Gikan sa Among mga Magbabasa
Unsa Nay Nahitabo sa Gugma? (Marso 2006) Ang kalibotan nagtuis sa kahulogan sa gugma, ug gusto ni Satanas nga daoton kana sa bug-os. Ang mga impormasyon nga sama niini motabang kanamo sa pagpahayag sa gugma diha sa buhat sa dili-mahakogong paagi. Salamat kay miuswag ang akong pagsabot kon sa unsang paagi gusto ni Jehova nga gamiton namo kining maong gamhanang puwersa.
Y. B., Tinipong Bansa
Naguol ko sa dihang ang akong duha ka suod kaayong mga higala mibalhin aron moalagad sa langyawg-pinulongan nga kongregasyon. Apan, sa grabe na ang akong kaguol, akong nadawat kining magasina. Salamat sa pahinumdom nga, “Kon buot ka nga higugmaon, pagpakita ug gugma ngadto sa uban.” Sukad karon, buot nakong “magpasangkad” ug magpakitag kinasingkasing nga gugma aron makabaton akog bag-ong mga higala.—2 Corinto 6:12, 13.
M. T., Japan
Pagkatigulang—Pagsagubang sa mga Suliran (Pebrero 2006) Usahay mobati ako nga nakalimtan na ang mga tigulang. Karon, 11 ka tuig na kong nag-atiman sa akong bana nga gilaygay sa sakit. Maguol gihapon ko usahay. Sigean nakog basa ang mga artikulo niini nga Pagmata! ug makadaghan usab nakong paminawon kini diha sa audiocassette. Kining magasina mao gayod ang akong gikinahanglan. Daghan kaayong salamat.
S. T., Japan
Artipisyal nga Kamot ug Tiil (Pebrero 2006) Salamat kaayo sa inyong artikulo bahin sa artipisyal nga kamot ug tiil. Sa dihang upat ka bulan ang akong tiyan, giingnan mi nga ang among anak matawo nga walay kamot ug tiil ug mahimo kining taoran ug artipisyal nga tiil pag-edad niinig usa ka tuig. Ang artikulo miabot sa bulan mismo nga nag-edad si Daryl ug usa ka tuig. Siya karon nagtuon na sa pagtindog ug paglakaw. Kami sa akong bana naglantaw sa umaabot nga masinati ang kalipay sa dihang si Daryl “mosaka ingon sa laking osa.”—Isaias 35:6.
Y. A., Pransiya
May Kapuslanan ang Kinabuhi (Oktubre 22, 2001) Gibalikbalik nakog basa ang Pagmata! sa Oktubre 22, 2001, ilabina sa dihang mobati kog kaluya. Para nako morag tambal ang maong impormasyon, apan dili sama sa tambal, kini dili mohupas. Makatabang gayod ang gihatag nga mga tambag ug solusyon sa among mga problema. Ang Pagmata! nagpalig-on kanako, nga nagpabati kanako nga nagtagad kamo sa mga tawo nga sama kanako. Ako malipayon ug mapasalamaton kaayo kay anaa kamo nga nagpahinumdom kanako nga “may kapuslanan ang kinabuhi”!
P. T., Madagascar
Ang Mga Peregrino ug Mga Puritano—Kinsa Sila? (Pebrero 2006) Nakurat ko sa dili tukma nga pagpresentar sa mga impormasyon niining artikuloha. Adunay paninugdang hinungdan kon nganong wala magsaulog ug Thanksgiving ang mga Indian sa Amerika del Norte, ug gituyo ninyo nga dili iapil ang negatibong impormasyon bahin sa maong ulohan.
Ngalan wala ibutyag, Tinipong Bansa
Ang “Pagmata!” nagtubag: Palihog matikdi nga ang katuyoan niining artikuloha dili ang detalyadong paghisgot sa kasaysayan sa Thanksgiving Day. Daghang reperensiya, lakip na ang “Encyclopædia Britannica,” nagtaho nga sa tinghunlak sa 1621, ang mga Peregrino nagsaulog niini sulod sa tulo ka adlaw uban sa ilang mga higala nga Indian. Kini gihubit diha sa sulat ni Edward Winslow, nga pinetsahan ug Disyembre 11, 1621. Apan, sa misunod nga mga tuig, ang pangilin sa pagpasalamat gihimo aron saulogon ang tanang matang sa kalihokan gawas sa pagpangani. Ang kinangil-arang “pagpasalamat” mao kadtong giproklamar niadtong 1637 ni Gobernador John Winthrop sa Massachusetts Bay Colony human gimasaker ang ginatos ka Pequot Indian. Busa, among nasabtan kon nganong wala makaangay ang pipila ka magbabasa sa Thanksgiving Day.