Magmakugihon sa Pagbasa

ANG mga hayop dili makahimo sa imong ginabuhat karon mismo. Usa sa matag 6 ka tawo wala makatuon sa pagbasa​—kasagaran tungod kay wala makahigayon sa pag-eskuyla—​ug kadtong nakatuon sa pagbasa, ang daghan wala magbasang regular. Bisan pa niana, ang imong katakos sa pagbasa sa pinatik nga panid magpahinabo nga pinaagi niini ikaw makabiyahe ngadto sa ubang kayutaan, makahimamat ug mga tawo kansang kinabuhi makapatugob sa imong kinabuhi, ug makabatog praktikal nga kahibalo nga makatabang kanimo sa pag-atubang sa mga atimanonon sa kinabuhi.

Ang katakos sa pagbasa makaapektar kon unsa ka daghan ang makuha sa usa ka batan-on gikan sa iyang pag-eskuyla. Sa dihang mangita siyag trabaho, ang iyang katakos sa pagbasa makaapektar sa matang sa trabaho nga iyang mabatonan ug sa gidaghanon sa oras sa iyang pagtrabaho alang sa pangabuhi. Ang mga ginang sa panimalay nga maayong mobasa mas makaatiman sa ilang mga pamilya kon bahin sa tukmang pagkaon, panghinlo, ug pagsanta sa sakit. Ang mga inahang maayong mobasa maoy positibo kaayong impluwensiya sa kaugmaran sa pangutok sa ilang mga anak.

Dayag na lang, ang kinadak-ang kaayohan nga makuha sa pagbasa mao nga kini makapaarang kanimo sa ‘pagkaplag sa mismong kahibalo sa Diyos.’ (Prov. 2:5) Ang daghang paagi sa atong pag-alagad sa Diyos naglangkit sa katakos sa pagbasa. Ang Kasulatan ug ang binase-sa-Bibliyang mga basahon ginabasa sa mga tigom sa kongregasyon. Ang imong pagkaepektibo sa ministeryo sa kanataran apektado ug dako sa imong paagi sa pagbasa. Ug ang pagpangandam sa maong mga kalihokan naglangkit sa pagbasa. Tungod niana ang imong espirituwal nga pagtubo nagdependeg dako sa imong mga batasan sa pagbasa.

Pahimusli ug Maayo ang Kahigayonan

Ang pipila nga nagtuon sa mga dalan sa Diyos tingali gamay rag edukasyon. Basin sila kinahanglang tudloan sa pagbasa aron mouswag sila sa espirituwal. O basin sila nagkinahanglag personal nga tabang aron mouswag ang ilang mga kahanas sa pagbasa. Kon adunay lokal nga panginahanglan, ang mga kongregasyon maningkamot sa pag-organisar ug mga klase sa pagbasa ug pagsulat nga binase sa basahong Apply Yourself to Reading and Writing. Libolibo ang nakapahimulos pag-ayo sa maong tagana. Tungod kay hinungdanon ang pagkamaayong mobasa, ang pipila ka kongregasyon naghikay ug mga klase sa pagpauswag sa pagbasa nga ginahimo duyog sa Teokratikanhong Tunghaan sa Ministeryo. Bisan pag kanang mga klaseha wala himoa, ang usa ka tawo mouswag pag-ayo pinaagi sa paggahin ug diyutayng panahon kada adlaw alang sa kusog nga pagbasa ug sa regular nga pagtambong ug pagpakigbahin sa tunghaan.

Ikasubo, tungod sa mga komiks ug telebisyon, apil sa ubang mga butang, ang daghang tawo dili na tigbasa. Ang pagtan-awg telebisyon ug ang limitadong pagbasa makabalda sa kaugmaran sa mga kahanas sa pagbasa sa usa ka tawo ug sa iyang katakos sa paghunahuna ug pagpangatarongan sa tin-awng paagi ug sa pagpahayag pag-ayo sa iyang kaugalingon.

Ang mga basahon nga makatabang kanato sa pagsabot sa Bibliya gitagana sa “matinumanon ug maalamong ulipon.” Kini nagtaganag bahandi sa impormasyon maylabot sa bililhong espirituwal nga mga butang. (Mat. 24:45; 1 Cor. 2:​12, 13) Kini makapaarang usab nato sa pagkahibalo sa bag-ong hinungdanong mga lakaw sa kalibotan ug ilang kahulogan, kita matabangan nga mas masinati sa kinaiyahan, ug kita matudloan sa mga paagi sa pagsagubang sa mga isyu nga may kalangkitan kanato. Labaw sa tanan, kini nagpasiugda sa paagi sa pag-alagad sa Diyos sa dalawatong paagi ug pagbaton sa iyang pag-uyon. Ang maong mapuslanong pagbasa makatabang kanimo nga maugmad ingong espirituwal nga tawo.

Hinuon, ang katakos sa pagkamaayong mobasa dili hiyas sa kaugalingon. Kinahanglang gamiton ang maong kahanas sa hustong paagi. Sama sa pagkaon, ang pagbasa kinahanglang himoon sa mapiliong paagi. Nganong kan-on ang pagkaon nga dili sustansiyado o basin makahilo pa kanimo? Sa samang paagi, nganong mobasag materyal, bisan pag sa dili-ugdang nga paagi, nga makadaot sa hunahuna ug kasingkasing? Ang mga prinsipyo sa Bibliya angayng motagana sa sukdanan nga atong gamiton sa paghukom sa balasahon nga atong gipili. Sa dili pa mohukom kon unsay imong basahon, ibutang sa hunahuna ang mga kasulatan nga sama sa Ecclesiastes 12:​12, 13; Efeso 4:22-24; 5:​3, 4; Filipos 4:8; Colosas 2:8; 1 Juan 2:15-17; ug 2 Juan 10.

Pagbasa Uban ang Hustong Motibo

Ang kahinungdanon sa hustong motibo sa pagbasa matin-aw sa dihang susihon ang mga asoy sa Ebanghelyo. Sa Ebanghelyo ni Mateo, pananglitan, atong makita nga si Jesus nangutana sa batid nga relihiyosong mga pangulo sa mga pangutanang sama sa “Wala ba kamo makabasa?” ug “Wala ba gayod kamo makabasa niini?” una siya mohatag kanila sa Kasulatanhong mga tubag sa ilang mabitikong mga pangutana. (Mat. 12:​3, 5; 19:4; 21:​16, 42; 22:31) Ang usa ka leksiyon nga atong hikat-onan gikan niini mao nga kon ang atong motibo sa pagbasa dili husto, kita makahimog sayop nga mga konklusyon o dili makakuha sa bug-os nga punto. Ang mga Pariseo nagbasa sa Kasulatan tungod kay sila naghunahuna nga pinaagi niana, makabaton silag kinabuhing walay kataposan. Ang maong ganti, sumala sa gipunting ni Jesus, dili ihatag ngadto niadtong wala mahigugma sa Diyos ug magdawat sa Iyang paagi sa kaluwasan. (Juan 5:39-43) Ang mga intensiyon sa mga Pariseo maoy hinakog; busa, daghan sa ilang mga konklusyon maoy sayop.

Ang gugma alang kang Jehova mao ang labing putling motibo nga mabatonan nato sa pagbasa sa iyang Pulong. Kanang gugmaha modasig kanato nga sayron ang kabubut-on sa Diyos, kay ang gugma “magmaya uban sa kamatuoran.” (1 Cor. 13:6) Bisan pag sa nangagi kita dili ganahang mobasa, ang paghigugma kang Jehova uban sa atong ‘bug-os nga hunahuna’ modasig kanato sa paggamit nga kusganon sa atong mga kaisipan aron sa pagkuhag kahibalo bahin sa Diyos. (Mat. 22:37) Ang gugma mopukaw sa interes, ug ang interes mopalihok sa pagkakat-on.

Tagda ang Katulinon

Ang pagbasa moduyog sa pag-ila. Ingon nga ikaw nagabasa karon mismo, imong giila ang mga pulong ug gihinumdoman ang ilang kahulogan. Makapauswag ka sa katulinon sa imong pagbasa kon imong pauswagon ang natad sa pag-ila. Inay mohunong sa pagtan-aw sa matag pulong, sulayi ang pagtan-aw sa ubay-ubayng pulong sa usa ka higayon. Samtang imong maugmad ang maong katakos, imong hidiskobrehan nga makasabot kang mas tin-aw sa imong ginabasa.

Sa dihang magbasag mas laglom nga impormasyon, hinunoa, mahimong mas dako ang imong makuha gikan sa imong paningkamot pinaagi sa paggamit ug lain nga metodo. Sa pagtambag kang Josue bahin sa iyang pagbasa sa Kasulatan, si Jehova miingon: “Kining basahon sa balaod kinahanglang dili mahilayo sa imong baba, ug sa hinayng tingog kinahanglang magbasa ka niini adlaw ug gabii.” (Jos. 1:8) Ang pagsulti sa hinayng tingog sagad buhaton sa dihang ang usa ka tawo mamalandong. Busa, ang Hebreohanong termino nga gihubad ‘sa hinayng tingog magbasa’ gihubad usab nga “magpalandong.” (Sal. 63:6; 77:12; 143:5) Sa dihang mamalandong, ang usa ka tawo maghunahunag lalom; siya dili magdali. Ang pagbasa sa mapalandongong paagi magpahinabo nga ang Pulong sa Diyos mas dakog epekto diha sa hunahuna ug kasingkasing. Ang Bibliya naundan ug tagna, tambag, mga proverbio, balak, mga pahayag sa balaang paghukom, mga detalye bahin sa katuyoan ni Jehova, ug daghang tinuod-kinabuhing mga panig-ingnan​—tanan maoy bililhon alang niadtong buot molakaw sa mga dalan ni Jehova. Pagkamapuslanon ang pagbasa sa Bibliya sa paagi nga dulot kining masilsil sa imong hunahuna ug kasingkasing!

Magtuon sa Paghatag ug Bug-os nga Pagtagad

Samtang magbasa ka, ibutang ang imong kaugalingon sa matag esena nga ginabatbat. Sulayi ang pagtan-aw sa mga karakter pinaagi sa mata sa imong hunahuna, ug handurawa ang mga pagbating nalangkit sa mga kasinatian nga nagakahitabo sa ilang mga kinabuhi. Kini masayon sa dihang magbasag usa ka sugilanon sama sa iya ni David ug Goliat, nga nahisulat sa 1 Samuel kapitulo 17. Apan bisan ang mga detalye sa Exodo ug Levitico bahin sa pagtukod sa tabernakulo o sa pagpalingkod sa katungdanan sa saserdote maoy makaiikag ug daw buhi sa dihang imong hunahunaon ang mga sukod ug materyales o imong hunahunaon ang alimyon sa insenso, sinanglag nga mga lugas, ug mga hayop nga gihalad ingong mga halad-nga-sinunog. Hunahunaa kon unsa ka kahibulongan gayod ang pagtuman sa mga buluhaton sa saserdote! (Luc. 1:8-10) Ang paglangkit sa imong mga sentido ug imong mga emosyon niining paagiha motabang kanimo sa pagsabot sa kahulogan sa imong ginabasa ug makatabang sa paghinumdom.

Hinuon, kon dili ka magbantay, sa dihang maningkamot ka sa pagbasa, ang imong hunahuna basin maglatagaw. Ang imong mga mata tingali naglantaw sa panid, apan ang imong mga hunahuna atua sa laing dapit. Aduna bay gitugtog nga musika? Abli ba ang telebisyon? Nag-estoryahanay ba ang mga sakop sa pamilya? Kon mahimo, labing maayo ang pagbasa sa hilom nga dapit. Bisan pa niana, ang pagtugaw basin nagagikan sa kahiladman. Tingali puliki ang imong adlaw. Ay, pagkadali nga lunhawon ang mga kalihokan nianang adlawa diha sa imong kaisipan! Siyempre, maayo nga sublion ang mga panghitabo nianang adlawa​—apan dili panahon sa imong pagbasa. Ikaw tingali mosugod nga ang imong hunahuna nasentro niana, o tingali imong buksan pa ang sesyon sa imong pagbasa uban sa pag-ampo. Apan unya samtang nagbasa ka, ang imong hunahuna mosugod paglatagaw. Sulayi na usab. Disiplinaha ang imong kaugalingon nga isentro ang imong kaisipan nganha sa imong ginabasa. Sa inanay, makita nimo ang pag-uswag.

Unsay imong himoon inigkakita nimog usa ka pulong nga dili nimo masabtan? Ang pipila ka di-sinating mga pulong tingalig gibatbat o gihisgotan sa teksto. O mahimong masabtan nimo ang kahulogan gikan sa konteksto. Kon dili man, tan-awa ang pulong diha sa diksiyonaryo kon aduna, o timan-i ang pulong aron makapangutana kag laing tawo bahin sa kahulogan niana. Kini makapauswag sa imong bokabularyo ug makatabang nga masabtan ang imong ginabasa.

Publikong Pagbasa

Sa giawhag ni apostol Pablo si Timoteo nga magpadayon sa pagkugi sa pagbasa, tinong gitumong ni Pablo ang pagbasa alang sa kaayohan sa uban. (1 Tim. 4:13) Ang epektibo nga publikong pagbasa naglangkit dili lamang sa yanong kusog nga pagbasa sa mga pulong gikan sa usa ka panid. Ang magbabasa kinahanglang makasabot sa kahulogan sa mga pulong ug makasabot sa mga ideyang gipahayag niana. Sa panahon lamang nga siya makahimo niana nga siya makapasa sa mga ideya sa hustong paagi ug makapatungha sa mga emosyon sa tukmang paagi. Hinuon, nagkinahanglan kinig bug-os nga pagpangandam ug pagbansay. Busa, si Pablo miawhag: “Magmakugihon diha sa publikong pagbasa.” Makadawat kag bililhong pagbansay sa maong kahanas diha sa Teokratikanhong Tunghaan sa Ministeryo.

Gahinig Panahon ang Pagbasa

“Ang mga plano sa kugihan mosangpot gayod sa kaayohan, apan ang matag usa nga madalidalion mosangko lamang sa kawalad-on.” (Prov. 21:5) Pagkatinuod niana kon bahin sa atong tinguha sa pagbasa! Aron makuha ang “kaayohan,” kinahanglang kita magplanong makugihon aron ang ubang mga kalihokan dili makabalda sa atong pagbasa.

Kanus-a ka ba magbasa? Makaayo ba kanimo ang pagbasag sayo sa buntag? O mas igmat ka ba sa hapon o gabii? Kon makagahin kag bisan 15 o 20 minutos kada adlaw sa pagbasag diyutay, matingala ka sa pagkadaghan sa imong mabasa. Ang yawi mao ang pagkaregular.

Nganong gipalabi ni Jehova nga ipasulat ang iyang talagsaong mga katuyoan diha sa usa ka basahon? Aron ang katawhan makasusi sa iyang sinulat nga Pulong. Kini makapaarang nila sa pagpalandong sa kahibulongang mga buhat ni Jehova, sa pagsugid niini ngadto sa ilang mga anak, ug sa pagbutang diha sa panumdoman sa mga buhat sa Diyos. (Sal. 78:5-7) Ang atong pagpabili sa kamanggihatagon ni Jehova niining bahina ikapasundayag nga labing maayo diha sa paagi sa atong pagkugi sa pagbasa sa iyang nagahatag-kinabuhing Pulong.