Kon Unsaon Pagpakigsulti sa Imong Anak Bahin sa Sexting

ANG PROBLEMA

Nakabalita ka nga komon na kaayo ang sexting sa mga batan-on. Tingali maghunahuna ka, ‘Himoon pod kaha na sa akong anak?’

Gusto kang makig-estorya sa imong anak bahin niini​—pero unsaon man? Sa dili pa kini tubagon, tagda una kon nganong dunay mga batan-on nga mag-sexting ug kon nganong angay nimo kining hatagag pagtagad.a

MGA HINUNGDAN

• Ang ubang tin-edyer magpadalag hilas nga mga message sa pagbirig-birig sa ilang naibgan.

• Sa ubang kahimtang, i-send sa batan-ong babaye ang iyang hilas nga letrato kay gipresyur siya sa usa ka batan-ong lalaki.

• Usahay ipasa sa batan-ong lalaki ang law-ay nga letrato sa usa ka babaye sa paglingaw sa iyang mga higala o sa pagpanimalos human gibulagan.

Bisag unsa pay hinungdan, ang batan-on nga dunay cellphone makasugamak ug daghang problema. “Sa usa lang ka pagtulpok,” nag-ingon ang librong CyberSafe, “daghang kinabuhi ang maapektohan.”

Daghang tawo wala maghunahuna nga basta makasulod na gani ang letrato sa cyberspace, ang nagpadala wala nay mahimo kon unsay himoon sa uban niini. Sa usa ka kaso, matod pa sa report sa Federal Bureau of Investigation (FBI) sa U.S.A., usa ka 18 anyos nga dalaga “naghikog kay ang iyang letrato nga naghubo siya, nga iyang gi-send pinaagig cellphone ngadto sa iyang trato, napasa usab ngadto sa ubang batan-on sa eskuylahan. Ang ubang estudyante, nga nagpasa usab sa letrato ngadto sa uban, nagsigeg hasol kaniya.”

Ang usa mahimong gukdon usab sa balaod tungod sa sexting. Pananglitan sa ubang nasod, ang menor de edad nga magpasag law-ayng mga letrato ngadto sa ubang menor de edad kasohan ug child pornography ug obligado sa pagparehistro ingong sex offender. Kon ginikanan ka, manubag pod ka kon ang cellphone narehistro sa imong ngalan o kon wala kay gihimo sa pagsanta sa imong anak sa pag-sexting.

ANG IMONG MAHIMO

Paghatag ug klarong balaod. Dili ka bug-os makakontrol sa paggamit sa imong anak ug cellphone, pero paneguroa nga nahibalo siya sa imong mga balaod​—maingon man sa mga silot sa paglapas niana. Hinumdomi usab nga ingong ginikanan, may katungod ka sa pagsusi kanunay sa cellphone sa imong anak.​—Prinsipyo sa Bibliya: Efeso 6:1.

Tabangi ang imong anak sa pagsabot kon unsa ang sexting. Mahimong moingon ka: “Lainlain ug hunahuna ang tawo kon unsa ang sexting. Ikaw, unsay imong hunahuna niini?” “Para nimo, unsang klaseha sa letrato ang dili angay?” “Sa ubang nasod, makasohan ang menor de edad nga magpasag letrato sa usa ka menor de edad nga hubo. Kon ikay pangutan-on, daotan ba na?” “Nganong dili maayo ang sexting?” Paminawa ang iyang rason, ug tabangi siya sa pagpamalandong sa dili maayong epekto sa sexting.​—Prinsipyo sa Bibliya: Hebreohanon 5:14.

Paghisgot ug posibleng mga situwasyon. Mahimong moingon ka sa imong anak nga babaye: “Pananglitan, usa ka dalaga gipresyur sa usa ka ulitawo nga mag-sexting sila. Unsay iyang buhaton? Mosugot na lang aron dili madaot ang ilang panaghigalaay? Mobalibad pero magbirig-birig gihapon niya? Dili na makighigala niya? Motug-an sa usa ka hamtong?” Tabangi ang imong anak sa pagtimbang-timbang. Mahimo usab nimo kini ngadto sa imong anak nga lalaki.​—Prinsipyo sa Bibliya: Galacia 6:7.

Tandoga ang iyang kasingkasing sa pagbuhat sa kon unsay husto. Pananglitan, pangutan-a siya: Importante ba nimo ang maayong dungog? Unsang kinaiya nga gusto nimong mailhan ka? Unsay imong bation kon nakahatag kag kaulawan sa usa ka tawo kay nag-send kag law-ayng letrato? Unsay imong bation kon mibarog ka sa kon unsay husto? Tabangi ang imong anak sa “paghupot ug maayong tanlag.”​—1 Pedro 3:16.

Pagpakitag maayong panig-ingnan. Ang Bibliya nag-ingon nga ang diyosnong kaalam putli ug dili salingkapaw. (Santiago 3:17) Ingon ka ba niana? “Kinahanglang magpakita kitag maayong panig-ingnan ug dili motan-aw ug mga letrato ug mga Web site nga giisip nga dili angay o kaha supak sa balaod,” nag-ingon ang librong CyberSafe.