Kinsa Gayod ang Nagamando sa Kalibotan?

Daghang mga tawo ang motubag sa pangutana sa ibabaw sa usa lamang ka pulong​—ang Diyos. Apan makahuloganon, wala gayod maghisgot ang Bibliya nga si Jesu-Kristo o ang iyang Amahan mao gayod ang tinuod nga mga magmamando niining kalibotana. Sa kasukwahi, si Jesus nag-ingon: “Ang magmamando niining kalibotana palagputon na.” Ug siya midugang: “Ang magmamando niining kalibotana moabot na. Ug siya walay labot kanako.”​—Juan 12:31; 14:30; 16:11.

Busa ang magmamando niining kalibotan maoy batok kang Jesus. Kinsa kaha siya?

Ilhanan Gikan sa mga Kahimtang sa Kalibotan

Bisan pa sa mga paningkamot sa maayog-tumong nga mga tawo, ang kalibotan nag-antos ug hilabihan sa tibuok nga kasaysayan. Nakapatingala kini sa palaisip nga mga tawo, sama kang anhing David Lawrence nga usa ka editoryal nga manunulat: “‘Kalinaw sa yuta’​—halos tanan gusto niana. ‘Maayong kabubut-on ngadto sa mga tawo’​—halos tanang mga tawo sa kalibotan mibati niana ngadto sa usag usa. Unya unsay nakadaot? Nganong ang gubat nagahulga bisan pa sa tiunay nga tinguha sa mga tawo?”

Daw may panagsumpaki, dili ba? Sa dihang ang kinaiyanhong tinguha sa katawhan mao ang magkinabuhi sa kalinaw, sila sagad nga nagdumot ug nagpatay sa usag-usa​—ug uban sa tumang kadaotan. Hunahunaa ang way kasingkasing nga paghingapin sa makalilisang nga kapintasan. Ang mga tawo migamit ug mga gas chamber, mga kampo konsentrasyon, mga flame thrower, mga bombang napalm, ug laing mangtas nga mga paagi sa pagsakit ug pagpatay sa usag usa nga walay kaluoy.

Ikaw ba nagatuo nga ang tawo, kinsa nagtinguha sa kalinaw ug kalipay makahimo, sa ilang kaugalingon, sa maong grabeng kadaotan batok sa uban? Unsang mga gahom ang nagtukmod sa mga tawo sa maong dulumtanang mga buhat o nagmaneobra kanila ngadto sa mga kahimtang diin sila mobating napugos sa pagbuhat ug mga kapintasan? Ikaw ba nakahunahuna kon kaha adunay daotan, dili makita nga gahom nga nagaimpluwensiya sa katawhan sa paghimo sa maong mga buhat sa kapintasan?

Gipaila ang mga Magmamando sa Kalibotan

Dili kinahanglang managhap mahitungod niana, kay ang Bibliya sa tin-aw nagpakita nga usa ka intelihente, dili makita nga persona nagakontrol sa mga tawo ug mga nasod. Kini nag-ingon: “Ang tibuok kalibotan nahiluna sa gahom sa usang daotan.” Ug ang Bibliya nagpaila kaniya, nga nag-ingon: “Ang usa nga ginganlag Yawa ug Satanas . . . nagalimbong sa tibuok gipuy-ang yuta.”​—1 Juan 5:19; Pinadayag 12:9.

Sa usa ka okasyon sa dihang si Jesus “gitental sa Yawa,” wala ni Jesus lalisa ang papel ni Satanas ingong magmamando niining kalibotana. Ang Bibliya nagsaysay kon unsay nahitabo: “Ang Yawa nagdala kaniya sa hataas kaayong bukid, ug gipakita kaniya ang tanang gingharian sa kalibotan ug ilang himaya, ug siya nag-ingon kaniya: ‘Kining tanang butang igahatag ko kanimo kon ikaw mohapa ug magasimba kanako.’ Unya si Jesus miingon kaniya: ‘Pahawa ka, Satanas!’”​—Mateo 4:​1, 8-10.

Hunahunaa kini. Si Satanas nagtental kang Jesus pinaagi sa pagtanyag kaniya sa “tanang gingharian sa kalibotan.” Apan, mahimo bang tinuod nga tentasyon ang tanyag ni Satanas kong si Satanas dili pa mao ang aktuwal nga magmamando niining mga ginghariana? Dili, dili kana mahimo. Ug timan-i, si Jesus wala magpanghimakak nga kining tanang kalibotanong kagamhanan maoy kang Satanas, nga iya untang himoon kong si Satanas pa walay kagahom ibabaw kanila. Busa, si Satanas nga Yawa sa tinuod mao diay ang dili-makitang magmamando sa kalibotan! Ang Bibliya, sa pagkamatuod, nagtawag kaniya nga “ang diyos niining sistema sa mga butang.” (2 Corinto 4:4) Apan, sa unsang paagi ang maong daotang persona nakadangat nianang gamhanang posisyon?

Ang usa nga nahimong Satanas kanhi usa ka manulonda nga linalang sa Diyos, apan siya nahimong masinahon sa posisyon sa Diyos. Iyang gihagit ang matarong nga pagmando sa Diyos. Alang niining katuyoana iyang gigamit ang serpente ingong tigpamaba aron sa paglimbong sa unang babaye, si Eva, ug busa nagmalamposon sa paghaylo kaniya ug sa iyang bana, si Adan, sa pagbuhat sa iyang gusto inay kay sa pagsugot sa Diyos. (Genesis 3:​1-6; 2 Corinto 11:3) Siya usab nangangkon nga iyang mapatalikod ang tanang matawo nga kaliwatan ni Adan ug Eva gikan sa Diyos. Busa gihatagan ug panahon sa Diyos si Satanas aron sulayan sa pagpamatuod ang iyang pangangkon, apan si Satanas wala magmalamposon.​—Job 1:​6-12; 2:​1-10.

Mahinungdanon, si Satanas wala mag-inusara sa iyang pagmando sa kalibotan. Siya nagmalamposon sa pagbuyo sa ubang mga manulonda nga mouban kaniya sa pagrebelde batok sa Diyos. Kini sila nahimong mga demonyo, ang iyang espirituhanong mga kakunsabo. Ang Bibliya nagsulti mahitungod kanila sa dihang kini nagtambag sa mga Kristohanon: “Bumarog kamo nga malig-on batok sa mga bitik sa Yawa; tungod kay kita adunay pakigbugno, dili batok sa unod ug dugo, apan . . . batok sa mga magmamando sa kalibotan niini nga kangitngit, batok sa daotang espirituhanong mga gahom diha sa mga dapit sa kalangitan.”​—Efeso 6:​11, 12.

Sukli ang Daotang mga Espiritu

Kining dili makita, daotang mga magmamando sa kalibotan determinado sa paglimbong sa tanang katawhan, sa pagpahilayo kanila gikan sa pagsimba sa matuod nga Diyos. Usa ka paagi nga gibuhat kini sa daotang mga espiritu maoy sa pagpauswag sa ideya sa paglungtad nga buhi human sa kamatayon, bisan tuod ang Pulong sa Diyos tin-aw nga nagpakita nga ang mga patay wala nay panimuot. (Genesis 2:17; 3:19; Ezekiel 18:4; Salmo 146:​3, 4; Ecclesiastes 9:​5, 10) Mao nga, ang daotang espiritu, pinaagi sa pagsundog sa tingog sa usa nga namatay, mahimong makigsulti sa iyang buhing mga paryente o mga higala, kaha pinaagi sa usa ka gikasangkapan sa espiritu (spirit medium) o pinaagig “tingog” gikan sa di-makitang kalibotan. Ang “tingog” magpakaaron-ingnon nga mao ang namatay, apan siya sa pagkatinuod usa ka demonyo!

Busa kon makadungog ka sa maong “tingog” ayaw palimbong. Isalikway ang bisan unsang isulti niini, ug ipalanog ang mga pulong ni Jesus: “Pahawa ka, Satanas!” (Mateo 4:10; Santiago 4:7) Ayawg tugoti ang pagkamausisaon mahitungod sa espirituhanong kalibotan nga mopahinabo kanimo nga malangkit sa daotang mga espiritu. Ang maong pakiglangkit gitawag ug espiritismo, ug ang Diyos nagpasidaan sa iyang mga magsisimba batok niana sa tanan niyang mga matang. Ang Bibliya nagsaway “ni bisan kinsang nagagamit sa pagpanagna . . . o bisan kinsang mokonsulta sa usa ka gikasangkapan sa espiritu o sa propesyonal nga magtatagna sa mga panghitabo o bisan kinsa nga mangutana sa mga patay.”​—Deuteronomio 18:​10-12; Galacia 5:​19-21; Pinadayag 21:8.

Sanglit ang espiritismo nagdala sa usa ka tawo ilalom sa impluwensiya sa mga demonyo, sukli ang tanan nga mga pamaagi niini bisan unsa pa kini ka makalingaw, o makapaukyab. Kining mga buhata naglakip sa pagtan-aw sa bolang kristal, paggamit sa mga papan sa Ouija, ESP, pagsusi sa mga badlit sa palad (panghimalad), ug astrolohiya. Ang mga demonyo usab mopahinabog mga kabanha ug pisikal nga katingalahan sa mga balay nga gihimo nilang teritoryo.

Dugang pa, ang daotang mga espiritu nagpahimulos sa makasasalang kiling sa mga tawo pinaagi sa pagtuboy sa mga literatura, mga pelikula, ug mga programa sa telebisyon nga nagpasiugda ug imoral ug di-kinaiyanhon nga pamatasan sa sekso. Ang mga demonyo nasayod nga ang sayop nga mga panghunahuna kon dili wagtangon gikan sa pangisip mopahinabo sa kadaotan nga dili mapala sa panumdoman ug modaldal sa mga tawo sa paggawi nga imoral​—sama sa mga demonyo mismo.​—Genesis 6:​1, 2; 1 Tesalonica 4:​3-8; Judas 6.

Tinuod, daghan ang mahimong motamay sa ideya nga kining kalibotana gimandoan sa daotang mga espiritu. Apan ang ilang dili-pagtuo dili makapatingala, kay ang Bibliya nag-ingon: “Si Satanas mismo nagpakamanulonda sa kahayag.” (2 Corinto 11:14) Ang iyang labing listo nga panglimbong mao ang pagbuta sa kadaghanan sa kamatuoran nga siya ug ang iyang mga demonyo matuod nga nagalungtad. Apan ayawg palimbong! Ang Yawa ug ang iyang mga demonyo maoy tinuod, ug kinahanglan nimong suklan sila sa padayon.​—1 Pedro 5:​8, 9.

Makalilipay, ang panahon karon haduol na sa dihang si Satanas ug ang iyang mga kaabin mawala na! “Ang kalibotan [lakip ang iyang mga demonyong magmamando] mahanaw,” pasalig sa Bibliya, “apan siya nga nagabuhat sa kabubut-on sa Diyos magpabilin hangtod sa kahangtoran.” (1 Juan 2:17) Pagkadakong kahupayan unya sa dihang ang daotang impluwensiya mawala na! Busa, hinaot nga kita mahiapil niadtong nagabuhat sa kabubut-on sa Diyos ug makatagamtam ug kinabuhing walay kataposan diha sa matarong nga bag-ong kalibotan sa Diyos.​—Salmo 37:​9-11, 29; 2 Pedro 3:13; Pinadayag 21:​3, 4.

Gawas kon gipaila, ang tanang kinutlo sa Bibliya nagagikan sa New World Translation of the Holy Scriptures.

[Hulagway sa panid 4]

Mahimo bang itanyag ni Satanas kang Jesus ang tanang kagamhanan sa kalibotan kon kana sila dili iyaha?