Ang Tumbagang Bitin

DILI ba kana sama ug usa ka tinuod nga bitin nga gilikos sa tukon? Dili. Ang bitin hinimo sa tumbaga. Si Jehova misulti kang Moises sa pagbutang niini sa tumoy sa tukon aron ang mga tawo makatan-aw niini ug makapabiling buhi. Apan ang ubang mga bitin sa yuta maoy tinuod. Ilang napahit ang mga tawo ug naghimo kanilang masakiton. Nahibalo ka bag ngano?

Tungod kay ang mga Israelita nagsulti batok sa Diyos ug kang Moises. Nagbagulbol sila nga walay tubig sa kamingawan ug gikapoyan sila sa pagkaon sa mana.

Apan ang mana maayong pagkaon. Si Jehova naghatag kanila niini pinaagi sa usa ka milagro. Ug siya naghatag ug tubig usab pinaagi sa usa ka milagro. Apan ang katawhan dili mapasalamaton sa paagi sa Diyos sa pag-atiman kanila. Busa si Jehova mipadala niining malalang mga bitin sa pagsilot sa mga Israelita. Ang mga bitin mipahit kanila, ug daghan kanila ang namatay.

Sa kataposan, ang mga Israelita miadmitir nga nakasala sila. Nagpakiluoy sila nga kuhaon ang mga bitin.

Busa si Jehova misulti kang Moises sa paghimo ning tumbagang bitin ug ibutang kini sa tumoy sa usa ka tukon. Unya si bisan kinsang mapahitan kinahanglang motan-aw niini. Si Moises nagbuhat sumala sa gisugo sa Diyos. Ang mga tawo nga napahitan motan-aw sa tumbagang bitin ug maulian.

Adunay usa ka leksyon nga makat-onan gikan niini. Ang tanan kanato anaa sa kahimtang, sa usa ka paagi, sama nianang mga Israelita nga napahit nianang mga bitin. Ang mga tawo matigulang, masakit ug mamatay. Kini tungod kay si Adan ug Eva mitalikod kang Jehova, ug kitang tanan ilang mga anak.

Apan si Jehova mipadala sa iyang Anak, si Jesu-Kristo, nganhi sa yuta sa pagluwas kanato. Si Jesus gibitay sa usa ka kahoy alang sa atong kaayohan. Kon kita motan-aw kaniya, makabaton kita sa walay kataposang kinabuhi. Apan makakat-on kitag dugang mahitungod niini sa ulahi.