Programa Aron Maugmad ang Katakos Ingong Usa ka Mamumulong ug Magtutudlo

BATAN-ON ka man o edaran, lalaki o babaye, kining kursoha makatabang nimo sa pagpahayag sa imong kaugalingon nga mas epektibo ug sa pagkahimong mas kuwalipikado ingong usa ka magtutudlo sa Pulong sa Diyos.

Ang mga asaynment sa mga nagpalista sa Teokratikanhong Tunghaan sa Ministeryo pagahimoon sa magtatan-aw sa tunghaan. Sa mosunod nga tulo ka panid, makita nimo ang imong personal nga porma sa talambagan. Ang mga numero una pa sa nagkalainlaing punto motakdo sa mga tun-anan diha sa mosunod nga mga panid. Sa maong mga tun-anan makaplagan mo ang katin-awan kon unsay nalangkit sa pagkahimong batid niining mga bahina sa pagpanulti ug pagpanudlo ug kon nganong hinungdanon ang kada usa. Makaplagan mo usab ang mapuslanong pagtultol kon unsaon pagkab-ot ang girekomendar nga pauswagon.

Ang kolor diha sa porma sa talambagan magpakita kon unsang mga puntoha ang mapadapat sa mga asaynment nga naglakip sa (1) pagbasa ngadto sa mamiminaw, (2) pasundayag uban ang duha o kapin pang mga igsoon, o (3) pakigpulong ngadto sa kongregasyon. Ang magtatan-aw sa tunghaan maoy moasayn sa punto nga imong pauswagon. Mas maayong pauswagon lamang ang usa ka punto sa usa ka higayon. Ikaw makabaton ug kaayohan pinaagi sa mga pagbansaybansay nga girekomendar diha sa tumoy sa gitudlong tun-anan. Kon mapamatud-an nimo nga nagmalamposon ka sa pagpadapat sa tambag diha sa gitudlong tun-anan, ang imong magtatambag moasayn kanimo ug laing punto.

Kon ang imong asaynment dumalahon ingong usa ka pasundayag, magkinahanglan kag usa ka tagboanan. Ang listahan sa mga tagboanan makita sa panid 82, apan wala ka limitahe niining listahana. Ang imong magtatambag tingali morekomendar nga mosulay kag usa ka tinong tagboanan aron makabaton kag kasinatian, o ikaw nay papilion ug tagboanan.

Ang pagbasa niining basahona ug ang mga pagbansaybansay bisan kon wala ka mangandam ug mga asaynment sa tunghaan makaamot ug dako sa imong pag-uswag. Tingali makakobre kag laing tun-anan kada semana o halos kada semana.

Way sapayan kon unsa ka na ka dugay nga nakigbahin sa tunghaan o nakig-ambit sa pag-alagad sa kanataran, makapadayon ka gihapon sa pag-uswag. Hinaot nga makapahimulos ka sa bug-os sa edukasyon nga gitagana pinaagi sa Teokratikanhong Tunghaan sa Ministeryo.