Leksiyon 3

Kinsa si Jesu-Kristo?

Nganong si Jesus gitawag ug “panganay” nga Anak sa Diyos? (1)

Nganong siya gitawag “ang Pulong”? (1)

Nganong si Jesus mianhi sa yuta ingong usa ka tawo? (2-4)

Nganong siya mihimog mga milagro? (5)

Unsay buhaton ni Jesus sa duol nga umaabot? (6)

1. Si Jesus nagkinabuhi sa langit ingong usa ka espiritung persona una siya moanhi sa yuta. Siya mao ang unang linalang sa Diyos, ug mao nga gitawag siyag “panganay” nga Anak sa Diyos. (Colosas 1:15; Pinadayag 3:14) Si Jesus mao ang bugtong nga Anak nga gilalang sa Diyos nga walay tabang. Gigamit ni Jehova ang una-tawhanong Jesus ingong iyang “batid nga magbubuhat” sa paglalang sa tanang ubang mga butang sa langit ug sa yuta. (Proverbio 8:​22-31; Colosas 1:​16, 17) Gigamit usab siya sa Diyos ingong Iyang pangunang tigpamaba. Kanay katarongan nga si Jesus gitawag “ang Pulong.”​—Juan 1:​1-3; Pinadayag 19:13.

2. Gipadala sa Diyos ang Iyang Anak nganhi sa yuta pinaagi sa pagbalhin sa iyang kinabuhi ngadto sa tagoangkan ni Maria. Busa si Jesus walay tawhanong amahan. Kanay katarongan nga siya wala makapanunod sa bisan unsang sala o pagkadili-hingpit. Gipadala sa Diyos si Jesus sa yuta tungod sa tulo ka katarongan: (1) Aron tudloan kita sa kamatuoran mahitungod sa Diyos (Juan 18:37), (2) aron mahuptan ang hingpit nga pagkamatinumanon, nga ihatag ang sulundan nga pagasundon nato (1 Pedro 2:21), ug (3) aron ihalad ang iyang kinabuhi sa pagluwas kanato gikan sa sala ug kamatayon. Nganong gikinahanglan man kadto?​—Mateo 20:28.

3. Tungod sa pagsupak sa sugo sa Diyos, ang unang tawo, si Adan, nakahimo sa gitawag sa Bibliya ug “sala.” Busa gisilotan siya sa Diyos ug kamatayon. (Genesis 3:​17-19) Siya wala na makakab-ot sa mga sukdanan sa Diyos, busa siya dili na hingpit. Sa inanay siya natigulang ug namatay. Gipasa ni Adan ang sala sa tanan niyang anak. Kanay hinungdan nga kita usab matigulang, magsakit, ug mamatay. Sa unsang paagi maluwas ang katawhan?​—Roma 3:23; 5:12.

4. Si Jesus maoy usa ka hingpit nga tawo nga sama gayod kang Adan. Hinuon, lahi kang Adan, si Jesus hingpit nga nagmasinugtanon sa Diyos bisan nailalom sa kinadak-ang pagsulay. Busa ikahalad niya ang iyang hingpit nga tawhanong kinabuhi aron ibayad sa sala ni Adan. Mao kini ang gihisgotan sa Bibliya nga “lukat.” Sa ingon ang mga anak ni Adan maluwas na gikan sa pagkahinukman sa kamatayon. Ang tanan nga nagbutang sa ilang pagtuo kang Jesus mahimong mapasaylo sa ilang mga sala ug makadawat ug kinabuhing walay kataposan.​—1 Timoteo 2:​5, 6; Juan 3:16; Roma 5:​18, 19.

5. Sa dinhi pa sa yuta giayo ni Jesus ang mga masakiton, gipakaon ang mga gigutom, ug gipalinaw ang mga bagyo. Mibanhaw pa gani siyag mga patay. Nganong mihimo siyag mga milagro? (1) Gibati siyag kaluoy sa mga tawong nag-antos, ug buot niya nga sila tabangan. (2) Ang iyang mga milagro nagpamatuod nga siya mao ang Anak sa Diyos. (3) Kadto nagpakita kon unsay iyang buhaton alang sa masinugtanong katawhan inigmando niya ingong Hari ibabaw sa yuta.​—Mateo 14:14; Marcos 2:​10-12; Juan 5:​28, 29.

6. Si Jesus namatay ug gibanhaw sa Diyos ingong usa ka espiritung linalang, ug siya mibalik sa langit. (1 Pedro 3:18) Sukad niadto, siya gihimo sa Diyos nga usa ka Hari. Sa dili na madugay si Jesus magwagtang sa tanang pagkadaotan ug pag-antos gikan niining yutaa.​—Salmo 37:​9-11; Proverbio 2:​21, 22.

[Mga hulagway sa panid 7]

Ang ministeryo ni Jesus naglakip sa pagpanudlo, paghimog mga milagro, ug paghalad pa sa iyang kinabuhi alang kanato