Unsay Akong Madahom sa Kaminyoon?—Bahin 2

Kon nangita kag pamanhonon o pangasaw-onon, dili daotan kon kanang gilista sa pikas panid ang imong gipangita. Tingali makakita kag tawo nga aduna nianang tanan nga imong gusto. Apan ang tinuod, paglabay sa panahon ang tawo mausab—maingon man mga sirkumstansiya.

Ang punto: Aron molampos ang kaminyoon, kinahanglang andam ka sa mga situwasyon nga wala damha.

Ang maayong balita. Sa maminyo na, makita nimo nga duna diay kinaiya ang imong kapikas nga makaamot sa kalipay sa kaminyoon.

“Karon nga minyo na mi, mas naapresyar nako ang pagkamaayong mopakatawa ni Mariaa nga gibalewala lang nako niadtong trato pa mi. Sanglit mas balanse na man kamig hunahuna, ang mga problema nga among naatubang daw dili na kaayo bug-at.”—Mark.

Ang dili maayong balita. Ang ubang wala damhang mga bahin sa kaminyoon tingali makapahigawad. Tagda ang usa ka pananglitan.

Ingnon ta nga ikaw ug ang imong pamanhonon o pangasaw-onon gustong magmisyonaryo sa ubang nasod. Apan komosta kon sa maminyo na, ang imong kapikas magsakit ug grabe nga tungod niana ang inyong plano dili na madayon? Posible na, kay ang Bibliya nag-ingon nga ang “daotang mga butang mahitabo sa tanan!” (Ecclesiastes 9:11, Holy Bible—Easy-to-Read Version) Tingali maguol ka sa kahimtang sa imong kapikas—ug mahigawad nga dili matuman ang inyong plano. Apan kon mahitabo man ugaling kana, dawata na lang ang situwasyon ug magpaangay ka na lang. Tawo ang imong gipakaslan, dili tumong.

Ang punto: Ang Bibliya nag-ingon nga makaagom gayod ang mga minyo ug “kasakitan.” (1 Corinto 7:28) Usahay kana nga kasakitan dili madahom.

Sa unsang paagi makapangandam ka alang sa mga panghitabo nga wala damha? Kon magminyo ka, duha ka butang ang imong gikinahanglan.

1. REALISTIKANHONG PANGLANTAW

Bisag unsa pa mo ka bagay sa imong pamanhonon o pangasaw-onon, kinahanglang imong dahomon nga

• dili mo kanunayng magkauyon.

• dili mo kanunayng parehas ug prayoridad.

• dili mo kanunayng parehas ug gustong buhaton.

• ang inyong bationg gugma dili kanunayng sama niadtong sa trato pa mo.

Ang mga kahimtang nga gilista sa ibabaw komon. Apan dili kini makadaot sa imong kaminyoon gawas kon imo kining tugotan! Hinumdomi, ang Bibliya nag-ingon nga ang gugma “molahutay sa tanang butang” ug “dili gayod mapakyas.”—1 Corinto 13:4, 7, 8.

Tinuod nga situwasyon: Sa pagkatinuod, ang makapalampos o makapabungkag sa kaminyoon nagdepende sa imong paagi sa pag-atubang sa mga problema.—Colosas 3:13.

2. PAGKAMAUNONGON

Kon ikaw ug ang imong kapikas determinado nga dili magbulag bisag unsa pay mahitabo, ang mga unos sa kaminyoon mabuntog.—Mateo 19:6.

Ang uban moingon nga ang pagkamaunongon makahatag ug kabug-at sa kaminyoon. Apan kasukwahi ang mahimo niini. Ang pagkamaunongon makalig-on sa inyong relasyon. Kon mahitabo ang wala damha, ikaw ug ang imong kapikas mangitag solusyon, dili mangitag paagi sa pagtapos sa kaminyoon.

Aron mahimong maunongon, kinahanglang realistikanhon ang imong paglantaw sa kaminyoon, dili hinanduraw. Sa pag-ilustrar sa kalainan, sulayi ang mosunod.

1. Hunahunaa nga duna kay libreng tiket sa ayroplano paingon sa bisan asang dapit sa kalibotan. Unsang dapita ang imong pilion, ug ngano?

Destinasyon:

Rason:

• nindot nga lugar

• kultura

• klima

• kalingawan

• uban pa

2. Hunahunaa nga ang imong tiket one-way lang ug ang imong destinasyon mahimo nang imong permanenteng puy-anan.

Karon, asa nga destinasyon ang imong pilion?

• Destinasyon:

• o

  Dili ra ko mobalhin.

Niini nga ilustrasyon, ang una ug ikaduhang destinasyon nga imong gisulat tingali dili parehas. Bisag parehas pa, tingali lahi kag panghunahuna bahin sa imong ikaduhang destinasyon. Imbes maghunahuna nga bakasyonista ka nga nagpahayahay diha sa baybay o nag-hiking sa kabukiran, kinahanglang hunahunaon nimo ang imong kaugalingon ingong residente nga nagtagamtam ug mga benepisyo ug nag-atubang ug mga problema sa adlaw-adlawng pagkinabuhi.

Kinahanglang ingon niana ang imong panghunahuna sa kaminyoon, kay mahimong mausab ang mga kahimtang paglabay sa panahon. Tingali ikaw ug ang imong kapikas mausab pod. Ang inyong kalamposan magdepende sa inyong pagkaandam sa pag-atubang sa mga situwasyon nga wala damha.

Angayng palandongon: Unsa ka kamaayong moatubang sa wala damhang mga situwasyon sa kinabuhi karon, ingong ulitawo o dalaga?