Alagara si Jehova, Dili si Satanas

Ang tanan kanato dunay kapilian. Moalagad kang Jehova o kang Satanas ug sa iyang mga demonyo. Dili madungan ang duha. Pagkamaalamon nga moalagad kang Jehova!

Maayo si Jehova

Sa atong nakita, ang mga demonyo malipay mosakit ug molingla sa mga tawo. Dili ingon niana si Jehova. Iyang gihigugma ang katawhan samag amahan nga nahigugma sa iyang mga anak. Siya ang Maghahatag “sa matag maayong gasa ug matag hingpit nga hatag.” (Santiago 1:17) Wala siya maghikaw sa bisan unsang maayong butang sa katawhan, bisan sa dakong bili alang kaniya.​—Efeso 2:4-7.

Hunahunaa ang mga butang nga gibuhat dinhi sa yuta ni Jesus, ang Anak sa Diyos. Iyang gipasulti ang mga amang ug gipakita ang mga buta. Iyang giayo ang mga sanglahon ug ang mga bakol. Iyang gipagawas ang mga demonyo ug giayo ang tanang matang sa sakit. Si Jesus, pinaagi sa gahom sa Diyos, mibanhaw gani sa mga patay.​—Mateo 9:32-35; 15:30, 31; Lucas 7:11-15.

Inay mosultig bakak aron pahisalaagon kita, ang Diyos kanunay mosulti sa matuod. Dili siya molingla kang bisan kinsa.​—Numeros 23:19.

Likayi ang Hugaw nga mga Buhat

Sama nga ang balay sa lawalawa mogunit sa langaw, minilyong katawhan ang gitaptan sa mga patootoo ug kabakakan. Mahadlok sila sa mga patay. Mahadlok sila sa mga demonyo. Mabalak-on sila sa mga tunglo, tilimad-on, lumay, ug mga anting-anting. Gigapos sila sa mga patootoo ug mga tradisyon pinasikad sa mga bakak ni Satanas nga Yawa. Ang mga alagad sa Diyos dili magpalingla sa bisan unsa niining mga butanga.

Si Jehova labaw kaayong gamhanan kay kang Satanas. Kon moalagad ka kang Jehova, panalipdan ka niya gikan sa mga demonyo. (Santiago 4:7) Ang pandaot nga yamyam dili mosaler kanimo. Pananglit, sa Nigeria, tulo ka gamhanang mga barangan nagyamyam aron patyon ang usa ka Saksi ni Jehova nga midumili pagbiya sa lungsod. Dihang napakyas ang yamyam, ang usa sa mga barangan nahadlok, miadto sa Saksi, ug nagpakiluoy nga dili unsaon.

Kon hasion ka sa mga demonyo, makatawag ka kang Jehova pinaagig ngalan ug panalipdan ka niya. (Proverbio 18:10) Apan aron maimo ang panalipod sa Diyos, kinahanglan kang mobiya sa bisan unsa nga may kalabotan sa espiritismo ug pagsimba sa mga demonyo. Ang mga magsisimba sa Diyos sa karaang Efeso mihimo niana. Ilang giipon ang tanan nilang mga basahon sa salamangka ug gisunog kana. (Buhat 19:19, 20) Ang mga alagad sa Diyos karon angay mohimo sa susama. Pahilayo gikan sa mga lumay, anting-anting, habak, tangil, mga basahon sa salamangka, ug bisan unsa nga labot sa mga buhat espiritista.

Bansaya ang Putli nga Pagsimba

Kon buot nimong pahimut-an ang Diyos, dili igo nga basta mobiya sa bakak nga pagsimba ug mohunong pagbuhat sa dautang mga butang. Kinahanglan usab nga aktibo kang magbansay sa putli nga pagsimba. Ang Biblia nagpakita kon unsa ang kinahanglan:

Pakig-uban sa mga Saksi ni Jehova

Si Satanas ug ang mga demonyo dunay katawhan sa yuta nga nagtudlo ug nagbatasan pagbuhat sa dautang mga butang. Apan si Jehova dunay katawhan usab. Sila ang mga Saksi ni Jehova. (Isaias 43:10) Sa tibuok kalibotan, dunay kapin sa unom ka milyong mga Saksi. Ang tanan kanila naninguha pag-ayo pagbuhat sa matarong ug pagtudlo sa katawhan sa kamatuoran. Sa kadaghanang kayutaan, mahibalag nimo sila sa Kingdom Hall, diin mainiton ka nilang abiabihon.

Ang ilang bulohaton mao ang pagtabang sa uban sa pag-alagad sa Diyos. Ilang tun-an ang Biblia uban kanimo sa imong panimalay, nga motabang kanimo nga makat-on unsaon pagsimba si Jehova sa hustong paagi. Dili ka kinahanglan mobayad alang niini. Ang mga Saksi malipay motudlo sa kamatuoran kay gihigugma nila ang katawhan ug gihigugma nila ang Diyos nga Jehova.