Pagkahimong Lig-on

UNSA ANG KALIG-ON?

Ang tawong lig-on dali rang maulian human sa dili maayong panghitabo. Ang kalig-on makat-onan pinaagig mga eksperyensiya. Sama nga ang bata makakat-on sa paglakaw human matumba sa makadaghan, siya makakat-on sab kon sa unsang paagi magmalamposon sa kinabuhi human makasinatig mga problema.

NGANONG IMPORTANTE ANG KALIG-ON?

Ang ubang bata maguol pag-ayo dihang mapakyas, makaatubag kalisdanan, o sawayon. Ang uban mosurender na gyod. Pero kinahanglan nilang masabtan ang mosunod:

• Mapakyas gyod ta usahay.​—Santiago 3:2.

• Kitang tanan makasinatig kalisdanan.​—Ecclesiastes 9:11.

• Importante ang pagtul-id aron mouswag.​—Proverbio 9:9.

Ang kalig-on makatabang sa imong anak nga dili mahadlok sa pag-atubang sa mga problema.

KON UNSAON PAGTUDLO ANG KALIG-ON

Dihang mapakyas ang imong anak.

PRINSIPYO SA BIBLIYA: “Ang tawong matarong mahimong matumba sa makapito, ug siya mobangon pag-usab.”​—Proverbio 24:16.

Tabangi ang imong anak nga magmarealistiko. Pananglitan, unsay iyang buhaton kon wala siya makapasar sa iyang test sa eskuylahan? Basig mosurender na siya, ug moingon, “Pirme na lang gyod kong di kapasar!”

Aron matudloan nga magmalig-on, tabangi ang imong anak sa paghimog paagi nga mouswag. Pinaagi niini, maningkamot siya nga sulbaron ang problema imbes magsigeg kaguol.

Likayi sab nga ikaw ang mosulbad sa problema sa imong anak. Hinuon, tabangi siya nga mangitag paagi sa pagsulbad sa iyang problema. Puwede nimo siyang pangutan-on, “Unsa may imong himoon aron mas makasabot ka ani nga subject?”

Dihang may lisod nga situwasyon.

PRINSIPYO SA BIBLIYA: “Wala mo masayod kon unsay mahitabo sa inyong kinabuhi ugma.”​—Santiago 4:14.

Ang kinabuhi way kasegurohan. Ang dato karon basig pobre na ugma; ang himsog karon basig magsakit na ugma. “Ang kusog modagan dili kanunayng modaog sa lumba, o ang kusgan dili kanunayng modaog sa gubat,” nag-ingon ang Bibliya, “kay ang panahon ug ang wala damhang panghitabo modangat kanilang tanan.”​—Ecclesiastes 9:11.

Ingong ginikanan, seguradong mohimo kag mga paagi aron protektahan ang imong anak. Pero sa pagkatinuod, dili nimo siya mapanalipdan sa tanang dili maayong panghitabo.

Siyempre, wala pa sa edad ang imong anak aron makaeksperyensiya nga mawad-ag trabaho o magkaproblema sa pinansiyal. Pero matabangan nimo siya sa pag-atubang sa laing lisod nga mga situwasyon​—pananglitan, dihang biyaan siyag higala o mamatyag membro sa pamilya.a

Dihang ang imong anak makadawat ug tambag o pagtul-id.

PRINSIPYO SA BIBLIYA: “Paminaw sa tambag . . . aron mahimo kang maalamon sa umaabot.”​—Proverbio 19:20.

Dihang ang imong anak tambagan o tul-iron sa uban, dili kana pagdaogdaog kondili pagtabang sa iyaha nga mouswag.

Kon tudloan nimo ang imong anak nga modawat ug pagtul-id, kamong duha ang makabenepisyo. Si John, nga usa ka amahan, miingon: “Kon ang mga bata dili tul-iron sa ilang mga sayop, dili gyod sila makakat-on. Magpatongpatong ang ilang problema ug ikay magsigeg sulbad niana. Kana makapamiserable sa kinabuhi sa ginikanan ug sa anak.”

Unsaon nimo pagtabang ang imong anak nga makabenepisyo sa pagtul-id? Dihang tul-iron siya, sa eskuylahan man o sa laing lugar, likayi ang pag-ingon nga dili sakto ang maong pagtul-id. Hinuon, puwede kang mangutana:

• “Unsa kahay rason nga gitul-id ka?”

• “Unsay imong mahimo aron mouswag ka?”

• “Unsay imong buhaton kon mahitabo ni pag-usab?”

Hinumdomi, ang tambag o pagtul-id makatabang sa imong anak, dili lang karon kondili inigdako pod niya.