong batan-ong babaye nga “kon papilion tali sa paghatag sa usa ka sinulat nga proyekto sa eskuylahan nga wala gayod makatagbaw kanimo ug sa dili gayod paghatag ug usa ka proyekto, ang mas maayong kapilian mao ang paghatag kanunay ug usa ka proyekto.”

Wagtanga ang Makapaluya-sa-Kaugalingon nga mga Hunahuna!

Sa pagkatinuod, dili gayod sayon buhaton ang trabaho nga dili hingpit. Ang hinawayon ug negatibo nga mga hunahuna mahimong maghasol gihapon kanimo. Unsay imong mahimo? Ang tinuod mao nga ang paghambin kanunay ug negatibong mga hunahuna makadaot ug makapaluya sa kaugalingon. Busa, paningkamot pag-ayo nga mawagtang sa imong alimpatakan ang dili-makataronganong mga hunahuna bahin sa imong kaugalingon. Kataw-i ang imong mga sayop. Kon buot hunahunaon, adunay “panahon sa pagkatawa.” (Ecclesiastes 3:4) Hinumdomi usab nga si Jehova dili mouyon sa maabusohong sinultihan​—bisan pag itumong nato kini sa atong kaugalingon.​—Efeso 4:31.

Imbes kanunayng mayugot sa imong kaugalingon, ipadapat ang mga pulong sa Proverbio 11:17: “Ang tawo nga may mahigugmaong-kalulot nagabuhat ug maayo sa iyang kalag, apan ang tawo nga mabangis nagadalag pagkasinalikway sa iyang kaugalingong unod.” Busa tagda kining pangutanaha, Ang paghupot bag hilabihan ka taas nga mga sukdanan magpasayon kanimo sa pagbaton ug mga higala? Malagmit dili. Malagmit gisalikway pa gani nimo ang mga tawo tungod kay sila dili hingpit. Busa, unsay imong mahimo?

Ipadapat ang sugo sa Bibliya: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain.” (Colosas 3:13) Oo, pinaagi sa pagkahimong mas makataronganon maylabot sa imong gidahom sa uban, mas dakog kalagmitan nga matagamtam nimo ang mga panaghigalaay!

Makahunahuna ka tingali, ‘Nganong gusto man kong likayan sa mga tawo tungod sa akong pagkamahingpiton?’ Buweno, tagda ang mahimong epekto ngadto sa uban kon imong ipahayag nga ikaw taas ug panahom sa imong kaugalingon. Ang librong When Perfect Isn’t Good Enough nag-ingon: “Ang sobrang pagreklamo sa dihang makadawat kag dili-kaayo taas nga grado sa usa ka pasulit mahimong makainsulto sa mga higala kinsa naningkamot nga makakuha ug grado nga dili kaayo taas.” Busa ugmara ang tinamdan nga dili sobra ka negatibo ug dili sobra ka mahunahunaon sa kaugalingon. Mas ganahang makig-uban nimo ang mga tawo.

Ang batan-on nga si Carly nagsumaryo niining tanan sa dihang siya miingon: “Una sa tanan, kinahanglan mohunong na ako sa pagkahimong mahingpiton.” Unsaon nimo paghimo kana? Palandonga ang panghunahuna sa Diyos sa maong mga butang. Kon nalisdan ka gihapon sa pagkontrolar sa imong panghunahuna mahitungod niini, pakigsulti sa imong mga ginikanan o sa usa ka hamtong nga Kristohanon sa inyong kongregasyon. Pag-ampo sa Diyos ug hangyoa siya nga tabangan ka sa pag-usab sa imong panghunahuna. Ang pag-ampo mahimong usa ka gamhanang tabang sa pagbuntog sa pagkamahingpiton.​—Salmo 55:22; Filipos 4:​6, 7.

Hinumdomi kanunay nga si Jehova wala mangayog kahingpitan; siya nagdahom lamang nga kita magmatinumanon kaniya. (1 Corinto 4:2) Kon naningkamot ka sa pagkahimong matinumanon, magmalipayon ka gayod sa imong kaugalingon​—bisan pag ikaw dili hingpit.

[Footnote]

[Hulagway sa panid 17]

Tungod sa kahadlok nga mapakyas hayan mapugngan ka sa paghimo sa usa ka butang

[Hulagway sa panid 18]

Ang pagsulay sa pagkat-on ug bag-ong mga butang makatabang kanimo sa pagsagubang kon masayop ka