Gibato si Esteban

ANG tawo nga nagluhod dinhi mao si Esteban. Siya usa ka matinumanong tinun-an ni Jesus. Apan tan-awa kanang mga lalaking naglabay ug dagkong mga bato kaniya! Nganong nagbuhat man sila ning mangilngig nga butang? Tan-awon ta.

Ang Diyos nagtabang kang Esteban sa paghimog kahibulongang mga milagro. Kining mga tawhana wala makagusto niini, busa sila nakiglantugi kaniya. Apan ang Diyos naghatag kang Esteban sa dakong kaalam, ug gipakita ni Esteban nga kining mga tawhana nagpanudlo sa bakak nga pagtulun-an. Kini nakapasamot sa ilang kasuko. Busa ilang gidakop siya ug gitawag ang katawhan aron mosultig mga bakak bahin kaniya.

Ang hataas saserdote nangutana kang Esteban: ‘Tinuod ba kining mga butanga?’ Si Esteban mitubag pinaagi sa paghatag usa ka maayong pakigpulong gikan sa Bibliya. Sa kataposan niini siya miingon: ‘Kamo pariha sa daotang mga tawo nga nagdumot sa mga manalagna sa Diyos kanhi. Inyong gipatay ang alagad sa Diyos, si Jesus.’

Kini nakapasuko kaayo sa relihiyosong mga pangulo! Apan unya si Esteban miingon: ‘Tan-awa! Nakita ko si Jesus nagtindog sa tuong kilid sa Diyos sa langit.’ Dinhi, kining mga tawhana nagdakop kang Esteban ug nagguyod kaniya sa gawas sa siyudad.

Dinhi ilang gihukas ang ilang mga kupo ug gihatag nila ngadto sa batan-ong lalaki si Saulo aron maatiman. Nakita mo ba si Saulo? Unya pipila sa mga tawo nagsugod sa pagbato kang Esteban. Si Esteban miluhod, ingon sa imong nakita, ug nag-ampo ngadto sa Diyos: ‘Jehova, ayaw silag siloti tungod ning daotang buhat.’ Nahibalo siya ang pipila kanila gitonto sa relihiyosong mga pangulo. Unya, si Esteban namatay.

Kon may usa ka tawong magbuhat ug daotan kanimo, mosulay ka bag balos sa pagpasakit kanila? Kana wala himoa ni Esteban o ni Jesus. Sulayan tang sundogon ang ilang panig-ingnan.