Pagiya sa Diyos Aron Matagamtam ang “Tinuod nga Kinabuhi”
ANG usa ka maayong hiyas sa usa ka giya mao ang pagkakasaligan. Kadtong nakaila kang Jehova, ang Awtor sa Bibliya, nagtuo gayod nga siya ang labing kasaligang persona sa tanan. Siya ‘dili gayod mamakak.’ (Tito 1:2; 2 Timoteo 3:16) Si Josue nga mahinadlokon sa Diyos, kinsa nangulo sa Israel paingon sa Yutang Saad, nagpamatuod nga kasaligan si Jehova. Sa iyang pagpakigpulong sa katawhan, siya miingon: ‘Kamo nahibalo gayod sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo ang napakyas. Kining tanan natuman alang kaninyo. Walay usa ka pulong niini ang napakyas.’—Josue 23:14.
Sukad sa panahon ni Josue, daghan na kaayong tagna sa Bibliya ang nangatuman. Tungod niini, kita may lig-ong katarongan sa pagtuo nga matuman gayod ang uban pang mga tagna. Daghan niining mga tagnaa maoy bahin sa katuyoan sa Diyos alang sa yuta ug sa matinumanong katawhan.
Pahimuslan ba Nimo ang Giya sa Diyos?
Buot sa mahigugmaong Diyos nga si Jehova nga kita magmalipayon karon ug hangtod sa hangtod. (Juan 17:3; 1 Juan 4:8) Oo, gusto ni Jehova nga makatagamtam kita ug “tinuod nga kinabuhi,” kinabuhi nga walay kataposan. (1 Timoteo 6:12, 19) Tungod niini, kapin sa sayis milyones ka Saksi ni Jehova ang malipayong nagpaambit sa “maayong balita sa gingharian” ngadto sa ilang mga isigkatawo agig pagtuman sa sugo sa Diyos. (Mateo 24:14) Sa pagkakaron, kini nga mensahe ilang gipaambit ngadto sa 235 ka nasod—sa halos tanang nasod sa yuta!
Ang Gingharian sa Diyos maoy usa ka kagamhanan sa langit nga pagamandoan ni Jesu-Kristo. (Daniel 7:13, 14; Pinadayag 11:15) Ilalom sa iyang pagmando iyang laglagon ang tanang daotan—kadtong dili magpasakop sa matarong nga mga sukdanan ni Jehova. (Salmo 37:10; 92:7) Human niana, ang tibuok yuta “mapuno sa kahibalo [bahin] kang Jehova ingon sa katubigan nga nagtabon sa dagat mismo.”—Isaias 11:9.
Handurawa ang kalinaw ug panaghiusa nga matagamtam unya sa dihang ang tanang tawo sa yuta magsimba na sa Diyos “sa espiritu ug kamatuoran” ug malipayong magpasakop sa iyang mahigugmaong pagtultol ug hingpit nga mga sukdanan! (Juan 4:24) Sa kataposan, matagamtam na sa tawo ang “tinuod nga kinabuhi” nga gisaad sa Diyos!
Apan, sama sa gitagna, pipila lang ang modawat sa giya sa Diyos ug makabaton ug kinabuhing dayon. (Mateo 7:13, 14) Gusto ka bang malakip kanila? Kon mao, ang mga Saksi ni Jehova nagdapit kanimo sa pagtuon sa Bibliya ug sa pagpadapat sa tambag sa Diyos. Kon mosanong ka niini, imong makita mismo kon unsa ka maayo si Jehova. (Salmo 34:8) Sama nga gigiyahan sa kinaiyahan ang mga langgam ngadto sa ilang destinasyon, pagagiyahan usab ni Jehova ang mga maunongon kaniya ngadto sa kinabuhi sa Paraiso.—Lucas 23:43.
[Hulagway sa panid 8 9]
“Malipayon ang mga malumog-buot, sanglit sila magapanunod sa yuta.”—MATEO 5:5
“Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”—SALMO 37:11
“Ang tolda sa Diyos anaa uban sa mga tawo . . . Ug iyang pagapahiran ang tanang luha gikan sa ilang mga mata, ug ang kamatayon mawala na.”—PINADAYAG 21:3, 4
“Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.”—PROVERBIO 2:21, 22