Kapitulo Kinse

Patalinghog sa Tambag, Dawata ang Disiplina

1. (a) Nganong kitang tanan nagkinahanglan ug tambag ug disiplina? (b) Unsang pangutanaha ang angay natong tagdon?

“KITANG tanan mangapandol sa makadaghan,” nag-ingon ang Bibliya sa Santiago 3:2. Makahunahuna kitag daghang kahimtang nga kita napakyas kon bahin sa matang sa pagkatawo nga giawhag kanato sa Pulong sa Diyos. Busa atong giila nga husto ang giingon sa Bibliya sa dihang kini nag-ingon: “Patalinghog sa tambag ug dawata ang disiplina, aron ikaw mahimong maalamon sa imong ugma-damlag.” (Proverbio 19:20) Sa walay duhaduha naghimo na kitag mga pagpasibo sa atong kinabuhi aron ipahiuyon kini sa mga pagtulon-an sa Bibliya. Apan unsay atong pagsanong kon ang isigka-Kristohanon motambag kanato bahin sa usa ka tinong butang?

2. Unsay angay natong buhaton kon makadawat kitag personal nga tambag?

² Ang uban mosanong pinaagi sa pagpakamatarong sa ilang kaugalingon, pagpamenos sa kaseryoso sa kahimtang, o sa pagbasol sa uban. Apan mas maayong patalinghogan ang tambag ug ipadapat kana. (Hebreohanon 12:11) Siyempre, walay usang angay nga magdahom ug kahingpitan sa uban, ni kanunay siyang motambag bahin sa ginagmayng mga butang o sa mga butang diin gitugot sa Bibliya ang personal nga pagpili. Gawas pa, ang nagtambag wala tingali magsusi sa tanang kamatuoran, ug kini mahimong dad-on sa iyang pagtagad sa matinahorong paagi. Apan sa mosunod nga panaghisgot, ingnon ta nga ang tambag o disiplinang gihatag maoy tukma, pinasukad sa Bibliya. Sa unsang paagi angayng mosanong ang usa?

Mga Panig-ingnan nga Angay Natong Tagdon sa Dihang Tambagan

3, 4. (a) Unsay anaa sa Bibliya nga makatabang nato nga maugmad ang hustong tinamdan bahin sa tambag ug disiplina? (b) Unsay reaksiyon ni Haring Saul sa tambag, ug uban sa unsang sangpotanan?

³ Ang Pulong sa Diyos naundan ug tinuod-kinabuhing mga kasinatian sa mga tawong nakadawat ug gikinahanglang tambag. Usahay, ang tambag giubanag disiplina. Usa sa maong indibiduwal mao si Haring Saul sa Israel. Siya napakyas sa pagsunod kang Jehova bahin sa nasod sa Amalek. Ang mga Amalekanhon misupak sa mga alagad sa Diyos, ug ang balaang paghukom ni Jehova mao nga dili luwason ang mga Amalekanhon ni ang ilang binuhing mga hayop. Apan si Haring Saul nagluwas sa ilang hari ug sa kinamaayohan sa ilang mga mananap.​—1 Samuel 15:1-11.

⁴ Gipadala ni Jehova ang manalagnang si Samuel aron sa pagbadlong kang Saul. Unsay reaksiyon ni Saul? Siya miergo nga iya mang gilaglag ang mga Amalekanhon apan yanong midesidir nga luwason ang ilang hari. Bisan pa niana, kadto maoy supak sa sugo ni Jehova. (1 Samuel 15:20) Misulay si Saul pagbasol sa mga tawo sa pagluwas sa binuhing mga hayop, nga nag-ingon: “Nahadlok ako sa katawhan ug busa ako nagtuman sa ilang tingog.” (1 Samuel 15:24) Daw mas mabalak-on siya sa iyang kaugalingong dungog, nga mihangyo pa gani kang Samuel nga pasidunggan siya atubangan sa mga tawo. (1 Samuel 15:30) Sa kataposan, gisalikway ni Jehova si Saul ingon nga hari.​—1 Samuel 16:1.

5. Unsay nahitabo kang Haring Uzzias sa dihang gisalikway niya ang tambag?

⁵ Si Haring Uzzias sa Juda “milihok nga dili-matinumanon batok kang Jehova nga iyang Diyos ug misulod sa templo ni Jehova aron sa pagsunog ug insenso.” (2 Cronicas 26:16) Apan sumala sa balaod, ang mga saserdote lamang ang makatanyag ug insenso. Sa dihang ang hataas nga saserdote naningkamot pagpugong kang Uzzias, ang hari nasuko. Unsay nahitabo? Ang Bibliya nag-ingon: “Ang sanla mitunghag kalit diha sa iyang agtang . . . kay si Jehova naghampak kaniya. Ug si Uzzias nga hari nagpabiling usa ka sanlahon hangtod sa adlaw sa iyang kamatayon.”​—2 Cronicas 26:19-21.

6. (a) Nganong si Saul ug Uzzias midumili sa tambag? (b) Nganong ang pagdumili sa tambag maoy usa ka seryosong suliran karon?

⁶ Nganong si Saul ug Uzzias nalisdan pagdawat sa tambag? Ang paninugdang suliran mao ang garbo, silang duha taas kaayog paglantaw sa kaugalingon. Daghan ang magdalag kasakit sa ilang kaugalingon tungod niining batasana. Mora bag gibati nila nga ang pagdawat ug tambag magpasabot ug kakulangan diha nila o magdaot sa ilang dungog. Apan ang garbo maoy usa ka kahuyangan. Ang garbo magpalubog sa panghunahuna sa usa ka tawo mao nga mosulay siya pagdumili sa tabang nga gitagana ni Jehova pinaagi sa iyang Pulong ug organisasyon. Busa, si Jehova nagpasidaan: “Ang garbo nagauna sa pagkahagsa, ug ang mapahitas-ong espiritu nagauna sa pagkapukan.”​—Proverbio 16:18; Roma 12:3.

Pagdawat sa Tambag

7. Unsang positibong mga pagtulon-an ang atong makat-onan sa paagi ni Moises sa pagsanong sa tambag?

⁷ Ang Kasulatan naundan usab ug maayong mga panig-ingnan niadtong midawat ug tambag, ug kita makakat-on gikan niini. Tagda si Moises, nga gitambagan sa iyang ugangang lalaki kon unsaon pagdumala sa iyang bug-at nga buluhaton. Si Moises naminaw kaniya ug gipadapat dayon kana. (Exodo 18:13-24) Bisan pag si Moises dako ug awtoridad, nganong madinawaton siya sa tambag? Tungod kay siya mapainubsanon. “Si Moises mao ang labing maaghop sa tanang tawo sa ibabaw sa nawong sa yuta.” (Numeros 12:3) Unsa ka hinungdanon ang kaaghop? Ang Sofonias 2:3 nagpakita nga kini magkahulogan sa atong kinabuhi.

8. (a) Unsang mga sala ang nabuhat ni David? (b) Unsay reaksiyon ni David sa pagbadlong ni Natan? (c) Unsay mga gisangpotan sa mga sala ni David?

⁸ Si Haring David nanapaw kang Batseba ug naningkamot pagtabon niini pinaagi sa pagpapatay sa iyang bana, si Urias. Gipadala ni Jehova si manalagnang Natan sa pagbadlong kang David. Siya naghinulsol ug miadmitir dayon: “Ako nakasala batok kang Jehova.” (2 Samuel 12:13) Bisan tuod gidawat sa Diyos ang paghinulsol ni David, nag-antos siya sa mga gisangpotan sa iyang daotang buhat. Giingnan siya ni Jehova nga ang espada “dili mobulag gikan sa [iyang] kaugalingong balay,” nga ang iyang mga asawa ihatag “ngadto sa [iyang] isigkatawo,” ug nga ang anak lalaki nga matawo tungod sa iyang pagpanapaw “mamatay gayod.” ​—2 Samuel 12:​10, 11, 14.

9. Unsay dili gayod nato kalimtan kon kita tambagan o disiplinahon?

⁹ Si Haring David nahibalo sa kaayohan sa pagpatalinghog sa maayong tambag. Sa usa ka okasyon, iyang gipasalamatan ang Diyos tungod sa usa ka tawo nga iyang gigamit sa pagtambag. (1 Samuel 25:32-35) Ingon ba kita niana? Kon mao, mapanalipdan kita batok sa pagsulti ug pagbuhat sa daghang butang nga ato lamang pagabasolan. Apan unsa na man kon masugamak kitag mga kahimtang nga motultol nga kita tambagan o kaha disiplinahon? Dili unta kita malimot nga kini maoy ebidensiya sa gugma ni Jehova, nga naghunahuna sa atong dumalayong kaayohan.​—Proverbio 3:​11, 12; 4:13.

Bililhong mga Hiyas nga Pagaugmaron

10. Unsang hiyas ang gipakita ni Jesus nga kinahanglanon alang niadtong makasulod sa Gingharian?

¹⁰ Aron mabatonan ang maayong relasyon uban kang Jehova ug sa atong Kristohanong mga igsoon, angay natong ugmaron ang tinong mga hiyas. Gipakita ni Jesus ang usa niini sa dihang gipatindog niya ang usa ka bata taliwala sa iyang mga tinun-an ug miingon: “Gawas kon kamo motalikod ug mahimong sama sa mga bata, dili gayod kamo makasulod sa gingharian sa mga langit. Busa, bisan kinsa nga magapaubos sa iyang kaugalingon sama niining bataa mao ang labing dako sa gingharian sa mga langit.” (Mateo 18:​3, 4) Kinahanglang ugmaron sa mga tinun-an ni Jesus ang pagpaubos, kay nag-ergohay sila kon kinsa kanila ang labing dako.​—Lucas 22:24-27.

11. (a) Atubangan kang kinsa nga kita kinahanglang magpaubos, ug ngano? (b) Kon kita mapainubsanon, sa unsang paagi kita mosanong sa tambag?

¹¹ Si apostol Pedro misulat: “Kamong tanan sul-obi ang inyong kaugalingon sa pagkamapainubsanon sa hunahuna ngadto sa usag usa, tungod kay ang Diyos magabatok sa mga mapahitas-on, apan magahatag siyag dili-takos nga kalulot sa mga mapainubsanon.” (1 Pedro 5:5) Kita nahibalo nga kinahanglang magpaubos kita atubangan sa Diyos, apan kini nga kasulatan nagpakita nga kinahanglang magpaubos usab kita uban sa mga isigkamagtutuo. Kon ingon kita niana, dili kita masuko sa maayong mga sugyot nga ihatag kanato sa uban kondili makakat-on gikan niana.​—Proverbio 12:15.

12. (a) Unsang hinungdanong hiyas ang suod nga nalangkit sa pagkamapainubsanon? (b) Nganong angay kitang mabalaka sa mahimong epekto sa atong panggawi diha sa uban?

¹² Ang suod nga nalangkit sa pagkamapainubsanon mao ang kabalaka sa kaayohan sa uban. Si apostol Pablo misulat: “Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo. . . . Busa, kon kamo magakaon o magainom o magabuhat sa bisan unsa, himoa ang tanang butang alang sa kahimayaan sa Diyos. Likayi nga mahimong hinungdan sa pagkapandol sa mga Hudiyo ingon man sa mga Grego ug sa kongregasyon sa Diyos.” (1 Corinto 10:24-33) Si Pablo wala mag-ingon nga isalikway na lang nato ang tanan natong gusto, apan siya nag-awhag nga dili kita magbuhat ug bisan unsa nga magtukmod sa laing tawo sa pagbuhat ug butang nga gisulti kaniya sa iyang tanlag nga sayop.

13. Unsang pananglitan ang tingali magpakita kon kaha angay ba natong batasanon ang pagpadapat sa Kasulatanhong tambag?

¹³ Giuna ba nimo ang kaayohan sa ubang mga tawo kay sa imong gusto? Kitang tanan angay makakat-on sa pagbuhat niana. Dunay daghang paagi sa pagbuhat niana. Tagda ang pamesti ug pamostura isip pananglitan. Mga butang kini nga nalangkit ang personal nga gusto nga nahasulod sa Kasulatanhong kalagdaan sa pagkamakasaranganon, kahapsay, ug kahinlo. Apan kon imong mahibaw-an nga, tungod sa kagikan sa mga tawo sa imong komunidad, ang imong paagi sa pamesti o pamostura makapugong sa uban sa pagpamati sa mensahe sa Gingharian, maghimo ka bag mga pagpasibo? Siyempre, ang pagtabang sa laing tawo nga makabaton ug kinabuhing dayon mas hinungdanon kay sa pagpahimuot sa kaugalingon.

14. Nganong hinungdanon nga ugmaron ang pagkamapainubsanon ug kabalaka alang sa uban?

¹⁴ Sa pagpaubos ug pagpakitag kabalaka sa uban, si Jesus nagpakitag panig-ingnan, nga naghugas pa gani sa mga tiil sa iyang mga tinun-an. (Juan 13:12-15) Bahin kaniya, ang Pulong sa Diyos nag-ingon: “Hupti kini nga tinamdan sa pangisip diha kaninyo nga diha usab kang Kristo Jesus, kinsa, bisan tuod siya naglungtad diha sa dagway sa Diyos, wala maghunahuna sa pagpangilog, nga mao, nga siya mahimong katumbas sa Diyos. Wala, apan iyang gihaw-asan ang iyang kaugalingon ug gihuptan ang dagway sa usa ka ulipon ug nahisama sa mga tawo. Labaw pa niana, sa dihang iyang nakaplagan ang iyang kaugalingon nga diha sa dagway sa usa ka tawo, siya nagpaubos ug nagmasinugtanon hangtod sa kamatayon.”​—Filipos 2:5-8; Roma 15:​2, 3.

Ayaw Isalikway ang Disiplina ni Jehova

15. (a) Unsang mga kausaban ang angay natong himoon aron mabatonan ang personalidad nga makapahimuot sa Diyos? (b) Pinaagi sa unsa nga gitagana ni Jehova ang tambag ug disiplina alang kanatong tanan?

¹⁵ Tungod kay kitang tanan makasasala, ang mga kausaban sa atong tinamdan ug pamatasan maoy gikinahanglan kon buot natong ibanaag ang personalidad sa atong Diyos. Angay natong isul-ob ‘ang bag-ong personalidad.’ (Colosas 3:5-14) Ang tambag ug disiplina motabang nato sa pag-ila sa mga kahimtang nga ang pagpasibo gikinahanglan ug dayon sa pagsusi kon unsaon nato paghimo kini. Ang paninugdang tinubdan sa instruksiyon nga atong gikinahanglan mao ang Bibliya mismo. (2 Timoteo 3:​16, 17) Ang mga literatura sa Bibliya ug mga tigom nga gitagana sa organisasyon ni Jehova motabang nato sa pagpadapat sa Pulong sa Diyos. Bisan pag nadunggan na nato ang maong tambag, ilhon ba nato nga kita nagkinahanglan niana ug maningkamot nga mouswag?

16. Unsang tabang ang gitagana ni Jehova alang kanato ingong mga indibiduwal?

¹⁶ Uban ang mahigugmaong kabalaka, si Jehova motabang nato sa atong mga suliran. Milyonmilyon ang natabangan pinaagi sa mga pagtuon sa Bibliya sa balay. Ang mga ginikanan motambag ug modisiplina sa ilang mga anak aron panalipdan sila batok sa panggawi nga magpahinabog kaguol. (Proverbio 6:20-23) Sulod sa kongregasyon, sagad nga ang uban mangayog tambag ug mga sugyot sa eksperyensiyadong mga ministro aron mouswag ang ilang mga paningkamot diha sa kalihokan sa kanataran. Usahay, ang mga ansiyano mangayog tambag sa usag usa o gikan sa ubang mga eksperyensiyado diha sa ministeryo. Kadtong may espirituwal nga mga kuwalipikasyon mogamit sa Bibliya aron sa pagtabang niadtong nagkinahanglan niana, nga magabuhat niana sa espiritu sa kalumo. Kon ikaw motambag, hinumdomi nga ‘magbantay sa imong kaugalingon, basin unya ug ikaw usab matental.’ (Galacia 6:​1, 2) Oo, kitang tanan nagkinahanglag tambag ug disiplina sa pagsimba sa bugtong matuod nga Diyos sa panaghiusa.

Repasong Panaghisgot

• Sa unsang paagi si Jehova mahigugmaong motabang nato sa pagsusi kon diin kita sa personal kinahanglang mohimog mga pagpasibo?

• Nganong daghan ang malisdan sa pagdawat sa gikinahanglang tambag, ug unsa ka seryoso kini?

• Unsang bililhong mga hiyas ang motabang nato aron magmadinawaton sa tambag, ug sa unsang paagi si Jesus nagpakitag panig-ingnan bahin niini?

[Hulagway sa panid 142]

Gisalikway ni Uzzias ang tambag ug siya gisanla

[Hulagway sa panid 142]

Si Moises nakabatog kaayohan pinaagi sa pagdawat ug tambag gikan ni Jetro