Unsa ang Stress?

Ang stress maoy reaksiyon sa imong lawas sa lisod nga situwasyon. Ang imong utok magpadalag daghang hormone sa imong tibuok lawas. Tungod niana, mopaspas pagpitik ang imong kasingkasing, motaas ang presyur sa imong dugo, mopaspas ang imong pagginhawa, ug manghugot ang imong mga muscle, o kaunoran. Kini nagpakita nga andam na ang imong lawas sa pag-atubang sa situwasyon. Dihang mahuman na ang maka-stress nga situwasyon, ang imong lawas dili na “mag-high alert” ug mobalik sa normal.

MAAYO UG DILI MAAYO NGA STRESS

Ang stress maoy normal nga reaksiyon sa lawas aron maatubang nimo ang lisod o peligrosong mga kahimtang. Kini nga reaksiyon magsugod sa imong utok. Ang maayo nga stress makatabang nimo sa paglihok dayon. Ang eksaktong lebel sa stress makatabang sab nimo nga makab-ot ang imong mga tumong o nga mas maayo ang imong mahimo, lagmit panahon sa eksam, interbiyo sa trabaho, o sa sport.

Pero ang dugay, sobra, o balikbalik nga stress makadaot nimo. Kon ang imong lawas balikbalik o pirme nga “naka-high alert,” posible kang mag-antos sa pisikal, emosyonal, ug mental. Lagmit mausab pod ang imong batasan, apil na ang imong pagtratar sa uban. Ang kanunay nga pagka-stress mahimong moresulta sa pag-abuso sa droga ug sa ubang makadaot nga mga bisyo. Mahimong moresulta pa gani ni sa depresyon, grabeng kakapoy, o paghunahuna sa paghikog.

Bisag managlahi ang epekto sa stress sa matag tawo, mahimong moresulta ni sa daghang sakit ug makaapektar sa halos tanang bahin sa lawas.