Kon Unsay Panglantaw sa mga Saksi ni Jehova sa Edukasyon

INGON sa gisugyot niining kinutlo gikan sa The World Book Encyclopedia, usa sa pangunang mga katuyoan sa pag-eskuyla mao ang pagbansay sa mga bata alang sa adlaw-adlaw nga pagkinabuhi, nga naglakip sa pag-andam kanila nga makatagana sa mga panginahanglan sa usa ka pamilya sa umaabot. Ang mga Saksi ni Jehova nagtuo nga kini maoy usa ka sagradong responsabilidad. Ang Bibliya mismo nagaingon: “Tino nga kon si bisan kinsa wala magatagana alang kanila nga iyang kaugalingon, ug ilabina alang kanila nga mga membro sa iyang panimalay, siya nagalimod sa pagtuo ug mas daotan pa kay sa tawong walay pagtuo.” (1 Timoteo 5:8) Ang mga tuig nga gigugol sa tunghaan nagaandam sa mga bata alang sa mga responsabilidad sa kinabuhi nga ilang pagapas-anon. Tungod niana, gibati sa mga Saksi nga kinahanglang hatagan ug seryosong pagtagad ang edukasyon.

Ang mga Saksi naningkamot sa pagkinabuhi uyon sa sugo sa Bibliya: “Bisan unsay inyong buhaton, buhata kini sa kinasingkasing sama ra nga inyo kining gibuhat alang sa Ginoo, ug dili alang sa mga tawo.” (Colosas 3:​23, Today’s English Version) Kining maong prinsipyo mapadapat sa tanang bahin sa adlaw-adlaw nga kinabuhi, lakip na sa tunghaan. Mao nga gidasig sa mga Saksi ang ilang mga anak nga magkugi sa pagtuon ug seryosohon ang mga buluhaton nga gitahas kanila sa tunghaan.

Ang Bibliya nagatudlo usab nga magpasakop sa mga balaod sa nasod diin ang usa nagpuyo. Mao nga sa dihang gibaod ang pagtungha hangtod sa usa ka tinong panuigon, ang mga Saksi ni Jehova nagatuman niining maong balaod.​—Roma 13:​1-7.

Bisan pag wala pakamenosa ang kahinungdanon sa pagbansay alang sa adlaw-adlaw nga pagkinabuhi, gipakita sa Bibliya nga dili kini ang bugtong ni mao ang pangunang tumong sa edukasyon. Ang malamposong edukasyon angay usab nga modasig sa mga bata nga magkalipay sa kinabuhi ug motabang kanila nga mahimong mga membro sa katilingban ingong maayong-pagkatimbang nga mga indibiduwal. Busa, gibati sa mga Saksi ni Jehova nga hinungdanon gayod ang pagpili sa mga kalihokan sa gawas sa klase. Sila nagtuo nga ang maayong lulinghayaw, musika, mga kalingawan, ehersisyo sa lawas, mga pagduaw sa mga librarya ug sa mga museo, ug uban pa, nagadula ug hinungdanong papel diha sa timbang nga edukasyon. Dugang pa, ilang gitudloan ang ilang mga anak nga motahod sa mas edarang mga tawo ug mangitag mga kahigayonan nga makatabang kanila.

Komosta na man ang Dugang Edukasyon?

Tungod sa bag-ong teknolohiya, ang mga kahigayonan sa panarbaho kanunay nga nagabag-o. Ingong resulta, daghang mga batan-on ang kinahanglang magtrabaho sa mga natad o sa mga pangita diin sila walay espisipikong pagbansay. Sanglit mao kanay kahimtang, ang ilang mga kinaiya sa pagtrabaho ug personal nga pagbansay, ilabina ang ilang katakos sa pagnunot sa kausaban, mahimo pa ganing mas mapuslanon alang kanila. Tungod niana, mas maayo nga ang mga estudyante mohamtong nga dunay, sumala sa pagpahayag niana sa Renaissance nga essayist nga si Montaigne, ‘gigamit nga ulo kay sa ulo nga punog kahibalo.’

Ang pagkawalay-trabaho, nga nagaapektar sa adunahan ug sa kabos nga mga nasod, subsob nga nagahulga sa mga batan-on nga kulang ug kuwalipikasyon alang sa trabaho. Busa, kon ang mga kahigayonan sa panarbaho nagkinahanglan ug pagbansay ingong dugang sa kinaubsang edukasyon nga gibaod, tulubagon sa mga ginikanan nga giyahan ang ilang mga anak sa paghimog desisyon may kalabotan sa dugang nga edukasyon, nga timbangtimbangon ang gidahom nga mga kaayohan ug ang gikinahanglang mga pagsakripisyo nianang maong dugang nga mga pagtuon.

Hinunoa, malagmit mouyon ka nga ang kalamposan sa kinabuhi naglangkit ug labaw pa kay sa materyal nga kauswagan lamang. Niining ulahing mga panahon ang mga lalaki ug mga babaye nga naggugol sa ilang tibuok nga mga kinabuhi sa ilang mga karera nawad-ag katuyoan sa kinabuhi sa dihang nawala ang ilang mga trabaho. Gisakripisyo sa pipila ka ginikanan ang ilang pamilyahanong kinabuhi ug ang panahon nga magugol unta nila kauban sa ilang mga anak, nga wala makatabang sa pagmatuto kanila, tungod kay sila sobra ka trabahante.

Tin-aw, angayng konsiderahon sa timbang nga edukasyon nga labaw pa kay sa materyal nga kalamposan ang gikinahanglan aron kita mahimong tinuod nga malipayon. Si Jesu-Kristo nag-ingon: “Nahisulat na: ‘Ang tawo dili mabuhi sa tinapay lamang, kondili sa matag pulong nga nagagula sa baba sa Diyos.’” (Mateo 4:​4, New International Version) Ingong mga Kristohanon, gipabilhan sa mga Saksi ni Jehova ang kahinungdanon sa pag-ugmad sa moral ug espirituwal nga mga hiyas ingon man sa pagpangandam sa ilang mga kaugalingon nga makatagana sa ilang materyal nga mga panginahanglan.