Kapitulo 9
Ang Pamilyahanong Kinabuhi ni Jesus sa Bata Pa
SA NAGDAKO si Jesus sa Nazaret, kadto maoy usa ka gamay, dili-importante nga siyudad. Kini nahimutang diha sa bukiron nga nasod sa usa ka lugar nga gitawag Galilea, dili halayo gikan sa matahom nga Walog sa Jezreel.
Sa dihang si Jesus, tingali mga duha pa ka tuig, gidala dinhi gikan sa Ehipto ni Jose ug ni Maria, dayag nga siya pa lamang ang anak ni Maria. Apan kana wala magdugay. Sa ulahi, si Santiago, Jose, Simon, ug Judas nangatawo, ug si Maria ug Jose nahimong mga ginikanan usab sa mga anak nga babaye. Wala dangtig dugay si Jesus nakabaton, sa labing menos, ug unom pa ka manghod nga lalaki ug mga babaye.
Si Jesus adunay laing mga paryente usab. Kita nahibalo na mahitungod sa iyang magulang nga ig-agaw nga si Juan, kinsa nagpuyo sa daghang mga milya halayo gikan sa Judea. Apan nagpuyo sa duol sa Galilea mao si Salome, nga dayag igsoong babaye ni Maria. Si Salome mao ang bana ni Zebedeo, busa ang ilang duha ka anak, si Santiago ug Juan, maoy mga ig-agaw ni Jesus. Kami wala masayod kon, samtang nagdako, si Jesus nag-uban-uban ba kanunay niining mga bataa, apan sa ulahi sila nahimong suod nga mga kauban.
Si Jose kinahanglang mokugi sa pagtrabaho aron adunay ikasustento sa iyang nagdako nga pamilya. Siya maoy usa ka panday. Gipadako ni Jose si Jesus ingon nga iyang kaugalingong anak, busa gitawag si Jesus nga “ang anak sa panday.” Gitudloan ni Jose si Jesus nga mahimong panday usab, ug siya maayong panday. Mao gani nga gitawag sa mga tawo sa ulahi si Jesus, “Siya mao ang panday.”
Ang kinabuhi sa pamilya ni Jesus natukod palibot sa pagsimba kang Jehova nga Diyos. Ingon nga pagsunod sa Kasugoan sa Diyos, si Jose ug si Maria naghatag sa ilang mga anak ug espirituwal nga pagpanudlo ‘sa maglingkod sila sa ilang balay, sa maglakaw sila sa dalan, sa maghigda sila, ug sa mobangon sila.’ Adunay sinagoga sa Nazaret, ug makaseguro kita nga regular usab nga ginadala ni Jose ang iyang pamilya sa pagsimba didto. Apan tino nga ang ilang gikalipayan ug dako mao ang ilang regular nga mga panaw ngadto sa templo ni Jehova sa Jerusalem. Mateo 13:55, 56; 27:56; Marcos 15:40; 6:3; Deuteronomio 6:6-9.
▪ Labing menos adunay pila ka igsoong lalaki ug babaye si Jesus, ug unsay ngalan sa pipila kanila?
▪ Kinsa ang tulo ka iladong mga ig-agaw ni Jesus?
▪ Unsang sekular nga trabaho ang gikuha ni Jesus sa ulahi, ug ngano?
▪ Unsang hinungdanong pagpanudlo ang gihatag ni Jose alang sa iyang pamilya?