Simbaha ang Diyos Sumala sa Iyang mga Sukdanan

SI JESUS miingon sa Diyos diha sa pag-ampo: “Kini nagkahulogan sa kinabuhing walay kataposan, ang ilang pagkuha ug kahibalo kanimo, ang bugtong matuod nga Diyos, ug sa imong gipadala, si Jesu-Kristo.” (Juan 17:3) Unsang matanga sa kahibalo? “Ang kabubut-on [sa Diyos] mao nga ang tanang matang sa mga tawo mamaluwas ug mahidangat sa tukmang kahibalo sa kamatuoran.” (1 Timoteo 2:4) Ang The Amplified Bible nagahubad sa ulahing pamulong niining paagiha: “Hibaloi sa tukma ug sa husto ang [balaang] Kamatuoran.”

Busa buot sa Diyos nga kita mahibalo kaniya ug sa iyang mga katuyoan sa tukmang paagi, nga nahiuyon sa balaang kamatuoran. Ug ang Pulong sa Diyos, ang Balaang Bibliya, mao ang tinubdan sa maong kamatuoran. (Juan 17:​17; 2 Timoteo 3:​16, 17) Sa dihang mahibaloan sa mga tawo sa tukma kon unsay ginasulti sa Bibliya mahitungod sa Diyos, nan malikayan nila nga mahisama sa gihisgotan sa Roma 10:​2, 3, kinsa nagbaton sa “kadasig alang sa Diyos; apan dili sumala sa tukmang kahibalo.” O mahisama sa mga Samarianhon, si kinsa giingnan ni Jesus: “Kamo nagasimba sa wala ninyo hiilhi.”​—Juan 4:22.

Busa, kon buot nato ang pag-uyon sa Diyos, kinahanglang suknaon nato ang atong kaugalingon: Unsay ginasulti sa Diyos mahitungod sa iyang kaugalingon? Sa unsang paagi gusto niyang pagasimbahon? Unsa ang iyang mga katuyoan, ug sa unsang paagi kita angay mohaom niana? Ang tukmang kahibalo sa kamatuoran nagahatag kanato sa hustong mga tubag nianang mga pangutanaha. Unya kita makasimba sa Diyos sumala sa iyang mga sukdanan.

Nagapasipala sa Diyos

“KADTONG nagapasidungog kanako akong pasidunggan,” nagaingon ang Diyos. (1 Samuel 2:30) Magapasidungog ba sa Diyos ang pagtawag kang bisan kinsa nga sama kaniya? Magapasidungog ba kaniya ang pagtawag kang Maria “ang inahan sa Diyos” ug ang “Babayeng Tigpataliwala . . . tali sa Maglalalang ug sa Iyang mga linalang,” sumala sa ginahimo sa New Catholic Encyclopedia? Dili, kanang mga ideyaha nagainsulto sa Diyos. Walay mausa ang sama kaniya; ni siya may unodnong inahan, sanglit si Jesus dili man Diyos. Ug walay “Babayeng Tigpataliwala,” kay ang Diyos nagtudlo lamang sa “usa ka tigpataliwala sa Diyos ug sa mga tawo,” si Jesus.​—1 Timoteo 2:​5; 1 Juan 2:​1, 2.

Sa walay pagduhaduha, ang doktrinang Trinidad nakapalibog ug nakasambog sa pagsabot sa mga tawo sa matuod nga posisyon sa Diyos. Kini nagapugong sa mga tawo sa pag-ila sa tukma sa Unibersohanong Soberano, si Jehova nga Diyos, ug sa pagsimba kaniya sumala sa iyang mga sukdanan. Sumala sa giingon sa teologong si Hans Küng: “Nganong may si bisan kinsa ang buot modugang ngadto sa ideya sa pagkausa ug pagkalinain sa Diyos nga makapahuyang lamang o makaimbalido sa maong pagkausa ug pagkalinain?” Apan kana ang gibuhat sa pagtuo sa Trinidad.

Kadtong nagtuo sa Trinidad wala “mag-ila sa Diyos sumala sa tukmang kahibalo.” (Roma 1:28) Kanang bersikuloha nagaingon usab: “Gitugyan sila sa Diyos ngadto sa wala-kahimut-ing panghunahuna, aron sa pagbuhat sa mga butang dili angay.” Ang mga Roma 1 bersikulo 29 hangtod 31 nagalista sa pipila nianang ‘dili angay’ nga mga butang, sama sa ‘pagpatay, panag-away, pagkadili motuman sa mga kasabotan, pagkawalay gugma nga kinaiya, pagkawalay-kaluoy.’ Kining mga butanga mismo gibuhat sa mga relihiyon nga nagtuo sa Trinidad.

Pananglitan, kadaghanan gilutos ug bisan gipatay sa mga Trinitaryan kadtong misalikway sa doktrinang Trinidad. Ug labaw pa ang ilang gibuhat. Gipatay nila ang ilang isigka Trinitaryan panahon sa gubat. Unsa pay labawng ‘dili angay’ kay sa mga Katoliko nga nagapatay sa mga Katoliko, Ortodokso nga nagapatay sa Ortodokso, mga Protestante nga nagapatay sa mga Protestante​—ang tanan sa ngalan sa samang Trinidad nga Diyos?

Bisan pa niana, si Jesus yanong miingon: “Pinaagi niini ang tanan makaila nga kamo akong mga tinun-an, kon kamo may gugma sa inyong taliwala.” (Juan 13:35) Ang Pulong sa Diyos nagapatin-aw niini, nga nagaingon: “Ang mga anak sa Diyos ug ang mga anak sa Yawa dayag pinaagi niining kamatuorana: Ang tanan nga dili magabuhat sa pagkamatarong wala magagikan sa Diyos, ni siya nga wala mahigugma sa iyang igsoon.” Kini nagapanig-ingon sa mga nagapatay sa ilang mga igsoon sa espiritu kang “Cain, kinsa naggikan sa daotang usa [Satanas] ug nagpatay sa iyang igsoon.”​—1 Juan 3:​10-12.

Busa, ang pagtudlo sa makalibog nga mga doktrina mahitungod sa Diyos mitultol ngadto sa mga buhat nga nagalapas sa iyang mga kasugoan. Sa pagkamatuod, gibatbat sa Danes nga teologo si Søren Kierkegaard kon unsay nahitabo sa tibuok Kakristiyanohan: “Ang Kakristiyanohan nagpapas sa Kristiyanidad nga wala makaalinggat niana.”

Ang espirituwal nga kahimtang sa Kakristiyanohan mohaom sa gisulat ni apostol Pablo: “Sila sa dayag nagapahayag nga nakaila sa Diyos, apan ilang gipanghimakak siya pinaagi sa ilang mga binuhatan, tungod kay sila dulumtanan ug masupilon ug wala kahimut-i alang sa bisan unsang matang sa maayong buhat.”​—Tito 1:16.

Sa dili madugay, sa dihang laglagon sa Diyos kining presenteng daotang sistema sa mga butang, paninglan ang Trinitaryan nga Kakristiyanohan. Ug pagalaglagon siya tungod sa iyang nagapasipala-sa-Diyos nga mga binuhatan ug mga doktrina.​—Mateo 24:​14, 34; 25:​31-34, 41, 46; Pinadayag 17:​1-6, 16; 18:​1-8, 20, 24; 19:​17-21.

Isalikway ang Trinidad

DI MAHIMONG ikompromiso ang mga kamatuoran sa Diyos. Busa, ang pagsimba sa Diyos sumala sa iyang mga sukdanan nagkahulogan sa pagsalikway sa doktrina sa Trinidad. Kini nahasupak sa gituohan ug gitudlo sa mga manalagna, ni Jesus, sa mga apostol, ug sa unang mga Kristohanon. Kini nahasupak sa ginaingon sa Diyos mahitungod sa iyang kaugalingon diha sa iyang dinasig nga Pulong mismo. Busa, siya nagatambag: “Ilha nga ako lamang ang Diyos ug walay lain nga sama kanako.”​—Isaias 46:​9, TEV.

Ang intereses sa Diyos dili maalagaran pinaagi sa paghimo niya nga makalilibog ug misteryoso. Hinunoa, kon dugang malibog ang mga tawo mahitungod sa Diyos ug sa iyang mga katuyoan, kana mas maangayan sa Kaaway sa Diyos, si Satanas nga Yawa, ang ‘diyos niining kalibotana.’ Siya mao ang nagapasiugda sa bakak nga mga doktrina aron ‘mabutaan ang mga hunahuna sa mga dili magtutuo.’ (2 Corinto 4:4) Ug ang doktrina sa Trinidad nagaalagad usab sa intereses sa mga klerigo nga buot mopadayon sa paggahom sa katawhan, kay gihimo nila nga mopatim-awng ang mga teologo lamang ang makasabot niana.​—Tan-awa ang Juan 8:44.

Ang tukmang kahibalo sa Diyos magahatag ug dakong kahupayan. Kini magpahigawas kanato gikan sa mga pagtulon-an nga nahasupak sa Pulong sa Diyos ug gikan sa mga organisasyon nga nag-apostata. Sumala sa giingon ni Jesus: “Kamo mahibalo sa kamatuoran, ug ang kamatuoran magapahigawas kaninyo.”​—Juan 8:32.

Pinaagi sa pagpasidungog sa Diyos ingong supremo ug pagsimba kaniya sumala sa iyang mga sukdanan, makalikay kita sa paghukom nga duol na niyang ipahamtang sa apostatang Kakristiyanohan. Hinunoa, kita makapanan-aw sa pabor sa Diyos sa dihang malaglag kining sistemaha: “Ang kalibotan lumalabay ug mao usab ang pangibog niini, apan ang nagabuhat sa kabubut-on sa Diyos magapabilin sa walay kataposan.”​—1 Juan 2:17.

[Hulagway sa panid 31]

Kining kasiglohan-edad nga eskultura sa Pransiya nagahulagway sa pagkorona sa “birhen” Maria pinaagi sa Trinidad. Ang pagtuo sa Trinidad mitultol sa pagsimba kang Maria ingong “Inahan sa Diyos”