Kon lig-on kag baroganan, dili ka madaog sa samag bagyo nga mga presyur
PARA SA MGA BATAN-ON
9 Pagkatawo
KON UNSAY IPASABOT
Mas importante ang imong pagkatawo kay sa imong ngalan ug hitsura. Kana naglakip sa imong pamatasan, gituohan, ug kinaiya. Busa, ang imong pagkatawo maoy magpaila kon unsa kang klaseha sa tawo—sa sulod man o sa gawas.
KON NGANONG IMPORTANTE
Kon importante nimo ang imong pagkatawo, panguptan nimo ang imong mga prinsipyo imbes tugotan ang imong isigkabatan-on nga maoy mokontrol nimo.
“Daghang tawo ang samag manikin nga gidispley sa mall. Dili sila makabuot kon unsay ilang isul-ob kondili ang ubang tawo.”—Adrian.
“Bisag lisod, nakakat-on ko sa pagbuhat kon unsay maayo. Mailhan nako ang tinuod nga higala base sa ilang panggawi ug kon unsay akong panggawi kon kauban nako sila.”—Courtney.
PRINSIPYO SA BIBLIYA: “Hunong na sa pagpaimpluwensiya niini nga sistema sa mga butang, kondili pag-usab mo pinaagi sa pagbag-o sa inyong hunahuna.”—Roma 12:2.
KON UNSAY IMONG MAHIMO
Susiha kon unsay imong pagkatawo karon ug kon unsay imong gusto nga pagkatawo sa umaabot pinaagi sa pag-ila sa imong mga katakos, kahuyangan, ug baroganan. Makatabang ang pagpamalandong sa mosunod nga mga pangutana.
Katakos: Unsay akong mga talento ug abilidad? Unsay akong maayong mga kinaiya? (Pananglitan: Langayan ba ko? naay pagpugong sa kaugalingon? kugihan? mahinatagon?) Unsang maayong mga butang ang akong ginahimo?
SUGYOT: Nalisdan ba ka sa pag-ila sa positibong mga butang bahin sa imong kaugalingon? Pangutan-a ang imong ginikanan o kasaligang higala kon unsang mga katakos ang iyang nakita nimo ug ngano.
PRINSIPYO SA BIBLIYA: “Angayng susihon sa matag usa ang iyang kaugalingong binuhatan, aron malipay siya sa iyang mga buhat ug dili tungod sa pagtandi sa iyang kaugalingon sa uban.”—Galacia 6:4.
Kahuyangan: Unsang mga bahina sa akong personalidad ang angay nakong pauswagon? Kanus-a ko lagmit matental sa pagbuhat ug dili maayo? Unsang mga situwasyon nga nagkinahanglan kog dugang pagpugong sa kaugalingon?
PRINSIPYO SA BIBLIYA: “Kon kita moingon, ‘Kita walay sala,’ atong gilimbongan ang atong kaugalingon.”—1 Juan 1:8.
Baroganan: Unsang moral nga mga prinsipyo ang akong gisunod, ug ngano? Nagtuo ba ko ug Diyos? Unsay nakapakombinsir nako nga dunay Diyos? Unsang mga buhat ang ginaisip nako nga inhustisya, ug ngano? Unsay akong gituohan nga mahitabo sa umaabot?
PRINSIPYO SA BIBLIYA: “Ang katakos sa panghunahuna magbantay nimo, ug ang katakos sa pag-ila manalipod nimo.”—Proverbio 2:11.