Sugyot 5​—Palihoka ang Imong Kaugalingon ug ang Imong Pamilya

Padayon sa pagkat-on. Sa daghang nasod, ang publiko ug pribadong mga institusyon nagtaganag edukasyonal nga mga programa ug literatura bahin sa panglawas. Pahimusli kana, ug pagkuhag kasayoran kon sa unsang paagi mabatonan ang mas maayong panglawas ug malikayan nga mameligro kini. Hupti ang bukas nga hunahuna, ug magmaandam sa paghimog simpleng mga kausaban.

Ang maayong mga batasan nga imong nakat-onan ug gipadapat makabenepisyo sa imong mga anak ug sa ila unyang mga anak. Kon ang mga ginikanan maghatag ug maayong panig-ingnan maylabot sa makapahimsog nga pagkaon, kahinlo, batasan sa pagkatulog, ehersisyo, ug paglikay sa mga sakit, hayan nga makabenepisyo niana ang ilang mga anak.​—Proverbio 22:6.

Unsa pay gikinahanglan? Nagkinahanglag labaw pa kay sa interes sa kaugalingong kaayohan ang pagtakda ug paghupot ug makapahimsog nga paagi sa pagkinabuhi. Ang pagwagtang sa nakagamot na nga di-maayong mga batasan malisod tingali, ug ang paghimo bisan sa simpleng mga kausaban sagad nagkinahanglag bug-at nga rason. Bisan ang kapeligrohan nga makaagom sa grabeng sakit ug mamatay lagmit dili gihapon makapalihok sa pipila sa paghimo sa nahibaloan nilang makaayo kanila. Unsa may makapalihok kanila? Sama kanato, kinahanglang hunahunaon nila ang mas labaw nga katuyoan, o tumong, sa kinabuhi.

Ang mga magtiayon kinahanglang magpabiling himsog aron makapadayon sa pagtabang sa usag usa. Ang mga ginikanan nagtinguha sa pagpadayon sa pagsuportar ug pagbansay sa ilang mga anak. Ang hamtong nga mga anak kinahanglang moatiman sa tigulang na nga mga membro sa pamilya. Anaa usab ang maayong tinguha nga mahimong tabang sa komunidad imbes pabug-at. Kining tanan naglangkit ug gugma ug kahingawa sa uban.

Ang mas labaw pang rason nga makapalihok sa usa mao ang pagkamapasalamaton ug debosyon ngadto sa atong Magbubuhat. Kadtong dunay pagtuo sa Diyos nagtinguha nga maampingan ang iyang bililhong gasa nga kinabuhi. (Salmo 36:9) Kon kita himsog, kita mas aktibong makaalagad sa Diyos. Kana mao ang kinalabwang rason kon nganong ampingan nato ang atong panglawas.