Kapitulo 14

‘Ako Naghimog Tugon Uban Kaninyo Alang sa Usa ka Gingharian’

1. Sa gabii antes sa kamatayon ni Jesus unsang kalaoman nga iyang gipahimutang atubangan sa iyang mga apostol?

KADTO sa gabii sa wala pa si Jesus patya nga iyang gisultihan ang iyang matinumanong mga apostol: ‘Sa balay sa akong Amahan adunay daghang puy-anan. Moadto ako aron sa pag-andam ug luna alang kaninyo, aron kon diin ako atua usab kamo.’ Siya dugang miingon ngadto kanila: “Ako maghimog tugon uban kaninyo, maingon nga ang akong Amahan naghimog tugon uban kanako, alang sa usa ka gingharian.” (Juan 14:2, 3; Luc. 22:29) Pagkamaayo kaayong kalaoman nga iyang gibutang sa ilang atubangan!

2. Pila ang mahiuban kang Kristo didto sa iyang langitnong Gingharian?

² Apan, wala ipasabot ni Jesus nga kadtong mga apostol lamang ang magmando uban kaniya didto sa iyang langitnong Gingharian. Sa ulahi gibutyag nga may 144,000 nga tinubos gikan sa yuta makahupot nianang dakong pribilehiyo. (Pin. 5:9, 10; 14:1, 4) Ang pipila ba karon nagapangagpas sa paghupot niana?

Pagpanigom sa mga Manununod sa Gingharian

3. Sa iyang publikong ministeryo, ngadto sa unsang kahigayonan nga si Jesus nagpaalinggat?

³ Human si Juan nga Bautista gibilanggo ni Herodes Antipas, si Jesus mihimog dakong kampanya sa pagsangyaw sa katilingban nga niana iyang gipunting “ang gingharian sa mga langit.” (Mat. 4:12, 17) Iyang gipahibalo ang katawhan nga adunay kahigayonan alang kanila sa pagsulod sa maong Gingharian, ug ang iyang mga tinun-an sa maikagon nangagpas alang sa maong ganti.​—Mat. 5:3, 10, 20; 7:21; 11:12.

4. (a) Kanus-a nga ang una sa mga tinun-an ni Jesus gidihogan sa balaang espiritu? (b) Sukad niadto unsay nagpakita nga ang pagtagad gipunting alang sa pagpanigom sa mga manununod sa Gingharian?

⁴ Sa Pentekostes sa 33 K.P. ang una niini kanila gidihogan ug balaang espiritu. (Buh. 2:1-4; 2 Cor. 1:21, 22) Ang tagana sa Diyos gibutyag alang sa kaluwasan nga motultol sa dili mamatay langitnong kinabuhi. Gigamit ni Pedro “ang mga yawi sa gingharian sa mga langit” sa pagbukas ning maong kahibalo​—una ngadto sa mga Hudiyo, sunod ngadto sa mga Samaritano, ug dayon ngadto sa katawhan sa Hentil nga mga nasod. (Mat. 16:19) Ang linaing pagtagad gihimo sa molangkob ug kagamhanan nga maoy momando sa katawhan sa 1,000 ka tuig, ug hapit tanan sa dinasig nga mga sulat sa Kristohanon Gregong Kasulatan unang gitumong ngadto niining grupoha sa mga manununod sa Gingharian​—“ang mga balaan,” “mga mag-aambit sa langitnong pagtawag.”a

5. Ang ila bang pagkatawag sa langitnong kinabuhi tungod kay sila mas maayong mga alagad sa Diyos kay kanilang nagkinabuhi kanhi?

⁵ Ang ilang pagkatawag ngadto sa langitnong kinabuhi dili tungod kay sila sa pila ka paagi mas maayo kay sa tanang alagad sa Diyos nga nangamatay na antes ang Pentekostes sa 33 K.P. (Mat. 11:11) Hinunoa, si Jehova sa maong panahon nagsugod sa pagpili niadtong mahimong kaubanang mga magmamando uban ni Jesu-Kristo. Sa mga 19 ka siglo human niini diha lamang ing usa ka pagtawag, ang pagkalangitnon. Kana maoy di-takos nga kalulot nga gituga sa Diyos diha sa limitadong gidaghanon sa katunhayan sa iyang kaugalingong maalamon ug mahigugmaong mga katuyoan.​—Efe. 2:8-10.

6. (a) Nganong kinahanglang moabot ang panahon nga ang langitnong pagtawag matapos na? (b) Kinsa ang magpaigo sa mga butang aron ang tagna maylabot sa “dakong panon” mamatuman usab, ug unsa man gayod ang nagakahitabo?

⁶ May panahon nga ang gitakda apan limitadong gidaghanong 144,000 mapuno na. Ang ultimang pagtimbre ning maong espirituwal nga mga Israelita ingong inuyonan haduol na. (Pin. 7:1-8) Unya si Jehova, pinaagi sa iyang espiritu ug sa pagsabot sa iyang Pulong nga gihimo niyang posible alang sa iyang makitang organisasyon, magpaigo sa mga butang aron tumanon ang laing bahin sa iyang katuyoan, ingon sa gihubit sa Pinadayag 7:9-17. Ang usa ka “dakong panon” nga gikan sa tanang kanasoran pagatigomon, uban sa kulba-hinam nga kalaoman sa paglabang-buhi sa dakong kasakitan ug pagpuyo sa walay kataposan diha sa kahingpitan taliwala sa yutan-ong Paraiso. Sa dihang atong tagdon kon unsa gayod ang nahitabo, daw madayag nga ang langitnong pagtawag sa linangkob nakompleto sa tuig 1935 K.P., sa dihang ang yutan-ong paglaom sa “dakong panon” tin-aw nga nasabtan. Sukad niadto mga menilyon sa mga magsisimba ni Jehova kinsa maikagong nagalaom sa pagpuyo sa walay kataposan dinhi mismo sa yuta ang gidala sa pagpakig-uban sa matandiong pipila ka libo nga mga nanghibilin sa maong langitnong matang.

7. Posible ba nga ang pipila bisan karon mahimong makadawat sa langitnong pagtawag, ug nganong ingon niana ang imong tubag?

⁷ Kini ba nagakahulogan nga wala na karoy tawgon sa Diyos alang sa langitnong kinabuhi? Hangtod mahimo ang ultimang pagtimbre, posible nga ang pipila nga naghupot nianang paglaoma dili magpabiling matinumanon, ug ang uban kinahanglang pilion aron ipuli sa ilang dapit. Pero maorag makataronganon nga kini talagsa rang hitabo.

Espirituwal nga mga Anak​—Unsaon Nila Pag-ila?

8. Unsang pagpatin-aw ang gihatag ni Pablo sa pagpakita kon sa unsang paagi silang gipanganak sa balaang espiritu nakaila nianang kamatuorana?

⁸ Ang espiritu sa Diyos mohatag ug positibong panghimatuod sa pagsagop ingong espirituwal nga mga anak ngadto sa bawtismadong mga Kristohanon nga nakadawat ug langitnong pagtawag. Gipakita kini ni apostol Pablo sa misulat siya ngadto sa “mga balaan” sa Roma, nga naghubit niadtong panahona kon unsa ang kahimtang sa tanang matuod nga mga Kristohanon. Siya miingon: “Ang tanang gimandoan sa espiritu sa Diyos, kini sila mga anak sa Diyos. Kay wala kamo makadawat sa espiritu sa pagkaulipon aron mangahadlok na usab kamo, apan maoy nadawat ninyo ang espiritu sa pagkasinagop ingong mga anak, nga nianang espirituha kita managtuwaw: ‘Abba, Amahan!’ Ang espiritu mismo magapamatuod uban sa atong espiritu nga kita mga anak sa Diyos. Nan, kon kita mga anak, kita usab mga manununod: mga manununod gayod sa Diyos, pero kaubanang mga manununod uban ni Kristo, basta kita duyog nga moantos aron usab kita duyog nga pagahimayaon.”​—Roma 1:7; 8:14-17.

9. Sa unsang paagi ‘ang espiritu mismo nagapamatuod’ uban sa espiritu niadtong kinsa tinuod nga mga anak sa Diyos?

⁹ Ang duha ka paggamit sa pulong “espiritu” gipaalinggat kanato dinhi: “ang espiritu mismo” ug “atong espiritu.” Ang una mao ang dili makitang aktibong puwersa sa Diyos. Kana nagadasig diha sa iyang espirituwal nga mga anak ug hugot nga pagtuo nga gisagop ingong linuwas nga mga anak sa Diyos. Ang maong espiritu magpamatuod usab pinaagi sa dinasig nga Pulong sa Diyos, ang Bibliya, nga maorag personal nga sulat ngadto sa iyang espirituwal nga mga anak. (1 Ped. 1:10-12) Sa dihang kadtong gipanganak pinaagig balaang espiritu mobasa sa giingon sa Kasulatan alang kanilang kinsa mga espirituwal nga anak sa Diyos, sila sa tukma mosanong: ‘Kana mapadapat kanako.’ Busa ang kaugalingong aktibong puwersa sa Diyos diha sa lainlaing mga paagi magpamatuod uban sa ilang espiritu, ang nagatukmod nga puwersa sa ilang kaugalingong hunahuna ug kasingkasing, nga sila maoy mga anak sa Diyos. Subay sa ginabutyag diay sa espiritu sa Diyos, ang ilang mga hunahuna ug mga kasingkasing mapatuhop sa kalaoman sa pagkahimong kaubanang mga manununod uban ni Kristo, ug ilang dawaton ang mga kaakohan nga iya sa espirituwal nga mga anak sa Diyos.​—Filip. 3:13, 14.

10. (a) Unsang mga puntos nga dili kana mismo magbutyag sa usa ka tawo ingong dinihogang Kristohanon? (b) Unsang tinamdan ang gihuptan sa “ubang mga karnero” maylabot sa ilang dapit diha sa katuyoan sa Diyos?

¹⁰ Kana ba tinuod alang kanimo? Kon mao, ikaw adunay talagsaong pribilehiyo. Apan, usa ka sayop alang kang bisan kinsa sa pagkanayon nga sanglit ang usa ka tawo adunay dulot nga pagpabili sa mas lalom espirituwal nga mga butang o masiboton sa ministeryo sa kanataran o adunay dakong gugma sa iyang mga igsoon nga siya gayod diay usa ka dinihogan-espiritu nga Kristohanon. Ang maong mga butang ginabuhat man sa daghan sa “ubang mga karnero.” Ang ilang kasingkasing, usab, gipalihok sa ilang nabasa diha sa Kasulatan maylabot sa kaubanang mga manununod ni Kristo, pero wala sila mangahas sa pag-angkon sa ilang kaugalingon nianang butang nga wala itagana sa Diyos kanila. (Itanding Numeros 16:1-40.) Ilang giila ang orihinal nga katuyoan sa Diyos para sa yuta ug mapabilhong nagahago diha sa pagpakig-ambit niana.

Takos nga Pag-ambit

11. Kinsa ang nagatambong sa tinuig nga kasaulogan sa kamatayon ni Jesus, ug ngano?

¹¹ Sa kada tuig, sa Nisan 14, human sa pagsalop sa adlaw, ang dinihogang mga sumusunod ni Jesu-Kristo sa tibuok nga yuta nagasaulog sa iyang kamatayon, uyon sa mga instruksiyon nga iyang gihatag sa iyang mga apostol. (Luc. 22:19, 20) Ang “ubang mga karnero” usab magatambong, dili ingong mga tig-ambit sa tinapay ug bino, kondili ingong matinahorong mga maniniid.

12. Sa unsang paagi ang pipila sa unang mga Kristohanon sa Corinto napakyas sa pagpakitag hustong pagpabili sa Panihapon sa Ginoo?

¹² Dili kini kawang relihiyosong rituwal kondili maoy puno sa mapuslanong kahulogan. Ngadto sa una-siglong mga Kristohanon sa Corinto, Gresya, nga ang pipila kanila napakyas sa pagpakitag hustong pagpabili sa maong okasyon, ang apostol nga si Pablo misulat ug maligdong nga tambag, nga nag-ingon: “Bisan kinsa nga magakaon sa tinapay ug magainom sa kopa sa Ginoo sa paagi nga dili takos makasala maylabot sa lawas ug dugo sa Ginoo.” Unsa may nagpahimo nilang ‘dili takos’ nga mga tig-ambit? Sila wala mangandam sa haom nga paagi diha sa ilang kasingkasing ug hunahuna. Dihay mga pagbahinbahin sa kongregasyon. Labot pa ang pipila nagpahutak sa kalan-on ug ilimnon antes ang maong miting. Ilang giisip ang Panihapon sa Ginoo nga mapasagaron. Wala sila sa kahimtang sa pag-ila sa hinungdanong kahulogan sa tinapay ug sa bino.​—1 Cor. 11:17-34.

13. Unsa ang kahulogan sa tinapay ug bino nga ginasilbe sa panahon sa Memoryal?

¹³ Unsa ang kahulogan niana? Dili kana ibase sa bisan unsang gikaingong milagrosong kabalhinan sa tinapay ug sa bino. Si Kristo dili sa bisan unsang kahulogan ihalad pag-usab sa kada Memoryal. Ang Kasulatan nag-ingon nga “si Kristo gihalad makausa sa tanang panahon aron sa pagpas-an sa kasal-anan sa daghan.” (Heb. 9:28; 10:10; Roma 6:9) Ang piraso sa walay lebadurang tinapay ug pulang bino maoy mga emblema lamang sa pagrepresentar sa tinuod nga lawas ni Jesus nga gihalad ug sa tinuod nga dugo nga iyang giula. Pero pagkabililhon ning maong mga katinuoran! Ang walay salang tawhanong lawas ni Jesus gitugyan aron ang kalibotan sa katawhan makabaton ug kahigayonan sa pagkabuhi sa walay kataposan. (Juan 6:51) Ug ang iyang giulang dugo nagasilbe ug duha ka katuyoan​—paghinlo gikan sa sala niadtong mga tawo nga nagatuo niana, pagpalihok usab sa bag-ong tugon tali sa Diyos ug sa kongregasyon sa espirituwal nga Israel, nga gilangkoban sa dinihogan-espiritu nga mga Kristohanon. (1 Juan 1:7; 1 Cor. 11:25; Gal. 6:14-16) Mao kining bililhong mga tagana nga magpahimong posible sa mga membro sa “gamayng panon” sa paghimo sa Diyos kanila nga matarong, nga ang tawhanong kahingpitan sa aktuwal gipaangkon kanila. (Luc. 12:32) Kini gibuhat aron sila ikapanganak pinaagig balaang espiritu ingong mga anak sa Diyos, uban sa panglantaw sa ilang pagduyog uban ni Kristo sa langitnong Gingharian. Sa ilang pagsalo sa mga emblema sa Memoryal sa kada tuig, nga niana nagapamatuod sa ilang langitnong paglaom, ang ilang pagpabili sa pagduyog sa “bag-ong tugon” nga gipataliwad-an ni Kristo mapalunhaw ug mapadulot.​—Heb. 8:6-12.

“Kami Mouban Kaninyong Katawhan”

14. (a) Ngano ang “ubang mga karnero” dili makig-ambit sa mga emblema sa Memoryal, pero unsa ang maikagon nilang gipaabot? (b) Giunsa nila pagtamod ang ilang pakig-uban sa nanghibiling mga manununod sa Gingharian?

¹⁴ Ang “ubang mga karnero” nakasabot kon giunsa ni Jehova sa pagdumala sa iyang mga dinihogan, ug sila miduyog kanila, nga nag-ingon: “Kami mouban kaninyong katawhan, kay kami nakadungog nga ang Diyos nagauban kaninyong katawhan.” (Zac. 8:20-23) Dili lang sila duyog nga nagapakigtigom kondili sila duyog man nga nagapakig-ambit sa pagmantala sa maayong balita sa Gingharian diha sa tibuok pinuy-anang yuta. Apan, ang “ubang mga karnero” wala ipasulod sa “bag-ong tugon” uban sa espirituwal nga Israel ni sila gilakip diha sa “tugon . . . alang sa usa ka gingharian” nga gilangkoban ni Jesus uban kanilang gipili nga moambit uban kaniya sa langitnong kinabuhi, ug busa, sa husto, sila dili mopakig-ambit sa mga emblema sa Memoryal. (Luc. 22:20, 29) Pero sa makab-ot na sa “bag-ong tugon” ang katuyoan niini, ang pagtigom sa kataposang mga membro sa “gamayng panon” ngadto sa langitnong Gingharian, ang “ubang mga karnero” makaamgo nga kini nagapakita nga ang mga panalangin nga ilang dawaton ibabaw sa yuta pinaagi nianang Ginghariana nagakaduol na. Ilang isipon kana nga usa ka pribilehiyo, sulod sa “kataposang mga adlaw,” sa pag-alagad nga mausahon uban sa maunongong nanghibilin sa mga manununod sa Gingharian.

[Mga footnote]

Repasong Panaghisgot

● Nganong kadaghanan gayod sa Kristohanon Gregong Kasulatan nagpunting sa langitnong paglaom?

● Sa unsang paagi silang gipanganak ingong mga anak sa Diyos nakaila niana? Unsa ang kahulogan sa mga emblema sa Memoryal nga sila nagapakig-ambit?

● Giunsa sa pagpasundayag sa “ubang mga karnero” nga sila tinuod nga nahiusa uban sa “gamayng panon”?