Paagi 5
Pagtakda ug Pagsunod ug Regular nga mga Rutina
Nganong hinungdanon kini? Ang mga rutina dakog bahin sa kinabuhi sa mga hamtong. Ang pagtrabaho, pagsimba, ug bisan paglingaw-lingaw maoy usa na ka rutina. Ang mga ginikanan dili makatabang sa ilang mga anak kon dili nila tudloan sila sa pagplano sa ilang panahon ug sa pagsunod ug eskedyul. Sa laing bahin, “ang mga pagpanukiduki nagpakita nga ang pagkaadunay mga balaod sa panimalay mopabati sa bata nga luwas ug may kompiyansa ug makatudlo sa bata sa pagpugong ug pagsalig sa kaugalingon,” miingon si Dr. Laurence Steinberg, nga propesor sa sikolohiya.
Ang problema: Daghan kaayo kita ug alatubangon sa kinabuhi. Daghang ginikanan naggugol ug daghang oras sa trabaho, busa wala kaayo silay panahon sa ilang mga anak. Ang pagtakda ug pagsunod ug regular nga mga rutina nagkinahanglag disiplina ug determinasyon aron sa sinugdanan pa lang matul-id na ang iyang pagsuki sa pagsunod sa mga rutina.
Ang solusyon: Ipadapat ang prinsipyo sa Bibliya nga “himoa ang tanang butang nga may kahapsay ug pinaagig kahikayan.” (1 Corinto 14:40) Pananglitan, samtang gagmay pa ang mga bata, daghang ginikanan nagtakda ug tino, regular nga oras sa pagkatulog. Apan, ang mga oras sa pagkatulog angayng himoong tawhay. Si Tatiana, nga nagpuyo sa Gresya ug inahan sa duha ka batang babaye, miingon: “Sa dihang ako nang patulogon ang mga bata, ako silang hapohapon ug dayon ako silang sultihan kon unsay akong gihimo samtang didto sila sa eskuylahan. Unya ako silang pangutan-on kon gusto ba nilang isulti kanako kon unsay ilang gihimo nianang adlawa. Sila marelaks. Sagad sila malipay sa pagpadayag kanako sa ilang gihimo ug sa ilang gibati.”
Si Kostas, nga bana ni Tatiana, magbasa kanila ug mga sugilanon. “Sila mokomento bahin sa sugilanon,” siya miingon, “ug kasagaran ang among panag-estoryahanay mapadpad ngadto sa ilang mga problema. Dili gayod mosaler kon mangutana lang ko nila kon unsay nakapabalaka kanila.” Siyempre, sa magkadako na ang mga bata, mahimong imong ipaangay ang oras sa ilang pagkatulog. Apan kon imong sundon kini nga rutina, mahimong pahimuslan sa imong mga anak kining panahona sa pagpakigsulti kanimo.
Dugang pa, maayong batasanon sa mga pamilya ang pagdungan ug pangaon bisag kas-a sa usa ka adlaw. Aron mabatasan kini, ang panahon sa pagpangaon mahimong dili iuntop sa oras. “Usahay malangan ako pag-abot gikan sa trabaho,” matod pa ni Charles, nga amahan sa duha ka batang babaye. “Patimo-timoon una sila sa akong asawa aron dili sila magutman, apan iyang pahulaton gayod ang tanan hangtod nga magkadungan kami sa pagpangaon. Among estoryahan ang among gihimo nianang adlawa, lakip ang usa ka teksto sa Bibliya, mga problema, ug mag-estoryahay usab kami ug kataw-anang mga estorya. Makaingon gayod ako nga nakatabang kinig dako sa paghimo sa among pamilya nga malipayon.”
Aron mahimong eksperto niini, ayaw itugot nga ang pagpangagpas ug materyal nga mga butang mauna kay sa mga kalihokan sa pamilya. Ipadapat ang tambag sa Bibliya nga ‘tinoa ang mas hinungdanong mga butang.’—Filipos 1:10.
Unsa pay mahimo sa mga ginikanan aron may maayong komunikasyon sila sa ilang mga anak?
[Blurb sa panid 7]
“Himoa ang tanang butang nga may kahapsay ug pinaagig kahikayan.”—1 Corinto 14:40