Ang Hunahuna sa Bibliya
Ang Diyos ba May Kahingawa sa mga Hayop?
ANG mga hayop nameligrong mapuo. Daghang siyentista nagtuo nga kusog nga nagakapuo ang lainlaing matang sa mga hayop. Sila nabiktima sa pagdaot sa tawo sa ilang pinuy-anan. Ang pagpasangka, pag-abandonar, ug ang negosyo sa pagbuhig mga hayop nakapasamot sa ilang makaluluoy nga kahimtang.
Apan ang uban nagtuo nga kini maoy dili kalikayang epekto sa pagdaghan sa tawo. Pero mao ba gayod kanay katuyoan sa Diyos? Pasagdan na lang ba niya ang mga tawo sa pagmaltrato kanila? Unsaon nato pagkahibalo nga ang Diyos nahingawa sa mga hayop?
May Kahingawa Sukad pa sa Sinugdanan
Ang Diyos nalipay human sa paglalang sa mga isda, langgam, ug hayop. Ang Bibliya nag-ingon nga “nakita sa Diyos nga kadto maayo.” (Genesis 1:21, 25) Ang mahigugmaong Maglalalang nahingawa sa tanang linalang, gikan sa kinagamyan ngadto sa kinadak-an. Dili lang gilalang sila sa Diyos nga may ‘kinaiyanhong kaalam’ kondili gitagan-an usab silag pagkaon aron mabuhi. Husto ang giingon sa magsusulat sa Bibliya: “Silang tanan nagsalig kanimo sa ilang pagkaon. Gihatagan mo sila niini ug gikaon nila kini; gihatagan mo silag pagkaon ug nangatagbaw sila.”—Proverbio 30:24; Salmo 104:24, 25, 27, 28, Maayong Balita Biblia.
Tinuod, ang mga hayop gipasakop sa Diyos sa unang tawo nga si Adan, ug wala lalanga nga may katakos sa paghunahuna o pagpakigsuod sa Diyos. (2 Pedro 2:12; Judas 19) Apan labaw si Adan sa mga hayop kay siya gilalang “sa larawan sa Diyos.” Siya makapabanaag sa mga hiyas sa iyang Maglalalang, si Jehova. (Genesis 1:27; Salmo 83:18) Hinunoa, kini wala maghatag ug katungod sa mga tawo sa pagdagmal sa mga hayop.
Pananglitan, si Adan nagsugod sa pagngalan sa mga hayop kay gihatagan siya ni Jehova niana nga pribilehiyo. Dugang pa, gitabangan ni Jehova si Adan pinaagi sa ‘pagdala [sa mga hayop] ngadto kaniya aron mahibalo siya kon unsay iyang itawag sa matag usa.’ (Genesis 2:19) Magmalamposon lang ang tawo sa pag-atiman sa mga hayop kon iyang sundon ang Maglalalang.
Ang Diyos May Kahingawa Gayod Kanila!
Makasubo, gisupak ni Adan ang Maglalalang. Kini dunay daotang epekto sa tanang tawo ug sa ubang linalang. Apan gipatin-aw sa Maglalalang kon unsaon pagtratar ang mga hayop. Bisag sa ulahi gitugotan ang tawo sa paggamit sa hayop ingong pagkaon ug sa uban pang mapuslanong mga katuyoan, ang Diyos wala gayod magsugo sa pagmaltratar kanila. Ang Bibliya nag-ingon: “Ang matarong nagaatiman . . . sa iyang binuhing hayop, apan ang mga kaluoy sa mga daotan mabangis.”—Proverbio 12:10.
Sa Israel kaniadto, ang Diyos naghatag ug mga balaod alang sa kaayohan sa mga hayop. Pananglitan, sa adlawng Igpapahulay kada semana, ang mga hayop makapahulay usab. (Exodo 23:12) Bisag gidili ang pagtrabaho nianang sagradong adlaw, dili angayng pasagdan ang hayop nga nagkinahanglag tabang. (Lucas 14:5) Ang Diyos nagsugo nga ang baka dili busalan aron makakaon samtang nagtrabaho ug ang mga hayop dili pabug-atan. (Exodo 23:5; Deuteronomio 25:4) Gidili usab nga parison pagsangon ang baka ug asno sa pagdaro aron walay maglisod kanila. (Deuteronomio 22:10) Busa ang Bibliya nagtudlo nga ang mga hayop kinahanglang pakitaag kaluoy ug trataron sa hustong paagi!
Bisan tuod daghang tawo naghunahuna lang sa kaugalingon ug wala maghunahuna sa dangatan sa mga hayop, ang Diyos maluluy-on kanila. Sa dihang si Jonas wala magpakitag kaluoy sa mga molupyo sa Nineve nga naghinulsol ug wala makaagom sa paghukom sa Diyos, si Jehova miingon: “Sa akong bahin, dili ba diay ako masubo alang sa Nineve nga dakong siyudad, diin adunay kapin sa usa ka gatos ug kawhaan ka libo ka tawo nga wala mahibalo sa kalainan tali sa ilang tuong kamot ug sa ilang wala, gawas pa sa daghang binuhing hayop?” (Jonas 4:11) Oo, ang Maglalalang nagpakitag kaluoy bisan sa mga hayop!
Maayong Pag-atiman Gisaad
Klaro nga ang Diyos may kahingawa sa mga hayop. Gani ang iyang pinalanggang Anak, si Jesus, miingon nga mamatikdan sa iyang Amahan kon may mahulog nga goryon. (Mateo 10:29) Sa kasukwahi, bisan pa sa maayong intensiyon sa tawo, dili niya bug-os masabtan kon unsay epekto sa iyang ginahimo diha sa kalikopan. Sa pagpakitag kahingawa sa mga hayop, kinahanglang usbon sa tawo ang iyang tinamdan.
Ikalipay nga gihubit sa Bibliya ang panahon sa dihang ilalom sa pagmando sa Gingharian sa Diyos, “ang yuta mapuno sa kahibalo kang Jehova.” (Isaias 11:9) Kini nga kahibalo magtudlo ug magbansay sa matinumanong mga tawo kon unsaon pag-atiman ang yuta sa hustong paagi. Kon ang Diyos na ang magmando, may pakigdait na ang tawo ug hayop, sa ingon mapasig-uli ang kahimtang sa yuta sumala sa katuyoan sa Diyos.
Gihubit sa Bibliya ang kausaban nga mahitabo nianang panahona: “Ang lobo mopuyo gayod sa makadiyot uban sa laki nga nating karnero, ug ang leopardo mohigda uban sa nating kanding, ug ang nating baka ug ang may-lambungay nga nating leyon ug ang pinakaon-pag-ayo nga hayop magkauban ang tanan; ug usa lamang ka gamayng bata ang mangulo kanila. Ug ang baka ug ang oso manibsib; manag-ipon sa paghigda ang ilang mga nati. Ug bisan ang leyon mokaon ug uhot sama sa torong baka. Ug ang bata nga masuso magadula sa lungag sa kobra; ug ang usa ka bata nga linutas mokuot sa buho nga lutsanan sa kahayag sa malalang bitin.” Pagkaanindot niini nga palaaboton!—Isaias 11:6-8.
NAKAPAMALANDONG KA BA?
● Ang Diyos ba interesado kon giunsa pagtratar ang mga hayop?—Proverbio 12:10; Mateo 10:29.
● Moabot kaha ang panahon nga ang tawo ug hayop magmakigdaiton sa usag usa?—Isaias 11:6-9.
[Blurb sa panid 11]
Sa pagpakitag kahingawa sa mga hayop, kinahanglang usbon sa tawo ang iyang tinamdan
[Picture Credit Line sa panid 11]
La Voz de Galicia/Fotógrafo: Víctor Mejuto