Mga Batan-on Nangutana

Unsay Makapahimo sa Parti nga Tinuod nga Makalingaw?

Sa ubos, butangig ✔ ang kalihokan sa parti nga ganahan kaayo ka.

kaon
sayaw
dula
pakighigala
pakig-estorya sa daang mga higala
uban pa ․․․․․

SAGAD ang mga batan-on gusto kaayog parti-parti, ug walay daotan niana. Ang Bibliya wala maghisgot nga dili maayo ang parti.

Nahibalo ka ba?

Ang mga anak ni Job naghikay ug parti sa pamilya.—Job 1:4.
Si Jesus mitambong ug dakong kombira sa kasal.—Juan 2:1-11.
Ang mga Kristohanon sa unang siglo nagparti diha sa mga balay.—Buhat 2:46, 47.

Makalingaw gyod nga makauban ang mga higala diha sa mga parti. Pero ikasubo, may mga parti nga dili maayo.

TINUOD NGA HITABO “Gidapit ko sa usa ka parti nga bisan kinsa makaadto, ug gihimo kini sa balay sa usa ka batan-ong lalaki kansang mga ginikanan wala diha. Midesisyon ko nga dili moadto, ug wala ko magmahay! Pagkasunod adlaw, nakadungog ko nga daghan ang nag-inom ug ang uban nangahubog. Tulo ka batan-ong lalaki nakuyapan sa kahubog. Ug dihay nag-away, ug miabot ang mga polis ug gipahunong ang parti.”—Janelle.

LEKSIYON Ayaw gyod pamasin! Kon ikaw man ang naghikay sa parti o usa ka dinapit, paneguroa nga nahibalo ka sa tubag sa mga pangutana sa sunod nga mga panid. Nianang paagiha nindot kag panumdoman sa maong parti—ug dili magmahay—dihang mahuman na kini.

MALAMPOSONG MGA PARTI

“Sa dihang nagparti ang akong amiga, nahibalo ang iyang Mama kon diin ang matag usa. Bisag moadto lang ko sa kotse sa pagkuhag dyaket, nangutana siya kon asa ko moadto. Sobra ra ba siya ka mapanagan-on? Tingali. Apan wala ko mahiubos kay nahibalo ko nga nagtan-aw lang siya sa akong kaayohan.”—Kim.

“Nakaadto na kog daghang maayong parti, ug ang rason kon nganong malamposon kini kay dili lang mga batan-on ang atua didto. Dugang pa, ang naghikay sa parti dunay naplanong makalingawng mga kalihokan, mao nga walay naglakawlakaw ug naghimo sa iyang gusto.”—Andrea.

Ang ubang mga artikulo gikan sa seryeng “Mga Batan-on Nangutana” makita diha sa Web site nga www.pr2711.com/ceb

Unsay posibleng mahitabo?

“Kon ikaw ang naghikay sa parti ug may nahitabong dili maayo, ikaw ang mahayan.”—Bridget.

“Kon maayong pagkahikay, ang parti makalingaw sa tanan. Busa hunahunaa daan ang posibleng mga problema aron maandam ka kon unsay himoon.”—Seth.

TINUOD NGA HITABO “Duna koy amigo nga nagsulti nako nga dili ko niya imbitahon kay nahibalo siya nga mangutana ang akong ginikanan kaniya kon kinsa ang gipangimbitar ug unsang orasa kini matapos. Siya miingon nga dili siya gustong sukitsukiton ug sama niini. Para nako dako na kaayo kana nga ilhanan! Kon dili siya ganahan niining mga pangutanaha, nan dili maayong moadto sa iyang parti!”—Ellen.

“Kon kamo magakaon o magainom o magabuhat sa bisan unsa, himoa ang tanang butang alang sa kahimayaan sa Diyos.”—1 CORINTO 10:31

Unsay imong himoon kon medyo may problema na ang parti?

“Duna na koy plano. Kon moadto kog parti, motawag ko sa akong ginikanan sa pagsulti kanila kon unsang orasa ko mouli. Dihang motawag ko nila, mangutana sila kon may problema ba ang parti. Kon moingon kog duna, signal nila kini sa pagpahinumdom kanako sa mga buluhaton nga akong himoon. Dayon, sultihan nako ang akong mga higala nga gipapauli kog sayo sa akong ginikanan.”—Therese.

TINUOD NGA HITABO “Sa usa ka parti, duha ka batan-ong lalaki nga wala imbitaha nangadto, ug ang usa kanila gidungog nga nagdroga. Naglisod ko pagdesisyon, apan gitawgan nako si Papa sa pagkuha nako.”—Mary.

“Ang tawong maayog panghunahuna makakita sa umaabot nga problema ug molikay niini, apan ang tawong dili mogamit sa hunahuna dili magtagad niini ug unya magbasol sa ulahi.”—PROVERBIO 22:3, TODAY’S ENGLISH VERSION