Dumalahag Maayo ang Imong Kuwarta

ANG panultihon nga “Ang salapi mao ang gamot sa tanang pagkadaotan” gituohan nga gikan sa Bibliya. Apan kini ang giingon sa Bibliya: “Ang pagkamahigugmaon sa salapi mao ang gamot sa tanang pagkadaotan.” (1 Timoteo 6:10, King James Version) Ang ubang mga tawo mahigugmaon kaayog kuwarta ug sila nangagpas pag-ayo aron makabaton ug daghan niini. Ang uban nahimong mga ulipon sa kuwarta nga nakahatag kanila ug dagkong mga problema. Apan kon maayo kang modumalag kuwarta, ang kuwarta mapuslanon. Ang Bibliya nag-ingon nga “ang kuwarta makasulbad ug daghang problema.”​—Ecclesiastes 10:19, Holy Bible​—Easy-to-Read Version.

Bisan pag ang Bibliya wala mangangkon nga usa ka libro bahin sa panalapi, kini dunay praktikal nga tambag nga makatabang kanimo sa pagdumala sa imong kuwarta. Ang mosunod nga lima ka paagi maoy gisugyot sa mga magtatambag kon unsaon pagdumala sa kuwarta, ug kini nahiuyon sa mga prinsipyo sa Bibliya nga narekord sa dugay na kaayong panahon.

Pagtigom. Ang rekord sa Bibliya nagpakita nga ang mga Israelinhon sa kanhiayng panahon gitudloan nga mapuslanon ang pagtigom ug kuwarta. Gisugo sila sa paggahin ug ikapulo sa ilang kita matag tuig nga gamiton alang lang gayod sa pagtambong ug mga pista sa nasod. (Deuteronomio 14:22-27) Gidasig usab ni apostol Pablo ang unang mga Kristohanon sa pagtigom matag semana aron duna silay ikahatag sa ilang isigkamagtutuo nga nanginahanglan. (1 Corinto 16:1, 2) Kadaghanan sa magtatambag bahin sa kuwarta nagdasig sa pagtigom ug kuwarta. Kinahanglan gayod kining hatagag importansiya. Inigsuweldo nimo, pagdeposito dayon ug kuwarta sa bangko o pagtipig ug kantidad nga buot nimong tigomon. Kon himoon nimo kini dili ka matental sa paggasto niining kuwartaha.

Pagbadyet. Kini lang ang praktikal nga paagi sa pagsubay, pagkontrolar, o pagpamenos sa imong paggasto. Ang maayong pagbadyet makatabang kanimo sa pagsubay kon diin mipaingon ang imong kuwarta, ug kini makatabang kanimo sa pagdumala niini. Klaroha kon pilay imong kita, ug ayaw paggasto ug sobra niana. Sayra kon unsa gayoy imong gikinahanglan. Maylabot niini, maalamong giawhag ni Jesus ang iyang mga mamiminaw sa ‘pagkuwenta sa gasto’ sa dili pa magsugod ug bisan unsang proyekto. (Lucas 14:28) Ang Bibliya nagtambag kanato sa paglikay sa wala kinahanglanang pagpangutang.​—Proverbio 22:7.

Pagplano. Hunahunaag maayo ang imong umaabot nga mga panginahanglan. Pananglitan, kon nagplano kang mopalit ug balay o apartment, ang pagpangutang para ibayad sa paliton nga propiedad nga dili kaayo dakog interes tingali maayong desisyon. Sa susama, ang ulo sa pamilya tingali gustong magkuhag lainlaing insyurans para sa kasegurohan sa iyang pamilya. Tagda usab ang imong mga panginahanglan sa umaabot inigretiro nimo. Ang Proverbio 21:5 nagpahinumdom kanato nga “ang mga plano sa kugihan mosangpot gayod sa kaayohan.”

Pagkat-on. Pagkat-on ug mga kahanas ug ampingi ang imong pisikal ug emosyonal nga kahimsog. Mapuslan ra unya nimo kini sa umaabot. Batasana ang pagkat-on. Gihatagag importansiya sa Bibliya ang “praktikal nga kaalam ug ang katakos sa panghunahuna,” ug kini nag-awhag kanato sa pag-ugmad niini.​—Proverbio 3:21, 22; Ecclesiastes 10:10.

Magmatimbang. Ibutang sa lugar ang kuwarta. Daghan ang nag-ingon nga mas malipayon kadtong mahunahunaon sa tawo kay sa kuwarta. Apan ang uban nagpadala sa kahakog. Sa unsang paagi? Human makabaton sa ilang pangunang mga panginahanglan, sila mangagpas nga madato. Gawas sa pagkaon, sapot, ug puy-anan, duna pa bay gikinahanglan ang tawo? Dili ikatingala nga ang magsusulat sa Bibliya nga gikutlo sa sinugdanan niini nga artikulo misulat usab: “Kon kita adunay makaon ug ikabesti, kita magmakontento na niining mga butanga.” (1 Timoteo 6:8) Ang pagkakontento makapugong kanato sa pagkahimong mahigugmaon sa salapi ug makatabang kanato sa paglikay sa tanang problema nga moresulta tungod niini.

Sa pagkatinuod ang paghigugma sa salapi mao gayod ang gamot sa tanang pagkadaotan. Ang kuwarta mahimong imong agalon kon magpaulipon ka niini. Apan kon ayohon nimog dumala ang kuwarta, mahatagan nimo ug pagtagad ang mas importanteng mga butang, sama sa pagpakigsuod sa imong pamilya, mga higala, ug sa Diyos. Bisan pa niana, niining kalibotana daw imposibleng dili kita magkaproblema ug kuwarta. Kuwarta ba kanunay ang hinungdan sa mga kabalaka? Duna bay paglaom nga matapos ang kawalad-on? Kini tubagon sa kataposang artikulo niini nga seryal.