Gipahayag Uban sa Kombiksiyon

SA DIHANG ang usa ka tawo mosulti uban sa kombiksiyon, masabtan sa uban nga siya hugot nga nagtuo sa iyang ginasulti. Ang maong kombiksiyon nadayag diha sa ministeryo ni apostol Pablo. Ngadto kanilang nahimong mga magtutuo sa Tesalonica, siya misulat: “Ang maayong balita nga among giwali wala makaplagi sa inyong taliwala uban ang mga sulti lamang apan usab uban . . . ang hugot nga pagtuo.” (1 Tes. 1:5) Ang maong kombiksiyon nadayag sa paagi sa iyang pagsulti ug sa paagi sa iyang pagkinabuhi. Ang lig-ong kombiksiyon angay usab madayag diha sa paagi sa atong pagpahayag sa mga kamatuoran sa Bibliya.

Ang pagpahayag sa kombiksiyon dili pareho sa hinobrang pagsunod sa kaugalingong opinyon, pagkadogmatiko, o pagkahambogiro. Sa kapulihay, sa dihang ang usa ka tawong nagpadayag sa kombiksiyon mosulti bahin sa mga butang diha sa Pulong sa Diyos, siya mosulti sa paaging magpakitag lig-on nga pagtuo.​—Heb. 11:1.

Mga Higayon sa Pagpahayag sa Kombiksiyon. Hinungdanon ang pagsulti uban sa kombiksiyon sa dihang nagaalagad ka sa kanataran. Ang mga tawo kasagarang makamatikod sa imong sinultihan ingon man sa imong mensahe. Makasabot sila kon unsay imong tinuod nga pagbati bahin sa imong ginasulti. Ang imong kombiksiyon makapaila, nga mas kusganon kay sa mga pulong lamang, nga ikaw adunay bililhong butang nga ipaambit.

Kinahanglan usab ang pagpahayag sa kombiksiyon sa dihang magpakigpulong sa mamiminaw nga mga isigkamagtutuo. Si apostol Pedro misulat sa iyang unang inspiradong sulat “aron sa paghatag ug pagdasig ug usa ka matinuorong pagpamatuod nga kini ang matuod nga dili-takos nga kalulot sa Diyos.” Diha niini, iyang giawhag ang mga igsoon: “Barog kamo nga malig-on.” (1 Ped. 5:12) Sa dihang misulat ngadto sa kongregasyon sa Roma, si apostol Pablo mipahayag sa kombiksiyon nga nakahatag kanilag kaayohan. Siya misulat: “Kombinsido ako nga dili ang kamatayon ni kinabuhi ni mga manulonda ni mga kagamhanan ni mga butang nga ania karon ni mga butang nga moabot ni mga gahom ni gihabogon ni giladmon ni bisan unsang ubang linalang ang makabulag kanato gikan sa gugma sa Diyos nga anaa kang Kristo Jesus nga atong Ginoo.” (Roma 8:​38, 39) Si Pablo misulat usab nga mahayloon bahin sa panginahanglan nga mosangyaw sa uban, ug ang iyang kaugalingong kadasig sa maong buluhaton mihatag ug tin-awng pamatuod nga siya sa personal kombinsido sa kahinungdanon niini. (Buh. 20:18-21; Roma 10:​9, 13-15) Ang susamang kombiksiyon angayng madayag sa bahin sa Kristohanong mga ansiyano karong adlawa samtang sila magtudlo sa Pulong sa Diyos.

Panahon sa mga yugto sa pagtuon ug sa ubang mga higayon, ang mga ginikanan kinahanglang magpahayag sa ilang kaugalingon uban sa kombiksiyon sa dihang maghisgot ug espirituwal nga mga butang uban sa ilang mga anak. Gikinahanglang ang mga ginikanan makaugmad sa gugma sa Diyos ug sa iyang mga dalan diha sa ilang kaugalingong mga kasingkasing. Unya sila makasulti uban sa kinasingkasing nga kombiksiyon ngadto sa ilang mga anak, ‘kay gikan sa kadagaya sa kasingkasing ang baba magasulti.’ (Luc. 6:45; Deut. 6:5-7) Ang pagbaton sa maong kombiksiyon mopalihok usab sa mga ginikanan sa paghatag ug panig-ingnan bahin sa “pagtuo nga walay pagkasalingkapaw.”​—2 Tim. 1:5.

Hinungdanon ilabina ang pagpahayag sa imong kaugalingon uban sa kombiksiyon sa dihang ang imong pagtuo pagalalison. Ang usa ka kauban sa eskuylahan, magtutudlo, o kauban sa trabaho basin magpahayag ug katingala nga ikaw dili moapil sa usa ka selebrasyon. Ang lig-on, maayog-pangatarongan nga tubag basin makatabang kaniya sa pagtahod sa imong baroganan nga gipasukad sa Bibliya. Unsa na man kon may mosulay sa pagtental kanimo sa pagbuhat ug daotan​—panglimbong, pag-abusar sa mga droga, o seksuwal nga imoralidad? Hinungdanon nga tin-awon nimo nga dili ka gayod mohimo sa maong buhat ug walay paningkamot sa paghaylo ang makapausab sa imong hunahuna. Gikinahanglan nga ikaw mosulti uban sa kombiksiyon sa dihang magasalikway sa tanyag. Sa misupak sa mahilayong mga panental sa asawa ni Potipar, si Jose lig-ong misulti: “Unsaon ko pagbuhat kining dakong pagkadaotan ug makasala gayod batok sa Diyos?” Sa dihang nagpadayon siya sa pagpanental, si Jose mikalagiw gikan sa balay.​—Gen. 39:​9, 12.

Kon Unsaon Pagpadayag sa Kombiksiyon. Ang mga pulong nga imong gamiton dakog mahimo sa pagpaila sa imong kombiksiyon. Sa ubay-ubayng higayon giunhan ni Jesus ang hinungdanong mga pahayag nga miingon: “Sa pagkatinuod gayod ako magaingon kanimo.” (Juan 3:​3, 5, 11; 5:​19, 24, 25) Ang kombiksiyon ni Pablo gibanaag diha sa mga ekspresyong sama sa “Kombinsido ako,” “Ako nahibalo ug ako nakombinsir diha sa Ginoong Jesus,” ug “Ako nagsulti sa kamatuoran, ako wala mamakak.” (Roma 8:38; 14:14; 1 Tim. 2:7) Mahitungod sa pagkatuman sa iyang pulong, may mga panahong si Jehova nagdasig sa iyang mga manalagna sa pagpahayag ug mapasiugdahong mga pulong, sama sa, “Kini matuman gayod.” (Hab. 2:3) Sa dihang hisgotan mo kining mga tagnaa, makagamit ka sa susamang mga pulong. Kon mosalig ka dili sa imong kaugalingon kondili diha kang Jehova ug kon ikaw mosulti sa uban sa matinahorong paagi, ang mga ekspresyong mopabanaag sa susamang kombiksiyon maghatag ug ebidensiya nga ikaw may lig-ong pagtuo.

Ang kombiksiyon ikapakita usab pinaagi sa katim-os ug kamainiton sa imong ekspresyon. Ang mga ekspresyon sa imong nawong, imong mga kompas, ug mga lihok sa imong lawas ngatanan makatabang niini, bisan pag kini tingali magkalain sa nagkalainlaing mga tawo. Bisan pag ikaw maulawon o sa kinaiyanhon lumo ug tingog, kon ikaw bug-os nadani nga ang imong ginasulti mao ang kamatuoran ug kinahanglang madungog kini sa uban, ang imong kombiksiyon madayag.

Siyempre, ang bisan unsang mga pagpahayag sa kombiksiyon nga atong pagahimoon kinahanglang tiunay. Kon ang mga tawo makasabot nga nagpakaaron-ingnon kita inay nagsulting kinasingkasing, sila lagmit mohinapos nga ang atong mensahe dili bililhon. Busa, labaw sa tanan, mahimong natural. Depende sa gidaghanon sa imong mamiminaw, basin kinahanglang mosulti kang mas kusog ug mas mainiton kay sa kasagaran. Apan ang imong tumong kinahanglang mao ang pagpahayag sa imong kaugalingon sa sinsero ug natural nga paagi.

Mga Tabang sa Pagpahayag sa Kombiksiyon. Sanglit ang imong kombiksiyon naglangkit sa imong mga pagbati bahin sa imong materyal, ang maayong pagpangandam mahinungdanon. Ang pagkopya lamang sa materyal gikan sa usa ka basahon ug unya pagpahayag niana dili igo. Kinahanglang ikaw tin-awng nakasabot sa materyal ug makapahayag niana diha sa imong kaugalingong mga pulong. Kinahanglang ikaw bug-os nga kombinsido nga kini tinuod ug ang imong ginasulti bililhon alang sa imong mamiminaw. Nagpasabot kini nga sa dihang mangandam sa imong presentasyon, tagdon nimo ang ilang mga kahimtang ingon man kon unsay ilang nahibaloan na bahin sa ulohan o kon unsa tingaliy ilang pagbati bahin niana.

Mas sayonan ang uban sa pagsabot sa atong kombiksiyon kon ang atong pagsulti maoy larino. Busa, dugang sa pagpangandam ug maayong materyal, pangandami pag-ayo ang imong pagpahayag. Hatagig linaing atensiyon ang mga bahin sa imong materyal nga nagkinahanglag labawng kadasig aron makapahayag ka niana nga dili kanunayng motan-aw sa imong mga nota. Hinumdomi, usab, ang pag-ampo alang sa panalangin ni Jehova diha sa imong mga paningkamot. Niining paagiha ikaw ‘makabaton ug kaisog pinaagi sa atong Diyos’ aron mosulti sa paaging mobanaag sa imong kombiksiyon bahin sa pagkatinuod ug pagkahinungdanon sa imong mensahe.​—1 Tes. 2:2.