Kadasig

ANG kadasig motabang nga mahimong buhi ang pakigpulong. Bisag hinungdanon ang pagbatog impormatibong materyal, ang buhi, madasigong paagi sa pagsulti maoy motabang nga makuha ang pagtagad sa mamiminaw. Way sapayan sa imong kultura o personalidad, ang kadasig imong maugmad.

Sulti nga May Pagbati. Sa dihang nakigsulti sa usa ka babaye sa Samaria, si Jesus miingon nga kadtong mosimba kang Jehova kinahanglang mobuhat niana “uban sa espiritu ug sa kamatuoran.” (Juan 4:24) Ang ilang pagsimba kinahanglang palihokon sa mapabilhong mga kasingkasing ug mahiuyon sa kamatuoran nga makaplagan diha sa Pulong sa Diyos. Kon ang usa ka tawo adunay ingon ka lalom nga pagpabili, kini mabanaag diha sa iyang paagi sa pagsulti. Maikag siya sa pagsulti ngadto sa uban bahin sa mahigugmaong mga tagana ni Jehova. Ang iyang mga ekspresyon sa nawong, pagkompas, ug tingog mosumbalik-silaw sa tinuod niyang gibati.

Nan, nganong ang mamumulong nga nahigugma kang Jehova ug nagtuo sa iyang ginasulti makulangan ug kadasig sa dihang siya magpakigpulong? Dili igo nga mangandam lamang siya sa iyang isulti. Kinahanglang bug-os siyang maikagon sa iyang ulohan, nga magpahayag niana uban ang pagbati. Ingnon ta nga siya natudlo nga mopakigpulong bahin sa halad lukat ni Jesu-Kristo. Sa dihang mopahayag ang mamumulong, ang iyang kaisipan kinahanglang mapuno, dili lamang sa mga detalye, kondili sa pagpabili sa kahulogan sa halad ni Jesus alang kaniya nga mamumulong ug sa iyang mamiminaw. Angay niyang palandongon ang iyang mga pagbati sa pagkamapasalamaton kang Jehova nga Diyos ug Kristo Jesus alang niining kahibulongang tagana. Angay niyang hunahunaon ang dakong palaaboton sa kinabuhi nga gibuksan niini alang sa katawhan​—dumalayong kalipay sa hingpit nga kahimsog diha sa napasig-uling paraiso sa yuta! Busa kinahanglang ilangkit niya ang iyang kasingkasing.

Maylabot sa eskribang si Esdras, usa ka magtutudlo sa Israel, ang Bibliya nag-ingon nga iyang ‘giandam ang iyang kasingkasing sa pagkonsulta sa balaod ni Jehova ug sa pagbuhat niini ug sa pagtudlo sa Israel.’ (Esd. 7:10) Kon buhaton nato ang ingon​—nga andamon dili lamang ang impormasyon kondili ang atong kasingkasing usab​—kita makasulti nga kinasingkasing. Ang maong kinasingkasing nga ekspresyon sa kamatuoran makatabang ug dako nga maugmad ang tiunay nga gugma sa kamatuoran sa atong mamiminaw.

Hunahunaa ang Imong Mamiminaw. Ang laing bililhong butang nga makatabang sa pagpakita sa kadasig mao ang pagbaton ug hugot nga pagtuo nga ang imong mamiminaw kinahanglang makadungog sa imong isulti. Nagpasabot kini nga sa dihang mangandam ka sa imong presentasyon, dili lang igo nga imong tigomon ang bililhong materyal kondili mag-ampo ka usab kang Jehova alang sa iyang giya sa paggamit niana aron mapahimuslan sa imong mamiminaw. (Sal. 32:8; Mat. 7:​7, 8) Analisaha kon nganong angayng madunggan sa imong mamiminaw ang impormasyon, kon sa unsang paagi kini makahatag nilag kaayohan, ug kon unsaon nimo pagpresentar niini sa paagi nga mapabilhan nila kini.

Pangandam sa imong materyal hangtod nga ikaw makabatog impormasyon nga mahinam ka na sa pagpahayag. Kini dili kinahanglang bag-o, kondili ang imong estilo sa pagpresentar sa ulohan tingali orihinal. Kon mangandam kag impormasyon nga sa tinuoray makatabang sa imong mamiminaw aron malig-on ang ilang relasyon kang Jehova, mapabilhan ang iyang mga tagana, malamposong masagubang ang mga kapit-os sa kinabuhi niining karaang sistema, o magmaepektibo sa ilang ministeryo, nan daghan kag katarongan nga magmadasigon sa imong pakigpulong.

Unsa na man kon ang imong asaynment mao ang pagbasa sa publiko? Aron mahimo kana sa madasigong paagi, dugang pa ang gikinahanglan kay sa paglitok lamang sa mga pulong sa hustong paagi ug sa tukmang paghugpong niini. Tun-i ang materyal. Kon mobasa kag bahin sa Bibliya, paghimog diyutayng panukiduki bahin niana. Tinoa nga masabtan nimo ang paninugdang kahulogan niini. Tagda kon nganong kini mapuslanon para nimo ug sa imong mamiminaw, ug basaha uban ang tinguha sa pagpasa niana ngadto sa imong mamiminaw.

Nangandam ka ba sa ministeryo sa kanataran? Sublia ang ulohan nga imong hisgotan ug ang kasulatan nga gihunahuna nimong gamiton. Palandonga usab kon unsay anaa sa hunahuna sa mga tawo. Unsa may bag-ong mga balita? Unsang mga problemaha ang ilang ginaatubang? Kon ikaw nasangkapan aron ipakita sa mga tawo nga ang Pulong sa Diyos naundan sa mga solusyon sa mga suliran nga nakapabalaka nila, mobati kag kasibot sa pagbuhat niana, ug ang kadasig kinaiyanhong makita.

Ipakita ang Kadasig Pinaagig Madasigong Pakigpulong. Ang kadasig ilabinang madayag pinaagi sa pagkamadasigon diha sa imong pakigpulong. Angay kining makita diha sa ekspresyon sa imong nawong. Kinahanglang ikaw kombinsido, nga dili hawod paminawon.

Ang pagkatimbang gikinahanglan. Ang uban tingali dali rang mahinam mahitungod sa tanang butang. Basin kinahanglang tabangan sila aron makaamgo nga kon ang usa ka tawo mahimong mapagawalon o sobra ka emosyonal, ang iyang mamiminaw maghunahuna bahin kaniya inay kay sa iyang mensahe. Sa laing bahin, silang maulawon kinahanglang dasigon nga magmapahayagon pa sa ilang gibati.

Ang kadasig makatakod. Kon ikaw adunay maayong kontak sa mamiminaw ug madasigon sa imong pakigpulong, bation sa imong mamiminaw ang maong kadasig. Si Apolos nagpakitag kasibot sa iyang pagsulti, ug siya gihubit ingong larinong mamumulong. Kon ikaw mainiton sa espiritu sa Diyos, ang imong madasigong pakigpulong magpalihok niadtong mga maminaw kanimo.​—Buh. 18:​24, 25; Roma 12:11.

Kadasig nga Nahiangay sa Materyal. Bantayi nga dili masobrahan ang imong kadasig sa tibuok nimong pakigpulong kay basig kapoyon ang imong mamiminaw. Ang bisan unsang pag-awhag nga imong ihatag aron ipadapat ang gihisgotan molapos lang sa pikas dunggan. Nagpasiugda kini sa panginahanglan sa pagpangandam sa materyal nga motugot sa pagpalahilahi diha sa imong pakigpulong. Paningkamoti nga dili mausab ang imong estilo nga magpakitag pagkaway-pagtagad. Kon pilion nimog maayo ang imong materyal, ikaw dulot nga maikag niana. Apan ang pipila ka punto natural lang nga magkinahanglag mas madasigong pagsulti kay sa ubang punto, ug kini kinahanglang mahanasong matagik diha sa tibuok nimong pakigpulong.

Ang pangunang mga punto angay nga ipresentar sa madasigong paagi. Ang imong pakigpulong kinahanglang dunay tayuktok nga mga punto, mga kinapungkayan nga ngadto niana tagikon ang imong pakigpulong. Sanglit mao kini ang dagkong mga punto sa imong pakigpulong, sagad nga kini mao ang mga puntong gidisenyo sa pagpalihok sa imong mamiminaw. Kay nakombinsir na ang imong mamiminaw, kinahanglang palihokon nimo sila, aron ipakita kanila ang mga kaayohan sa pagpadapat sa gihisgotan. Ang imong kadasig motabang nimo sa pagtukbil sa kasingkasing sa imong mga mamiminaw. Ang madasigong pagpakigpulong dili angayng pinugos. Kinahanglang dunay rason alang niana, ug ang imong materyal mohatag nimo sa maong rason.