Pagpaniid sa Kalibotan — Watchtower ONLINE NGA LIBRARYA

Pagpaniid sa Kalibotan

◼ Ang kompleto nga Bag-ong Kalibotang Hubad sa Balaang Kasulatan mabatonan sa 43 ka pinulongan ug sa 3 ka hubad nga Braille (para sa buta); ang Bag-ong Kalibotang Hubad sa Kristohanon Gregong Kasulatan mabatonan sa 18 ka pinulongan ug 1 ka hubad nga Braille. Kutob niadtong Hulyo 2007, diha nay 143,458,577 ka kopya nga naimprenta.

◼ Ang labing karaan nga teksto sa Bibliya nga naglungtad mao kanang gitawag nga Mga Panghinaot sa Saserdote diha sa Numeros 6:24-26. Kini nakulit diha sa duha ka anting-anting nga plata nga gilukot, nga gikan pa sa ulahing bahin sa ikapito o sayong bahin sa ikaunom nga siglo W.K.P.—BIBLICAL ARCHAEOLOGY REVIEW, U.S.A.

◼ Kutob niadtong Disyembre 31, 2006, labing menos usa ka basahon sa Bibliya ang naimprenta na diha sa 2,426 ka pinulongan—labaw ug 23 kay sa miaging tuig.—UNITED BIBLE SOCIETIES, BRITANYA.

◼ Mga 28 porsiyento sa mga Amerikano nagtamod sa Bibliya ingong “aktuwal nga pulong sa Diyos . . . nga angayng sabtong literal,” 49 porsiyento nagtamod niini nga “inspiradong pulong sa Diyos apan dili tanan niini angayng sabtong literal,” ug 19 porsiyento nagtamod niini ingong “basahon sa mga estorya.”—GALLUP NEWS SERVICE, U.S.A.

Labing Karaang Ininsek nga Bibliya?

“Ang labing karaang rekord bahin sa Ininsek nga hubad sa Hebreohanong Bibliya makita diha sa stone stele [wala] nga gikan pa sa 781 KP,” miingon ang eskolar nga si Yiyi Chen, sa Peking University. Ang bato, nga gipatindog sa Nestoryanhong mga Kristiyano, nakalotan diha sa siyudad sa Xi’an sa 1625. “Ang Ininsek nga ngalan sa bato gihubad ingong ‘ang Monyumento sa Pagpakaylap diha sa Tsina sa Makapalamdag nga Relihiyon gikan sa Daqin’ (. . . ang Daqin maoy Ininsek nga termino sa Imperyo sa Roma),” miingon si Chen. “Makita diha sa bato ang Ininsek nga mga sinulat sama sa ‘tinuod nga basahon sa Kasulatan’ ug ‘paghubad sa Bibliya.’”

[Picture Credit Line sa panid 30]

Bahandi Gikan sa Kalamakan

Niadtong 2006, nakalotan sa mga trabahante diha sa kalamakan sa Ireland ang usa ka basahon sa Salmo, nga gituohang gikan pa sa ikawalong siglo K.P. Ang Latin nga manuskrito, nga usa sa nahibilin nga mga manuskrito sa maong panahon, giisip nga usa ka bahandi. Ang mga 100 ka panid nga gama sa panit sa karnero, nga orihinal pa ang hapin, primera klase. “Ang nabiling banig-banig nga giputos niini ug ang panit nga bag nga gisudlan niini nagpakita nga gituyo kini pagtago aron dili madala sa mga Viking nga miatake 1,200 na ka tuig ang milabay,” matod sa The Times sa London. Bisan tuod nagkadikit-dikit ug medyo nadunot na ang mga panid, ang mga eksperto nagtuo nga ila kining mabulag-bulag ug mapreserbar.

Libolibong Karaang mga Butang Nakalotan

Matod sa report, ang mga arkeologo nakakitag libolibong karaang mga butang sa kinalot nga yuta gikan sa templo sa Jerusalem nga una pa sa panahon sa mga Israelinhon hangtod sa modernong panahon. Usa niini mao ang usa ka matang sa ulo-ulo sa pana nga gigamit sa mga sundalo ni Nabucodonosor, nga maoy naggun-ob sa unang templo sa mga Hudiyo nianang lugara. Ang labing talagsaon nga nakita mao ang timbre nga kulonon, nga gikan pa sa ikapito o ikaunom nga siglo W.K.P., nga dunay Hebreohanong ngalan nga Gedalyahu Ben Immer Ha-Cohen. Sumala sa arkeologo nga si Gabriel Barkai, ang tag-iya niini “tingali igsoon ni Pashur Ben Immer nga gihisgotan sa Bibliya [Jeremias 20:1] ingong saserdote ug opisyal sa templo.”