Makapatungha ba Gayod ug Kalinaw ang Relihiyon?

“HIMOON nato ang kalibotan nga mas maayong dapit. Wagtangon nato ang relihiyon.” Mao kanay giawhag sa Dutch nga pilosopong si Floris van den Berg diha sa iyang gipatik nga lektyur nga nag-ulohang “Kon sa Unsang Paagi Wagtangon ang Relihiyon, ug Ngano.” Sa tibuok kalibotan, ang mga eksperto sa lainlaing natad sa pagtuon nag-awhag usab nga wagtangon ang relihiyon.

“Ang kalibotan kinahanglang mahigmata kay dugay na kining giurom tungod sa relihiyosong mga pagtulon-an,” miingon ang mananaog ug Nobel ug physicist nga si Steven Weinberg. Sa di pa dugayng katuigan, daghan ang nagduso sa ideya nga ang pagkadaotan sa kalibotan mamenosan pag-ayo kon wad-on ang relihiyon. Ang kontra-relihiyon nga mga basahon midagsang ug nahimong popular.

Ang inilang mga siyentipiko nagtigom aron hisgotan ang gituohan nila nga dinaliang panginahanglan nga wagtangon ang relihiyon. Nagkadaghan ang mga ateyista nga nagpadayag diha sa media sa ilang pagdumot sa relihiyon. Husto ba kining tinahod nga mga tawo sa ilang gihunahuna?

Duna bay Matuod nga Relihiyon?

Kon bakak ang tanang relihiyon ug walay Diyos, daw makataronganon nga wad-on ang relihiyon. Apan unsa kaha kon dunay Diyos? Unsa kaha kon dunay grupo sa mga tawo nga tinuod nga naghawas sa Diyos—usa ka matuod nga relihiyon?

Kon susihon pag-ayo ang kasaysayan sa relihiyon, makaplagan nga dunay matang sa pagsimba nga lahi gayod sa ubang mga relihiyon. Diyutay lang ang nagsunod niana nga matang sa pagsimba karon. Kini nga relihiyon gitukod ni Jesu-Kristo ug sa iyang mga apostoles. Apan lahi kini sa matang sa pagsimba nga gihimo sa Kakristiyanohan sulod sa daghang siglo.

Duna bay kalainan ang Kakristiyanohan ug ang matuod nga relihiyon nga gitukod ni Jesu-Kristo? Oo, daghan kaayo. Atong hisgotan ang usa niana.

“Dili Bahin Niining Kalibotana”

Ang unang mga Kristohanon walay gidapigan sa politika. Sila nagsundog sa neyutral nga baroganan ni Jesus. Ang Bibliya nagtaho nga sa labing menos duha ka higayon, si Jesus hugot nga midumili sa tanyag nga mahimong politikanhong magmamando. (Mateo 4:8-10; Juan 6:15) Gibadlong pa gani ni Jesus ang iyang mga disipulo kay buot nilang makig-away aron pugngan ang pagdakop kaniya.—Mateo 26:51, 52; Lucas 22:49-51; Juan 18:10, 11.

Sa dihang ang Romanong gobernador sa Judea nangutana bahin sa gikaingong politikal nga ambisyon ni Jesus, siya mitubag: “Ang akong gingharian dili bahin niining kalibotana. Kon ang akong gingharian bahin pa niining kalibotana, ang akong mga alagad makig-away na unta aron dili ako ikatugyan ngadto sa mga Hudiyo. Apan, sa pagkatinuod, ang akong gingharian dili gikan niini nga tinubdan.” (Juan 18:36) Dayag nga si Jesus dili gustong malangkit sa politika ug sa militar.

Ang mga disipulo ni Jesus nagsunod niana. Sa pagsusi sa papel sa relihiyon diha sa mga gubat, ang grupo sa mga tigdukiduki nga gihisgotan sa nag-unang artikulo miingon: “Ang unang mga Kristohanon dili buot malangkit sa kapintasan. . . . Kadaghanan sa mga Kristohanon midumili sa pagsundalo ug sa pagpakiggubat.” Gipasiugda sa mga pagtulon-an ni Jesus ug sa iyang mga apostoles ang gugma sa isigkatawo, lakip na sa mga estranghero ug sa mga tawo nga lahig tribo o rasa. (Buhat 10:34, 35; Santiago 3:17) Kini nga relihiyon nakapatungha gayod ug kalinaw.

Sa ngadtongadto, ang orihinal nga mga pagtulon-an sa Kristiyanidad nasambogan ug makapabahinbahin nga pilosopiya, tradisyon, ug nasyonalismo. Ang gihisgotan ganina nga report bahin sa papel sa relihiyon diha sa mga gubat nag-ingon: “Human makombertir [ang Romanong emperador nga] si Constantino, ang mga Kristohanon nalangkit na sa pagpakiggubat—wala na magiyahi sa binase-sa-kalulot nga mga pagtulon-an ni Kristo, kondili sa tumong sa Emperador sa pagsakop ug mga teritoryo. Ang mga Kristohanon, lakip na ang Emperador, naggamit sa relihiyon aron ipakamatarong ang gubat.” Tungod niini, mitungha ang mini nga mga Kristohanon.

Usa ka “Lahi” nga Grupo

Nawala na ba ang matuod nga Kristiyanidad? Wala gayod. Dunay usa ka grupo karon nga takos gayong tagdon. Ang mga Saksi ni Jehova nagsunod sa unang mga Kristohanon, dili sama sa ubang relihiyosong mga tawo. Sila wala malangkit sa bisan unsang relihiyon sa Kakristiyanohan. Ang The Encyclopedia of Religion naghubit kanila nga “lahi,” tungod kay ang tanan nilang pagtulon-an gibase sa “Bibliya, dili sa tradisyon.”

Sama sa unang mga Kristohanon, ang mga Saksi ni Jehova walay gidapigan sa politika. Ang mantalaang gipatik sa National Academy of Sciences sa Ukraine nag-ingon nga ang mga Saksi ni Jehova nagtinguha sa pagbuntog sa “rasanhon, nasodnon, relihiyoso, katilingbanon, ug ekonomikanhong panagbangi.” Kana nagsaysay usab nga ang mga Saksi ni Jehova dili makigbahin sa “mga kalihokan batok sa gobyerno” ug sila “masinundanon-sa-balaod nga mga lungsoranon.”

Si Propesor Wojciech Modzelewski, sa Warsaw University sa Poland, misulat diha sa iyang librong Pacifism and Vicinity: “Ang mga Saksi ni Jehova mao ang kinadak-ang grupo sa kalibotan karon nga dili makiggubat.” Tungod kay sila nagsunod gayod sa sumbanan sa mga Kristohanon sa unang siglo, ikaingon nga ang mga Saksi ni Jehova milampos sa pagpasig-uli sa matang sa pagsimba nga gitukod ni Kristo ug sa iyang mga apostoles. Mao kana ang matang sa Kristiyanidad nga makapatunghag kalinaw.—Tan-awa ang kahon sa sunod nga panid.

Masanag nga Kaugmaon

Tinuod, daghang sinserong magsisimba—ug ubay-ubay pa ganing lider sa relihiyon—ang wala makaangay sa pagkasalingkapaw sa ilang relihiyon. Angayng dayegon ang relihiyosong mga tawo nga naningkamot sa pagpatunghag kalinaw ug panaghiusa sa kalibotan.

Apan bisag sinsero sila niana, ang tawo limitadog mahimo sa pagsulbad sa mga problema sa kalibotan. Si Jeremias, usa ka propeta sa karaang panahon, misulat: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.”—Jeremias 10:23.

Apan adunay masanag nga kaugmaon. Ang Pulong sa Diyos nagtudlo nga sa umaabot ang yuta pagapuy-an sa malinawon, bag-ong katilingban sa katawhan. Kining bag-ong katilingban adunay tinuod nga panag-igsoonay. Ang tanang tawo magkahiusa, ug dili na mabahinbahin tungod sa nasod, tribo, o relihiyon. Ang makapahiusa kanila mao ang putli nga pagsimba kang Jehova nga Diyos.

Ang Bibliya nagtagna usab nga wagtangon ang mga relihiyon nga wala magpasidungog sa Diyos. Si Jesus miingon: “Ang matag gingharian nga nabahin batok sa iyang kaugalingon modangat sa pagkalaglag, ug ang matag siyudad o balay nga nabahin batok sa iyang kaugalingon dili makabarog.” (Mateo 12:25) Sa gitakdang panahon, himoon gayod kana sa Diyos ngadto sa tanang bakak nga relihiyon.

Ang Bibliya dugay nang nagtagna nga ang Diyos “magahukom gayod taliwala sa mga nasod ug magatul-id sa mga butang.” Kini nga tagna nag-ingon usab nga “pagasalsalon [sa mga tawo] ang ilang mga espada nga mga punta sa daro ug ang ilang mga bangkaw nga mga galab. Usa ka nasod dili mobakyaw sa espada batok sa usa ka nasod, ni makakat-on pa sila sa gubat.” (Isaias 2:4) Kini nga tagna padayong nagakatuman karon. Ang matuod nga relihiyon, nga gisunod sa mga Saksi ni Jehova, nakapatungha gayod ug kalinaw.

[Blurb sa panid 8]

Ang mga Saksi ni Jehova gihiusa sa gugma

[Kahon sa panid 9]

Sa Unsang Paagi Lahi ang mga Saksi ni Jehova?

Daghang tawo ang nakadayeg sa dihang ilang nasayran nga ang mga Saksi ni Jehova lahi gayod sa ubang relihiyon nga nag-angkong nagsunod kang Kristo. Ang mosunod maoy pipila sa mga butang nga nakapalahi sa mga Saksi ni Jehova:

KAHIKAYAN

● Sila walay dakodako o klero nga matang.

● Ang ilang mga ansiyano, magtutudlo, ug mga misyonaryo walay suweldo.

● Sila walay ikapulo ug sila dili mangolektag kuwarta diha sa ilang dapit sa pagsimba, nga gitawag ug Kingdom Hall.

● Ang tanan nilang kalihokan gisuportahag mga donasyon, nga ang nagdonar dili magpaila.

● Sila neyutral maylabot sa politika.

● Sila nagpasiugda sa kalinaw ug dili moapil sa gubat.

● Sa tibuok kalibotan, sila nagkahiusa sa ilang pagtuo ug sa ilang binase-sa-Bibliya nga mga pagtulon-an.

● Sila bug-os nga nagkahiusa ug wala mabahinbahin tungod sa tribo, rasa, o kahimtang sa kinabuhi.

● Sila wala malangkit sa ubang relihiyon, sa Katoliko man, Ortodokso, o sa Protestante.

DOKTRINA

● Sila nagtuo nga dunay usa lamang ka matuod nga Diyos, si Jehova.

● Sila wala magtuo nga si Jesu-Kristo ang Labing Gamhanang Diyos, ug wala usab magtuo sa doktrina sa Trinidad.

● Sila nagsunod sa mga pagtulon-an ni Jesus ug nag-ila kaniya ingong Anak sa Diyos.

● Sila wala magsimba sa krus, ni maggamit ug mga imahen sa ilang pagsimba.

● Sila dili motuo sa impiyernong kalayo nga mao konoy adtoan sa mga daotan inigkamatay.

● Sila nagtuo nga ang matinumanong mga tawo panalanginan sa Diyos ug kinabuhing walay kataposan sa paraiso sa yuta.

Ang mga Saksi ni Jehova nagtuo nga ilang napasig-uli ang Kristiyanidad sa unang siglo, ang matang sa Kristiyanidad nga gisunod sa mga apostoles ni Jesus.

[Hulagway sa panid 8]

Usa ka Serb, Bosnian, ug Croatian