Tibuok-Kalibotang Kasegurohan Ilalom sa “Prinsipe sa Pakigdait”

Kapitulo 12

Ang Bag-ong Pakigsaad sa Diyos Hapit Nang Matapos

UNSAY atong buhaton kon wala pa motuman ang Diyos sa iyang pakigsaad bahin sa adlaw ug bahin niadtong sa gabii? Imbes adunay pag-ilis-ilis sa adlaw ug gabii, ang atong yuta madan-agan sa padayong kahayag o matabonan sa padayong kangitngit. (Genesis 1:1, 2, 14-19) Apan maunongong mibarog ang Diyos sa iyang mga pakigsaad. Busa makatino kita nga ang adlaw, bulan, ug mga galaksiya sa kalangitan dili gayod laglagon; ni ang atong planetang Yuta.

² Naghisgot sa iyang pakigsaad bahin sa adlaw ug bahin niadtong sa gabii, ang Diyos miingon sa mga Hudiyo ilalom sa gingharian sa harianong banay ni David: “Kon kamo makabungkag sa akong pakigsaad bahin sa adlaw ug sa akong pakigsaad bahin niadtong sa gabii, sa pagkaagi nga walay adlaw ug gabii sa ilang panahon, nan ang ako usab nga tugon uban kang David nga akong alagad pagabungkagon aron siya walay anak nga mohari sa iyang trono.”—Jeremias 33:20, 21.

³ Niadtong mga pulonga kita adunay dili-direktang pamatuod nga ang atong yuta, lakip sa adlaw ug sa bulan, magpabilin sa walay kataposan. (Ecclesiastes 1:4) Ang atong yuta padayong pagapuy-an sa mga tawo, aron ilang tagamtamon ang katahom sa adlaw ug sa gabii ilalom sa nagatuman sa pakigsaad nga Diyos, ang Maglalalang sa tawo. Ug sama nga nagpabiling malig-on si Jehova sa iyang pakigsaad sa adlaw ug sa gabii, sa ingon nagpabilin siyang maunongon sa iyang pakigsaad uban sa karaang Haring David alang sa walay kataposang Gingharian sa linya sa pamilya ni David. Matuod kini bisan pa nga ibalhin ang lingkoranan sa Gingharian gikan sa yuta ngadto sa dili-makitang langit.—Salmo 110:1-3.

⁴ Ang pakigsaad sa Diyos ug walay kataposang Gingharian sa linya sa kaliwat ni David nalangkit sa laing pakigsaad, “ang bag-ong pakigsaad.” Kining maong pakigsaad maoy mipuli sa daang pakigsaad nga gihisgotan ni Jesus. Nahitabo kini tapos nga iyang gisaulog ang Hudiyohanong Paskua uban sa iyang matinumanong mga disipulo sa gabii sa Nisan 14 sa 33 K.P. Iyang gisugdan ang gitawag sa ulahi nga “ang panihapon sa Ginoo.” Siya nasayod nga, nianang mismo gihapong adlaw sa Paskua, iyang igaula ang iyang dugo ingong halad. Busa, siya mikuha ug kopa sa mapula nga bino, apan sa wala pa kini ipasa ngadto sa iyang matinumanong mga apostoles, siya miingon: “Kining kopa nagkahulogan sa bag-ong pakigsaad pinaagi sa akong dugo.”—Lucas 22:20; 1 Corinto 11:20, 23-26.

⁵ Sama sa daang pakigsaad, ang bag-ong pakigsaad gisaad diha sa usa ka nasod apan dili diha sa bisan unsang mga nasod sa Kakristiyanohan. Bisan pa nga ang saad sa bag-ong pakigsaad gihimo pinaagi ni propetang Jeremias ngadto sa nasod sa Israel kapin sa 2,500 ka tuig kanhi, ang Republika sa Israel karon wala mangangkon nga ilalom sa bag-ong pakigsaad. Hinunoa, ang Republika sa Israel nahimong sakop sa HK.

⁶ Nganong nagtinguha ang Diyos ug bag-ong pakigsaad? Ang Jeremias 31:31-34 nagbatbat: “‘Tan-awa! Ang mga adlaw moabot na,’ nagaingon si Jehova, ‘nga ako magabuhat ug usa ka bag-ong pakigsaad uban sa balay sa Israel ug uban sa balay sa Juda; dili sama sa pakigsaad nga gibuhat ko uban sa ilang mga amahan sa adlaw nga giagak ko sila sa kamot sa pagpagula kanila gikan sa yuta sa Ehipto, “nga ang maong pakigsaad ilang gilapas, bisan ako mao ang ilang bana,” nagaingon si Jehova.’ ‘Kay kini mao ang pakigsaad nga pagabuhaton ko uban sa balay sa Israel tapos niadtong mga adlawa,’ nagaingon si Jehova. ‘Ibutang ko ang kasugoan sa ilang sulod nga bahin, ug diha sa ilang kasingkasing kini isulat ko. Ug ako mahimong ilang Diyos, ug sila mahimong akong katawhan. Ug dili gayod sila magtudlo ang tagsatagsa ka tawo sa iyang igsoon, sa pag-ingon, “Ilhon mo si Jehova!” kay silang tanan managpakaila kanako, gikan sa labing diyutay kanila ngadto sa labing dako kanila,’ nagaingon si Jehova. ‘Kay pasayloon ko ang ilang kasal-anan, ug dili na gayod hinumdoman ko ang ilang sala.’”

Usa ka Labi pa ka Maayong Pakigsaad nga may Labi pa ka Maayong Tigpataliwala

⁷ Ang bag-ong pakigsaad dili kay usa lamang ka yanong kausaban sa mas unang pakigsaad nga gilapas sa mga Israelitas. Dili, gayod! Kay si apostol Pablo misulat ngadto sa mga Kristohanon sa Roma, nga nagaingon: “Dili kamo ilalom sa kasugoan kondili ilalom sa dili-takos nga kalulot.” (Roma 6:14) Tinuod nga bag-o kini nga pakigsaad, ug gilaoman nga labi pa kini ka maayo, kay ang Labing Makagagahom nga Diyos si Jehova makahimo man sa pagpauswag sa mga butang maylabot niadtong iyang pagadawaton ngadto sa bag-ong pakigsaad. Labaw sa tanan, nagbangon siya ug labi pa ka maayong tigpataliwala. Kining maong Tigpataliwala hingpit, walay sala dili sama kang propetang Moises.

⁸ Maayo ang pakigsaad sa Kasugoan nga gipataliwad-an pinaagi ni propetang Moises. Apan, kanang maong pakigsaad nagkinahanglag paghalad ug mga mananap kansang mga dugo dili gayod makahugas sa mga sala sa tawo. Busa aron makatukod si Jehova ug labi pa ka maayong bag-ong pakigsaad, kinahanglang adunay labi pa ka maayong tigpataliwala nga adunay labi pa ka maayong halad. Kining bug-os-gikinahanglang Tigpataliwala napamatud-ang si Jesu-Kristo. Nagpunting sa pagkalabaw niini nga Tigpataliwala kon itandi ni propetang Moises, ang Bibliya naghatag kanato sa mosunod nga katin-awan: “Apan karon si Jesus nakabaton ug pagpang-alagad sa katilingban nga labaw pa ka maayo, busa siya usab ang tigpataliwala sa labi pa ka maayong pakigsaad, nga gihimo pinasikad sa labi pa ka maayong mga saad. . . . Sa iyang paghisgot ug ‘bag-ong pakigsaad’ iyang gihimo ang nahaunang pakigsaad ingon nga karaan na.”—Hebreohanon 8:6, 13.

Gipulihan ang “Karaan” Nang Pakigsaad

⁹ Kanang “karaan na,” wala na sa uso, nga pakigsaad natapos sa 50 ka adlaw human nga nabanhaw ang Tigpataliwala sa bag-ong pakigsaad. Kini nahitabo sa adlaw sa Pentekostes. Sa buntag niadtong adlawa, gisugdan ang antitipong Hudiyohanong Piyesta sa Pagpanigom. Sa unsang paagi? Buweno, 120 ka matinumanong mga disipulo sa Tigpataliwala sa bag-ong pakigsaad nagtigom diha sa itaas nga lawak sa Jerusalem ug nakadawat sa gisaad nga balaang espiritu, sa katumanan sa tagna sa Joel 2:28, 32. Nagpamatuod kadto sa pagsugod sa bag-ong pakigsaad pinaagi sa pagtaganag madunggan ug makitang ebidensiya sa tanang mga tumatan-aw.

¹⁰ Dihang mikawas si Jesus gikan sa tubig sa bawtismo ug mikunsad diha kaniya ang balaang espiritu, ang espiritu milagrosong gisimbolohan pinaagi sa dagway sa usa ka salampati nga naglupad sa ibabaw sa iyang ulo. Apan sa kaso sa 120 ka disipulong mga Hebreohanon sa adlaw sa Pentekostes, sa unsang paagi gipakita ang ilang pagkadinihogan sa balaang espiritu? Pinaagi sa pagtungha sa mga dila nga daw kalayo sa ibabaw sa ilang mga ulo ug pinaagi sa paghatag kanila sa katakos sa pagwali sa Pulong sa Diyos diha sa langyawng mga pinulongan nga wala sukad nila matun-i.—Mateo 3:16; Buhat 2:1-36.

¹¹ Angay unta kadtong masabtan sa mga Hudiyo ug sa ilang mga rabbi nga natapos na ang pakigsaad sa Moisesnong Kasugoan. Sukad nga nalaglag ang Jerusalem pinaagi sa mga kasundalohan sa Roma sa 70 K.P., sila wala nay templo. Niadtong panahona, ang ilang mga rekord sa mga kaliwat nangawala o kaha nangawala. Busa karon sila wala mahibalo kon kinsay sakop sa tribo ni Levi ug kinsa ang kaliwat ni Aaron aron sa pag-alagad sa kapasidad ingong hataas nga saserdote sa Hudiyohanong nasod. Inay moingon sa usag usa, “Ilha si Jehova!” ilang giisip nga usa ka pagpanamastamas ang pagbungat sa balaang ngalan. Busa sila wala makatagamtam sa kalipay sa mga Saksi ni Jehova bahin sa kamatuoran nga ang “karaan” nang pakigsaad gipulihan sa bag-ong pakigsaad.

“Usa ka Walay Kataposang Pakigsaad”

¹² Lahi kaayo gikan sa Hudiyohanong situwasyon karon, ang mga Saksi ni Jehova adunay aktibo, nagalihok nga Hataas nga Saserdote sa tuong kamot sa Diyos diha sa kalangitan. Siya mao ang Tigpataliwala sa bag-ong pakigsaad, usa ka tigpataliwala nga mas dako kay kang Moises. Sa kinasingkasing, kining mga saksi ni Jehova makaduyog sa pag-ampo sa magsusulat sa Hebreohanon 13:20, 21: “Hinaot ang Diyos sa kalinaw, nga nagbanhaw sa atong Ginoong Jesus, ang dakong magbalantay sa mga karnero, pinaagi sa dugo sa dayon nga pakigsaad, magasangkap unta kaninyo sa tanang maayong butang aron kamo makatuman sa iyang kabubut-on.” Sanglit gihalad sa “dakong magbalantay” ang iyang tawhanong kinabuhi alang sa “mga karnero,” siya gibanhaw gikan sa patay diha sa dili-mamatay, walay-dugong espiritu nga lawas apan may bili sa dugo sa bag-ong pakigsaad nga matinumanong gisunod ug nga walay kataposan ang maayong mga epekto niini.

¹³ Ang gihalad nga kamatayon sa Tigpataliwala sa bag-ong pakigsaad, si Jesu-Kristo, ginahandom matag tuig sa mga Saksi ni Jehova sa kasumaran sa “panihapon sa Ginoo.” Ang walay lebadorang tinapay nga ambitan niadtong sakop sa bag-ong pakigsaad sa panahon sa “panihapon” nagasimbolo sa hingpit nga unod sa Tigpataliwala, ug ang bino nagasimbolo sa putli, walay-hugaw nga dugo nga, sumala sa Kasulatan, nasudlan sa mismong bili sa kinabuhi sa Tigpataliwala.—1 Corinto 11:20-26; Levitico 17:11.

¹⁴ Dihang ang sakop sa bag-ong pakigsaad moambit sa kopa sa bino sa Memoryal sa “panihapon sa Ginoo,” sa mahulagwayong paagi nga sila nanginom sa dugo, sa Tigpataliwala sa bag-ong pakigsaad. Ug sa simbolikong paagi nga sila nagakaon sa iyang unod dihang moambit sila sa tinapay nga walay lebabura sa Memoryal. Sa paghimo niini, sa simbolikong pagkasulti, ilang gipasundayag ang ilang pagtuo sa halad lukat sa Anak sa Diyos, ang Manunubos sa tanang katawhan.

¹⁵ Ang bag-ong pakigsaad, nga karon kapin na sa 1,950 ka tuig, hapit nang makatuman sa iyang katuyoan. Kini milungtad na ug daghang kasiglohan kay sa pakigsaad sa Moisesnong Kasugoan. Sanglit gipasukad sa labi pa kaayong mga saad ug labi pa ka maayong halad nga may mas maayong Tigpataliwala, kini napamatud-ang usa ka labi pa ka maayong pakigsaad. Sanglit dili kinahanglang ilisan kun pulihan sa usa ka bag-o ug labi pa ka maayong pakigsaad, ang malamposong bag-ong pakigsaad gitawag ingong “dayon nga pakigsaad.”—Hebreohanon 13:20.

¹⁶ Salamat sa Labing Makagagahom nga Diyos, si Jehova, nga iyang gibanhaw ang usa ka Tigpataliwala nga labi pa ka maayo kay kang Moises, nga pinaagi kaniya Siya sa legal nga paagi makakuha sa pakigsaad sa Moisesnong Kasugoan pinaagi sa paglansang niini diha sa kahoy sa pagsakit ug sa pagtagana sa walay kataposang bag-ong pakigsaad!

[Mga Pangutana nga Pagatun-an]

1. (a) Unsay mahitabo sa atong yuta kon ang Diyos wala pa motuman sa iyang pakigsaad bahin sa adlaw ug bahin niadtong sa gabii? (b) Sanglit maunongong gibarogan sa Diyos ang iyang mga pakigsaad, unsay atong matino?

2. Unsay gisulti ni Jehova sa mga Hudiyo maylabot sa iyang pakigsaad bahin sa adlaw ug bahin niadtong sa gabii?

3. Unsay gipakita niining mga pulonga mahitungod sa iyang pakigsaad kang David alang sa usa ka walay kataposang Gingharian?

4. (a) Ang pakigsaad sa Diyos kang David alang sa usa ka walay kataposang Gingharian nalangkit sa unsang laing pakigsaad? (b) Unsay gipamulong ni Jesus mahitungod niini, ug ilalom sa unsang mga kahimtang?

5. Ngadto kang kinsa gihimo ang saad sa Diyos nga bag-ong pakigsaad, ug ang Republika sa Israel ba nangangkon nga ilalom niini nga pakigsaad?

6. Sumala sa Jeremias kapitulo 31, nganong nakita sa Diyos ang panginahanglan sa paghimog bag-ong pakigsaad, ug unsay mosangpot niini?

7. Ang bag-o bang pakigsaad maoy kausaban sa pakigsaad nga gilapas sa Israelitas, ug nganong labi pa kini ka maayo kay sa pakigsaad sa Kasugoan?

8. (a) Unsay anaa sa bag-ong pakigsaad nga nagpahimo niini nga labi pa kaayo kay sa pakigsaad sa Kasugoan? (b) Kinsa ang Tigpataliwala sa labi pa ka maayong pakigsaad? (c) Unsay gipamulong sa Hebreohanon 8:6, 13 mahitungod sa bag-ong pakigsaad ug sa pagkalabaw sa Tigpataliwala niini, ug unsay epekto niini diha sa unang pakigsaad?

9. (a) Unsang adlawa natapos ang daang pakigsaad? (b) Unsay nahitabo niadtong adlawa, ug unsay pamatuod niini?

10. Niadtong adlawa sa Pentekostes, sa unsang paagi gipasundayag nga gidihogan ang mga disipulo ni Jesus sa balaang espiritu?

11. (a) Unsa ang angay nga masabtan sa mga Hudiyo, ug ngano? (b) Sa unsang paagi nasayod kita nga wala mosulti ang mga Hudiyo sa usag usa, “Ilha si Jehova!” ug unsang kalipay ang wala nila matagamtam?

12. (a) Unsang pag-ampoa nga kinasingkasing makaduyog ang mga Saksi ni Jehova? (b) Unsa ang pagkabanhaw ni Jesus gikan sa patay?

13. (a) Sa unsang paagi ginahandom ang kamatayon sa Tigpataliwala sa bag-ong pakigsaad matag tuig sa mga Saksi ni Jehova? (b) Unsay gisimbolohan sa mga emblema?

14. Dihang ang sakop sa bag-ong pakigsaad moambit sa mga emblema sa Memoryal, unsay ilang ginahimo, sa simbolikal nga pagkasulti?

15. (a) Unsa na kadugaya nga naglungtad ang bag-ong pakigsaad, ug sa unsang paagi napamatud-an kining usa ka labi pa ka maayong pakigsaad? (b) Nganong ang bag-ong pakigsaad mahimong tawgong “dayon nga pakigsaad”?

16. Alang sa unsa nga kita magmapasalamaton kang Jehova nga Diyos?