Talagsaong Basahon nga Nakalahutay
“Walay laing basahon nga grabeng gisupak; apan nakalahutay gihapon bisag unsa pay gisulti o gibuhat sa mga kaaway sa pagwagtang niini.”
NGANONG angay nimong hatagag importansiya ang Bibliya? Una sa tanan, kini dunay mensahe sa Diyos alang sa tawo. (2 Timoteo 3:16) Nan, dako kaayo ang mawala nimo kon dili nimo kini basahon.
Dugang pa, ang Bibliya maoy usa sa labing karaang basahon ug labing kaylap nga gihubad ug giapod-apod. Kini ang labing himalitang basahon ug nanguna sa listahan sa halinon nga mga libro tuigtuig.
Mas makadayeg ka sa mensahe, pagkakaraan, ug pagkakaylap sa Bibliya kay bisan pag gipaningkamotan kini pagwagtang, kini nakalahutay hangtod karon. “Walay laing basahon nga grabeng gisupak; apan nakalahutay gihapon bisag unsa pay gisulti o gibuhat sa mga kaaway sa pagwagtang niini,” miingon ang teologo sa ika-19ng siglo nga si Albert Barnes.
Si Barnes miingon nga ang mga tawo mainteres gayod sa bisan unsang butang nga nakalahutay sa mga pag-atake. Siya midugang: “Walay kasundalohan nga nakalahutay sa daghang panagsangka diha sa panggubatan nga sama sa paglahutay sa Bibliya, . . . walay karaang kuta nga nakapabilin sa daghang pag-atake, nga nagtindog gihapon bisan pa sa daghang pag-asdang ug sa kadaot tungod sa panahon; ug walay bato nga wala maanod sa kusog kaayong mga sulog.”
Daghang karaang mga sinulat ang nangawala, nangadaot, o nakalimtan, apan ang Bibliya nakalahutay bisan pa sa grabeng mga pag-atake. Gisakripisyo sa uban ang ilang kinabuhi aron lang mabatonan kini sa mga tawo. Sa laing bahin, gikompiskar sa uban ang Bibliya gikan sa kamot sa interesadong mga magbabasa ug gisunog kini apil ang nanag-iya niini.
Nganong kining basahona gihigugma ug gidumtan pag-ayo? Unsang mga pag-atake ang nasagubang niini? Kinsay misulay sa pagdaot niini? Labaw sa tanan, nganong nakalahutay kini? Ug nganong importante ang mensahe niini? Tubagon kini sa mosunod nga mga artikulo.
[Chart/Mga hulagway sa panid 2, 3]
(Alang sa aktuwal nga pagkahan-ay, tan-awa ang publikasyon)
PAGSULAT, PAGHUBAD, UG PAG-IMPRENTA SA BIBLIYA
1513 B.C.E. Gisulat sa Hebreohanon, Aramaiko, ug Grego
–c. 98 C.E.
100 Gihimong codex
405 Gihubad ni Jerome sa Latin
1380 Gihubad gikan sa Latin ngadto sa Iningles ni Wycliffe
1455 Gutenberg unang nag-imprenta ug Bibliya
1525 Gihubad ni Tyndale sa Iningles
1938 Giimprenta sa kapin sa 1,000 ka pinulongan
2011 Mabatonan sa kapin sa 2,500 ka pinulongan