Kapitulo 19
“Kami Nakadungog nga ang Diyos Nagauban Kaninyo”
“KAMI mouban kaninyo, kay kami nakadungog nga ang Diyos nagauban kaninyo.” Mao kanay gitagna sa Bibliya nga maoy ipahayag sa katawhan sa tanang kanasoran sa atong adlaw. (Zacarias 8:23) Ug kinsa kini nga Diyos nga gipunting sa tagna ni Zacarias? Kita wala pasagding magduhaduha. Niining gamay nga basahon sa Bibliya ang iyang personal nga ngalan makita 135 ka beses. Kini mao ang JEHOVA!
2 Mao kini ang iyang gipamulong mahitungod sa iyang personal nga ngalan, Jehova: “Kini mao ang akong ngalan sa walay kataposan, ug mao kini ang handumanan kanako sa tanang kaliwatan.” (Exodo 3:15) Ang pagkabililhon nianang ngalana gipaila sa kamatuoran nga kini makita hapit 7,000 ka beses sa bug-os Hebreohanong teksto sa Bibliya—mas daghan pa kay sa bug-os nga gidaghanon sa mga titulo sama sa Ginoo ug Diyos. Sumala sa gitagna, karong “kataposang mga adlaw” nga tagsaong nalangkit kanang ngalana sa usa ka grupo sa katawhan.
“KAMI MOUBAN KANINYO”
3 Mahitungod niini, ang manalagnang si Zacarias, sa panahon sa pagtukod pag-usab sa templo ni Jehova sa karaang Jerusalem, gidasig sa Diyos sa pagsulat: “Mao kini ang giingon ni Jehova sa mga panon, ‘Mahitabo pa nga ang mga katawhan ug mga pumoluyo sa mga siyudad moanhi; ug ang mga pumoluyo sa usa ka siyudad moadto sa usa, nga magaingon: “Mangadto kita sa madali sa pagpangamuyo sa kaluoy ni Jehova ug sa pagpangita kang Jehova sa mga panon. Ako moadto usab.” Ug daghang mga katawhan ug mga makusganong nasod nga moadto sa pagpangita kang Jehova sa mga panon didto sa Jerusalem ug sa pagpangaliya sa kaluoy ni Jehova.’ Mao kini ang giingon ni Jehova sa mga panon, ‘Niadtong mga adlawa mahitabo nga napulo ka tawo gikan sa tanang pinulongan sa mga nasod mokupot, oo, mokupot sa sidsid sa usa ka tawo nga Hudiyo, nga magaingon: “Kami mouban kaninyo, kay kami nakadungog nga ang Diyos nagauban kaninyo.”’”—Zacarias 8:20-23.
4 Ang limitadong katumanan niini nga tagna maylabot sa pagtukod pag-usab sa templo sa Jerusalem, sugod sa mga adlaw ni Zerubabel, nagpunting sa unahan sa mas dakong katumanan sa atong adlaw. Maylabot niadto nga katawhan? Siyempre dili makataronganon alang sa mga “nagapangita kang Jehova” sa pagdangop sa mga tawo kinsa sa matuotuohon modumili gani sa paglitok sa ngalan sa Diyos, sama sa gihimo sa lumad nga mga Hudiyo kinsa nagpabilin sa ilang naandang pagsimba. Ni sa Kakristiyanohan, nga nagasundog sa batasan sa mga Hudiyo sa paglikay sa paggamit sa balaang ngalan. Dili sa yutan-ong Jerusalem nga maoy gidangpan sa katawhan sa atong panahon sa pagsimba kang Jehova. Sumala sa gitagna ni Jesus, gitalikdan sa Diyos ang iyang templo didto, ug kadto nalaglag sa 70 K.P., nga wala na gayod natukod pag-usab hangtod karong adlawa. Kini nagpakita sa tanang makataronganong tawo nga ang Diyos wala diha sa dili-Kristohanong Israel.—Mateo 23:37, 38; itandi sa 1 Hari 9:8, 9.
5 Ang “Jerusalem” nga karon naghawas kang Jehova gibatbat diha sa Hebreohanon 12:22 ingong “siyudad sa buhi nga Diyos, ang langitnong Jerusalem.” Sama nga usa ka makitang simbolo ang karaang Jerusalem sa pagmando ni Jehova, ang “langitnong Jerusalem,” sa ingon mao ang Mesiyanikong Gingharian sa Diyos nga niini si Jesu-Kristo mao ang naentronong Hari sa kataposan sa Panahon sa mga Hentil sa 1914. (1 Cronicas 29:23; Lucas 21:24) Kanang maong kagamhanan may mga hawas dinhi sa yuta, sila nga maunongong nagawali niini ingon nga mao lamang ang paglaom sa katawhan. Ang una nga mopahayag nga natukod na ang Gingharian sa 1914 mao ang mga nanghibilin sa “gamayng panon.” Kini sila mao “ang Israel sa Diyos,” sa espirituwal nga pagkasulti. Sila mao ang espirituwal nga ‘mga Hudiyo’ nga mahitungod kanila si Zacarias nanagna. (Lucas 12:32; Galacia 6:16; Roma 2:28, 29) Sukad sa 1931, tungod sa ilang gugma sa Diyos ug sa ilang pagpabili sa kaakohan sa pagpahibalo nga si Jehova mao ang tinuod ug Labing Gamhanan nga Diyos, ilang gidawat ang ngalang mga Saksi ni Jehova.—Isaias 43:10, 12.
UNSAON SA PAG-ILA?
6 Ingong resulta sa kamatuoran nga kining espirituwal nga mga Hudiyo maunongong nakatuman sa ilang kaakohan ingong mga Saksi ni Jehova, minilyon sa sinserong mga tawo sa tibuok-yuta natabangan sa “pagpangita kang Jehova.” Sila nakadangat sa kahibalo nga si Jehova tinuod nga nagauban niining mga tawhana nga nagadala sa iyang ngalan. Unsay nakakombinsir kanila mahitungod niini? Daghang mga butang, diin taliwala kanila kini mao ang nangibabaw:
(1) Ang tanang mga pagtuo sa mga Saksi ni Jehova gibase sa Bibliya—dili lamang sa talagsang mga teksto kondili sa tibuok Pulong sa Diyos. Inay manudlog mga butang gikan sa ilang kaugalingon, tubagon sa mga Saksi ni Jehova ang mga pangutana pinaagi sa pagpunting kon unsay gipamulong sa Bibliya. Ilang gihimaya si Jehova pinaagi sa pagpasulti kaniya. (Itandi sa Juan 7:16-18.)
(2) Ang Bibliya nag-ingon nga ang Diyos mosagop gikan sa nasod ug “katawhan alang sa iyang ngalan.” (Buhat 15:14) Sila nagasangpit sa iyang ngalan ug makugihon sa pagpaila niini sa tibuok yuta. (Isaias 12:4, 5) Sa tibuok-yuta, ang mga Saksi ni Jehova maoy mga katawhan nga ilabinang nalangkit sa personal nga ngalan, Jehova.
(3) Ang mga Saksi ni Jehova adunay daghang makatagbawng espirituwal nga pagkaon. Ang ilang nakat-onan gikan sa Kasulatan ug ang epekto niini diha sa ilang panglantaw sa kinabuhi nakahimo kanilang malipayong katawhan, nga lahi sa kalibotan sa kinatibuk-an. Mao kanay gipamulong ni Jehova mahitungod sa iyang tinuod nga mga alagad.—(Isaias 65:13, 14; itandi sa Mateo 4:4.)
(4) Gigamit sa mga Saksi ni Jehova ang Pulong sa Diyos nga maoy ilang sukdanan sa paggawi ug sa paggiya sa ilang mga desisyon sa adlaw-adlawng mga kalihokan sa kinabuhi—diha sa ilang mga pamilya, sa trabahoan, sa tunghaan, sa pagpilig kalingawan, sa pag-ila sa mga buhat nga likayan, sa pagtino sa labing mapuslanong mga kalihokan nga buhaton. Si Jehova misaad nga “iyang tul-iron ang mga alagianan” niadtong mobuhat niini. (Proverbio 3:5, 6)
(5) Ang pagdumala sa mga kongregasyon sa mga Saksi ni Jehova gisunod gikan sa unang-siglong kongregasyon sa Diyos, nga niini ang mga ansiano maoy mga panig-ingnan sa panon ug sa isigkamamumuo alang sa Gingharian sa Diyos inay tinuboy nga klerong matang. (1 Pedro 5:2, 3; 2 Corinto 1:24)
(6) Ang mga Saksi ni Jehova wala makiglabot sa mga kalihokan sa politika sa kalibotan apan nagabuhat sa buluhaton nga gihatag alang sa tinuod nga mga Kristohanon, nga mao, ang pagwali sa maayong balita sa Gingharian sa Diyos sa tibuok yuta alang sa pagpamatuod sa dili pa moabot ang kataposan. (Mateo 24:14; itandi sa Juan 17:16; 18:36.)
(7) Ang mga Saksi ni Jehova tinuod nga naghigugmaay sa usag usa, sumala sa gipamulong ni Jesus nga maoy buhaton sa iyang tinuod nga mga tinun-an. Ang kolor sa panit, kaliwat, mga kahimtang sa ekonomiya, nasyonalidad, pinulongan—dili kini hinungdan sa pagtamay sa usag usa. Bisan pa sa pagkadili-hingpit sa tawo, sila tinuod nga nahiusa sa internasyonal nga panag-igsoonay, ug tungod niini ilang gihatag ang tanang pasidungog ngadto sa Diyos. (Juan 13:35; itandi sa Buhat 10:34, 35.)
(8) Sama sa unang mga Kristohanon, ang mga Saksi karong mga adlawa nagapadayon sa pag-alagad sa Diyos bisan pa sa paglutos. Masaligon sa Diyos, sila dili mobalos sa mga magsusupak. Sama sa nahitabo sa miagi, ang Diyos napamatud-ang nagauban sa iyang mga alagad sa pagluwas kanila. (Jeremias 1:8; Isaias 54:17)
7 Mao kini ang pipila ka mga rason, kon ngano, sumala sa gitagna, “ang napulo ka lalaki sa tanang pinulongan sa kanasoran” namulong uban sa tinuod nga pagtuo ngadto sa nanghibilin sa mga manununod sa Gingharian: “Kami mouban kaninyo, kay kami nakadungog nga ang Diyos nagauban kaninyo.” (Zacarias 8:23) Gigamit sa Kasulatan ang “napulo” sa paghawas sa pagkakompleto maylabot sa yutan-ong mga butang, busa kining “napulo ka lalaki” naghawas sa tanang nanagdawat sa tinuod nga pagsimba karon uban sa dinihogan sa espiritu nga “mga igsoon” ni Kristo. Sila dili kay yanong nakig-uban lamang ingong mga magsisimba sa ilang Diyos, si Jehova. Ilang gipahinungod ang ilang kaugalingon kaniya pinaagi kang Jesu-Kristo ug gipasimbolohan kini pinaagi sa bawtismo sa tubig, ug busa nagapasundayag nga sila buot nga “mahimong kauban ni Jehova.” Dayon malipayon silang nagapakigbahin sa buluhaton nga ginahimo sa tibuok kalibotan pinaagi sa iyang mga saksi.—Zacarias 2:11; Isaias 61:5, 6.
MGA PANIG-INGNAN NGA TAKOS SUNDOGON
8 Ang uban nga mihimo niini kaamgid sa reyna sa Sheba sa mga adlaw ni Solomon. Gikan sa halayong lugar siya “nakadungog sa kahimtang ni Solomon maylabot sa ngalan ni Jehova.” Siya wala pa sukad sa personal nakapakigsulti kang Solomon ni nakaduaw siya sa templo ni Jehova sa Jerusalem. Nagduhaduha siya kon ang tanan ba sama ka maayo sumala sa iyang nadunggan. Apan naningkamot siya sa pagsusi, mibiyahe tingali mga 1,400 ka milya (2,250 km) pinaagig kamelyo. Iyang nakita ang mga tubag sa tanan niyang “gikalibgang mga pangutana” ug miingon: “Tan-awa! ang katunga wala isugilon kanako.” Wala gayod siyay mahimo kondili sa pagtuo nga gimahal ni Jehova ang iyang mga magsisimba. (1 Hari 10:1-9) Ang uban nga ilado sa kalibotan misundog sa iyang panig-ingan karon, ug daghan pa ang nagahimo niini sa mas ubos nga mga kahimtang. Ilang nakita ang pamatuod nga walay tawong gilantaw ang mga Saksi ni Jehova kondili si Jesu-Kristo, ang Mas Dakong Solomon, ingong ilang Hari. Ang mga tubag nga gihatag kanila gikan sa Pulong sa Diyos nakatagbaw sa ilang mga hunahuna ug mga kasingkasing, ug sila napukaw sa pakigduyog sa ilang mga tingog sa pagdayeg kang Jehova.—Itandi sa Lucas 11:31.
9 Ang uban sama kang Rahab sa Jericho, komsibido gikan sa mga taho nga nadawat nga ang Diyos sa Israel mao ang “Diyos sa langit sa kahitas-an ug dinhi sa ilalom sa yuta.” (Josue 2:11) Dihang misulod ang mga espiya sa yuta, iyang gidawat sila, gitago sila ug gipameligro ang iyang kinabuhi sa pagpanalipod kanila. Siya may pagtuo ug gipamatud-an kini pinaagi sa iyang mga binuhatan, ug mibarog uban sa katawhan ni Jehova. (Hebreohanon 11:31; Santiago 2:25) Mainampingon niyang gisunod ang mga instruksiyon nga gihatag aron siya maluwas. Nagpakita usab si Rahab ug mahigugmaong pagtagad sa iyang amahan ug inahan, sa iyang mga igsoong lalaki ug mga igsoong babaye, nga nagbukas sa dalan alang kanila aron maluwas kon ilang sundon ang mga kinahanglanon alang sa kaluwasan. (Josue 2:12, 13, 18, 19) Ingong resulta siya ug ang iyang panimalay giluwas dihang ang Jericho ug ang mga pumoluyo nga maninimba ni Baal gilaglag. (Josue 6:22, 23) Kini adunay gamhanang kahulogan sa atong adlaw. Kini nagpasundayag nga luwason ni Jehova ang mga tawong sama kang Rahab. Unsay nagpakita nga kaamgid sila kaniya? Sila nagpakitag pagtuo kang Jehova, nagpaila sa ilang kaugalingon nga mga sakop sa espirituwal nga Israel, nga nagasunod pag-ayo sa mga pagtultol nga gihatag pinaagi niini nga alagianan ug tim-os nga naningkamot sa pagtabang sa duol nga mga sakop sa panimalay ug sa ubang mga paryente sa pagtan-aw sa kaalam sa pagbuhat niini.
10 Siyempre, ang tinuod nga pangdani, nga nakaagak sa katawhan sa tanang kanasoran sa pagpakig-uban sa mga Saksi ni Jehova, mao si Jehova nga Diyos mismo. Ang iyang Pulong madanihon kanila. Ang bunga sa iyang espiritu sa mga kinabuhi sa iyang mga alagad madanihon kanila. Dihang masinati pa nilag dugang ang iyang mga hiyas ug ang iyang mga pakig-atubang sa mga katawhan, gipangandoy nila ang panahon dihang ang ngalan sa Diyos mabayaw gikan sa tanang mga pagpasipala nga gihatag diha niini ni Satanas ug sa walay pagtuong mga tawo. Sila nagapaningkamot sa paghimo sa ilang mga kalihokan sa paagi nga kahimut-an sa ilang Maglalalang ug nga mopalihok sa uban sa paghimaya kaniya. (1 Pedro 2:12) Uban sa bug-os nilang mga kasingkasing sila nag-ampo, ingon sa gitudlo ni Jesus sa iyang mga tinun-an: “Amahan namo nga anaa sa langit, balaana ang imong ngalan. Paanhia ang imong gingharian. Ipatuman ang imong kabubut-on, sa langit, maingon man usab sa yuta.” (Mateo 6:9, 10) Ug, sibo sa ilang pag-ampo, sila naghatag ug balaang pag-alagad sa Diyos nga bug-os nga nahiusa niadtong mihatag ug malig-ong ebidensiya nga sila mao ang “katawhan alang sa ngalan ni [Jehova].”
[Mga Pangutana nga Pagatun-an]
1, 2. (a) Unsay gitagna sa Zacarias 8:23 mahitungod sa atong adlaw? (b) Kinsa ang Diyos nga gipunting dinhi, ug sa unsang paagi gipasiugda sa Bibliya ang iyang personal nga ngalan?
3. Sumala sa gitagna sa Zacarias 8:20-23, (a) kinsa ang nagapangita kang Jehova? (b) ug pinaagi sa pagpakig-uban kang kinsa?
4. Nganong dili aplikado kining tagnaa sa Judaismo o sa Kakristiyanohan?
5. Sa unsang paagi gipaila sa Kasulatan (a) ang “Jerusalem” nga naghawas kang Jehova karon? (b) ang “tawo nga Hudiyo” nga gitagna ni Zacarias?
6. (a) Unsay nakakombinsir sa minilyong katawhan bahin sa ilhanan sa katawhan nga giubanan sa Diyos karon? (Hisgoti ang tagsatagsa ka punto; basaha ang mga teksto.) (b) Unsang mga punto ang labing nakapukaw kanimo?
7. (a) Kinsa ang “napulo ka lalaki”? (b) Sa unsang paagi ilang gipamatud-an nga si Jehova tinuod nga nahimo nilang Diyos?
8. (a) Unsay nakatukmod sa reyna sa Sheba sa pagbiyahe ngadto sa Jerusalem? (b) Unsay iyang gihimo dihang miabot siya, ug unsa ang resulta? (c) Sa unsang paagi napamatud-ang adunay katawhan nga sama kaniya sa atong adlaw? (Salmo 2:10-12)
9. (a) Sa unsang paagi lahi ang tinamdan ni Rahab gikan sa reyna sa Sheba? (b) Unsa ang takos timan-an maylabot sa mga hitabo nga nakahatag kaluwasan kang Rahab ug sa iyang panimalay? (c) Unsay ilhanan sa mga tawong sama kang Rahab karon?
10. (a) Sumala sa gipakita sa tagna ni Zacarias, unsa ang nakadani sa mga tawo nga tungod niana sila nakig-uban sa mga Saksi ni Jehova? (b) Sa unsang paagi atong ikapakita, sa tinamdan ug sa mga aksiyon, nga puno ang atong mga kasingkasing sa gugma alang kang Jehova?