Kingdom News Num. 35

Maghigugmaay Pa Kaha ang Tanang Tawo sa Usag Usa?

Nabugnaw ang Gugma sa Silingan

MINILYON ang mibatig kaluya ug kaalaot, nga walay kapaingnan. Usa ka retiradong negosyanteng babaye miingon: ‘Usa ka gabii ang balo nga nagpuyo sa pikas lawak nanuktok sa akong pultahan ug miingon nga siya nagmamingawon. Ako siyang gisultihan sa matinahurong paagi apan giprangkahan nga ako puliki. Nangayo siyag pasaylo sa pagsamok kanako ug mibiya.’

Ikasubo, nianang gabhiona mismo, ang balo naghikog. Human niana, ang negosyanteng babaye miingon nga siya nakakat-on ug “mapait nga leksiyon.”

Ang kakulang sa gugma sa silingan kasagarang makapasubo. Panahon sa etnikong mga kagubot sa Bosnia ug Herzegovina, kanhi bahin sa Yugoslavia, kapin sa usa ka milyon ang gipalayas gikan sa ilang mga panimalay ug tinagpulo ka libo ang gipamatay. Pinaagi ni kinsa? “Among mga silingan,” bakho sa usa ka babaye nga giabog gikan sa iyang balangay. “Kami nakaila kanila.”

Sa Rwanda ginatos ka libo ka tawo ang gipamatay, kasagaran pinaagig ilang kaugalingong mga silingan. “Ang Hutu ug Tutsi tingob nga [nagpuyo], nagminyoay, wala magpakabana o wala gani mahibalo kon kinsay Hutu ug kinsay Tutsi,” mitaho ang The New York Times. “Dayon dihay misugnib,” ug “ang pinatyanay misugod.”

Sa susama, ang mga Hudiyo ug mga Arabo sa Israel nag-uban pagpuyo, apan daghan ang nagdumot sa usag usa. Ang kahimtang managsama sa daghang Katoliko ug mga Protestante sa Irlandiya ug nagakadaghan pang mga tawo sa ubang kanasoran. Wala pa sukad sa kasaysayan nga ang kalibotan nakulangan pag-ayo sa gugma.

Nganong Nabugnaw ang Gugma sa Silingan?

Ang atong Maglalalang nagatubag. Ang iyang Pulong, ang Bibliya, nagtawag sa panahon nga kita nagkinabuhi nga ang “kataposang mga adlaw.” Mao kini ang yugto nga sulod niana, ang tagna sa Bibliya nagaingon, ang katawhan “walay kinaiyanhong pagbati.” Bahin niining “makuyaw nga mga panahong lisod sagubangon,” nga gitawag usab sa Kasulatan nga ‘ang konklusyon sa sistema sa mga butang,’ si Jesu-Kristo nagtagna nga “mobugnaw ang gugma sa kadaghanan.”—2 Timoteo 3:1-5; Mateo 24:3, 12.

Ang kakulang sa gugma karon, hinunoa, maoy bahin sa ebidensiya nga kita nagkinabuhi sa kataposang mga adlaw niining kalibotana. Ikalipay, nagkahulogan usab kini nga kining kalibotana sa di-diyosnong mga tawo sa di-madugay ilisan sa usa ka matarong nga bag-ong kalibotan nga gamhan sa gugma.—Mateo 24:3-14; 2 Pedro 2:5; 3:7, 13.

Apan kita ba gayod adunay katarongan sa pagtuo nga posible ang maong kausaban—nga ang tanang tawo makakat-on sa paghigugma sa usag usa ug mag-uban pagpuyo nga may pakigdait sa usag usa?

Gugma sa Silingan—Usa Ka Katinuoran

“KINSA sa pagkatinuod ang akong silingan?” usa ka abogado sa unang siglo nangutana kang Jesus. Siya nagdahom gayod nga si Jesus moingon, ‘Ang imong isigka-Hudiyo.’ Apan sa asoy bahin sa buotang Samarianhon, gipakita ni Jesus nga ang mga tawo sa ubang nasyonalidad atong mga silingan usab.—Lucas 10:29-37; Juan 4:7-9.

Gipasiugda ni Jesus nga, sunod sa gugma sa Diyos, ang gugma sa silingan angayng maggahom sa atong kinabuhi. (Mateo 22:34-40) Apan aduna bay grupo sa mga tawo sukad nga nahigugma gayod sa ilang mga silingan? Gibuhat kana sa unang mga Kristohanon! Ilado sila sa gugma nga ilang nabatonan alang sa uban.—Juan 13:34, 35.

Komosta karong adlawa? Ang samag-Kristong gugma gihimo ba ni bisan kinsa? Ang Encyclopedia Canadiana miingon: “Ang buluhaton sa mga Saksi ni Jehova maoy pagpabuhi ug pagpalig-on pag-usab sa kanhiayng Kristiyanidad nga gihimo ni Jesus ug sa iyang mga tinun-an . . . Ang tanan managsoon.”

Unsay ipasabot niana? Nagpasabot kana nga walay gitugotan ang mga Saksi ni Jehova—walay rasa, nasyonalidad, ni etnikong kagikan—nga magtukmod kanila sa pagdumot sa ilang mga silingan. Ni mopatay sila ni bisan kinsa, kay mahulagwayon na nilang gisalsal ang ilang mga espada sa pagkahimong mga daro ug ang ilang mga bangkaw ngadto sa mga galab. (Isaias 2:4) Ang mga Saksi, sa pagkatinuod, nailhan sa pagpanguna sa pagtabang sa ilang mga silingan.—Galacia 6:10.

Dili ikatingala nga ang editoryal sa Sacramento Union sa California nakamatikod: “Husto ang pag-ingon nga kon ang tibuok kalibotan magkinabuhi sa pagtulon-an sa mga Saksi ni Jehova matapos gayod ang pag-ula sa dugo ug pagdumot, ug ang gugma magahari.” Usa ka magsusulat sa magasing Ring sa Hungaria miingon: “Ako nakapanghinapos nga kon ang mga Saksi ni Jehova lamang ang magpuyo sa yuta, ang gubat mahanaw, ug ang buluhaton lamang sa mga polis mao ang pagpadagan sa trapiko ug pag-isyu ug mga pasaporte.”

Angayng angkonon hinunoa, nga usa ka dako, tibuok kalibotang kausaban ang kinahanglanon aron ang tanang tawo mahigugma sa usag usa. Sa unsang paagi makab-ot kanang maong kausaban? (Tan-awa palihog ang likod nga panid.)

Sa Dihang ang Tanang Tawo Mahigugma sa Usag Usa

GIPAKITA sa pag-ampo nga gitudlo ni Jesu-Kristo nga ang usa ka kulbahinam nga kausaban haduol na. Sa iyang iladong Wali sa Bukid, kita gitudloan ni Jesus sa pag-ampo: “Moabot ang imong Gingharian. Matuman ang imong kabubut-on dinhi sa yuta, maingon man sa langit.”—Mateo 6:10, King James Version.

Unsa ang Gingharian sa Diyos? Kini maoy usa ka tinuod nga kagamhanan, usa nga magmando gikan sa langit. Mao kanay hinungdan nga kini gitawag nga “ang gingharian sa mga langit.” Si Jesus, ang “Prinsipe sa Pakigdait,” maoy gitudlo sa iyang Amahan nga mahimong magmamando niini.—Mateo 10:7; Isaias 9:6, 7; Salmo 72:1-8.

Inig-abot sa Gingharian sa Diyos, unsay mahitabo niining napuno-sa-pagdumot nga kalibotan? “Ang Gingharian,” “magdugmok ug magtapos” sa tanang dunot nga mga kagamhanan niining kalibotana. (Daniel 2:44) Nagsaysay ang Bibliya: “Ang kalibotan nagataliwan . . . , apan siya nga nagabuhat sa kabubut-on sa Diyos magapabilin hangtod sa hangtod.”—1 Juan 2:17.

Maylabot sa bag-ong kalibotan sa Diyos, ang Bibliya nagaingon: “Ang mga matarong mismo magapanag-iya sa yuta, ug sila magapuyo sa ibabaw niini sa walay kataposan.” (Salmo 37:9-11, 29; Proverbio 2:21, 22) Pagkamahimayaong panahon unya niana! “Wala na unyay kamatayon, ni pagbangotan ni pagtiyabaw ni may kasakit pa.” (Pinadayag 21:4) Bisan ang mga patay mabuhi pag-usab, ug ang tibuok kalibotan bag-ohon ngadto sa usa ka literal nga paraiso.—Isaias 11:6-9; 35:1, 2; Lucas 23:43; Buhat 24:15.

Aron makapuyo sa bag-ong kalibotan sa Diyos, kinahanglang maghigugmaay kita sa usag usa, ingon sa ginatudlo sa Diyos kanato nga buhaton. (1 Tesalonica 4:9) Usa ka estudyante sa Bibliya nga taga-Sidlakan miingon: “Ako naglantaw sa panahon sa dihang, ingon sa gisaad sa Bibliya, ang tanang tawo makakat-on sa paghigugma sa usag usa.” Ug kita makaseguro nga tumanon sa Diyos ang iyang mga saad! “Gipamulong ko na kini,” siya miingon, “buhaton ko usab kini.”—Isaias 46:11.

Apan aron makatagamtam sa mga panalangin ilalom sa Gingharian sa Diyos, kinahanglang mabatonan mo ang kahibalo sa Bibliya, sama sa ginahimo sa minilyong matinud-anog-kasingkasing nga mga tawo sa tibuok kalibotan. (Juan 17:3) Makatabang kanimo ang 32-panid nga brosyur nga Unsay Gikinahanglan sa Diyos Kanato? Batoni ang usa ka kopya pinaagig pagsulat sa kupon nga gitagana sa pikas panid ug sa pagpadala niana ngadto sa adres nga labing duol sa imong balay.

□ Buot kong makadawat sa brosyur nga Unsay Gikinahanglan sa Diyos Kanato?

□ Palihog kontaka ako maylabot sa usa ka libreng pagtuon sa Bibliya sa balay.

[Picture Credit Line sa panid 2]

Tigluthang ug paglubong sa Bosnia: Reuters/Corbis-Bettmann