Ang Maalam Haring Solomon

SI Solomon maoy bayong pa sa nahimo siyang hari. Nahigugma siya kang Jehova, ug iyang gisunod ang maayong tambag nga gihatag kaniya sa iyang amahang si David. Si Jehova nahimuot kang Solomon. Usa ka gabii siya miingon kaniya sa usa ka damgo: ‘Solomon, unsay gusto mo nga ihatag ko kanimo?’

Niini, si Solomon mitubag: ‘Akong Diyos nga Jehova, ako batan-on pa kaayo, ug dili ako mahibalo unsaon sa pagmando. Busa hatagi ako sa kaalam sa pagmando sa imong katawhan sa matarong paagi.’

Si Jehova nahimuot sa gipangayo ni Solomon. Busa Siya miingon: ‘Tungod kay nangayo kag kaalam ug dili ang taas nga kinabuhi o pagkadato, ako mohatag nimog dugang kaalam kay kang bisan kinsa nga nabuhi sukad. Ug ako mohatag kanimog mga bahandi ug himaya.’

Sa mubong panahon sa ulahi, duha ka babaye miduol kang Solomon uban sa ilang malisod nga problema. Usa ka babaye misaysay: ‘Kining babayhana ug ako nagpuyo sa samang balay. Ako nanganak sa usa ka batang lalaki, ug duha ka adlaw sa ulahi siya nanganak usab ug batang lalaki. Usa ka gabii ang iyang bata namatay, apan samtang ako natulog, iyang gikuha ang akong bata ug gibilin kanako ang iyang patayng anak.’

Dinhi niini ang laing babaye miingon: ‘Dili! Ang buhing bata maoy akoa, ug ang patay maoy iyaha!’ Ug busa ang mga babaye nanaglalis. Unsa may buhaton ni Solomon?

Nagpakuha siyag usa ka espada, ug mimando: ‘Pikasa ang bata sa duha, ug ihatag sa matag babaye ang katunga niini!’

Ang tinuod inahan misinggit: ‘Ayaw! Palihog ayaw patya ang bata. Ihatag kini kaniya!’ Apan ang laing babaye miingon: ‘Ayaw ihatag kini sa bisan hain kanamo; padayon ug pikasa sa duha!’

Sa kataposan, si Solomon mihukom: ‘Ayawg patya ang bata! Ihatag siya sa unang babaye. Siya mao ang tinuod nga inahan.’ Si Solomon nahibalo niini tungod kay ang tinuod inahan nahigugma kaayo sa bata nga siya andam sa paghatag kaniya ngadto sa laing babaye aron siya dili mapatay. Sa dihang ang katawhan nakabati sa paagi ni Solomon sa pagsulbad sa problema, sila nalipay nga nakabaton sa ingon ka maalam nga hari.

Sulod sa pagmando ni Solomon, ang Diyos nagpanalangin sa katawhan. Adunay daghang pagkaon nga makaon. Ang katawhan nagsul-ob maayong mga sapot ug nagpuyo sa maanindot nga mga balay. Adunay kadagaya alang sa tagsatagsa.