Kaalam Para sa Kasingkasing ug Panglawas

“Ang kalmado nga kasingkasing mao ang kinabuhi sa unod.”—PROVERBIO 14:30.

“Ang kasingkasing nga malipayon maayo nga tambal.”—PROVERBIO 17:22.

● Kanang simple apan maalamong mga pulong gipahayag ni Haring Solomon sa Israel duolan sa 3,000 ka tuig kanhi.a Apan napamatud-an ba kana? Unsay giingon sa modernong medisina?

Sa pagtandi sa mga tawong kalmado ug sa mga tawong masuk-anon, ang Journal of the American College of Cardiology nag-ingon: “Ang bag-ong mga kaplag nagpakita nga ang kasuko ug pagdumot mahimong moresulta sa CHD [coronary heart disease].” Busa, ang Journal nag-ingon: “Aron makalikay sa CHD ug matambalan kana hayan gikinahanglan . . . dili lamang ang naandang pisikal nga terapiya ug medisina, kondili usab ang pagkontrolar sa emosyon ilabina sa kasuko ug pagdumot.” Sa yanong pagkasulti, ang kalmadong kasingkasing makaayo sa panglawas, sama gayod sa giingon sa Bibliya.

Maayo usab ang epekto kon malipayon ang kasingkasing. Si Dr. Derek Cox, usa ka opisyal sa panglawas sa Scotland, miingon diha sa usa ka taho sa BBC News: “Kon malipayon ka lagmit nga dili kaayo ka masakit kon itandi niadtong mga magul-anon.” Ang mao gihapong taho nag-ingon: “Ang mas malipayong mga tawo mas protektado usab batok sa mga balatian sama sa estrok ug sakit sa kasingkasing.”

Nganong ang kaalam ni Solomon—ug sa ubang mga magsusulat sa Bibliya—abante sa panahon ug praktikal gihapon karon? Simple lang ang tubag. “Ang Diyos nagpadayon paghatag kang Solomon sa kaalam ug pagsabot sa dako kaayong sukod.” (1 Hari 4:29) Dugang pa, ang maong kaalam gisulat sa yanong pinulongan aron masabtan sa tanan. Ug kana walay bayad!

Nganong dili nimo himoong bahin sa imong kinabuhi ang regular nga pagbasa sa Bibliya? Ingon sa nadiskobrehan ug gikalipay pag-ayo sa milyonmilyon, “sa diha nga ang kaalam mosulod sa imong kasingkasing ug ang kahibalo mahimong kahimut-anan sa imong kalag, ang katakos sa panghunahuna magabantay kanimo, ang katakos sa pag-ila magapanalipod kanimo.” (Proverbio 2:10, 11) Dili ba makapadasig gayod kana?

[Footnote]