Nganong Angay Kitang Motahod sa Awtoridad?

1, 2. (a) Nganong malisdan man kitang motahod sa awtoridad? (b) Unsang mga pangutana ang atong hisgotan?

NAKAKITA ka bag bata nga nag-usdak-usdak sa iyang mga tiil kay dili gustong motuman sa gisugo kaniya? Madayag sa nagkulismaot niyang nawong ang iyang kalagot. Nadungog niya ang tingog sa iyang ginikanan, ug nahibalo siya nga kinahanglan siyang motahod sa awtoridad sa iyang ginikanan. Apan niining higayona, dili siya gustong mosugot. Ang kontra-gusto nga pagsugot sa bata nagpakita nga kitang tanan mobati usab usahay niini.

² Dili kanunayng sayon ang pagtahod sa awtoridad. Ikaw ba nalisdan usahay sa pagtahod niadtong may awtoridad? Kon mao, wala ka mag-inusara. Nagkinabuhi kita sa panahong maorag maihap na lang sa tudlo ang nagtahod sa awtoridad. Apan ang Bibliya nag-ingon nga kinahanglan kitang motahod niadtong may awtoridad. (Proverbio 24:21) Gani, hinungdanong kita motahod kon gusto natong magpabilin sa gugma sa Diyos. Motungha hinuon ang mga pangutana. Nganong malisdan man kitang motahod sa awtoridad? Nganong gisugo kita ni Jehova niana, ug unsay makatabang aron atong matuman kana? Ug sa unsang mga paagi ikapakita nato ang pagtahod sa awtoridad?

KON NGANONG LISOD ANG PAGTAHOD SA AWTORIDAD

3, 4. Sa unsang paagi nagsugod ang sala ug pagkadili-hingpit, ug nganong lisod ang pagtahod sa awtoridad tungod sa atong pagkadili-hingpit?

³ Atong hisgotan kadiyot ang duha ka hinungdan nga malisdan kitang motahod niadtong may awtoridad. Una, dili kita hingpit; ikaduha, kadtong may awtoridad dili usab hingpit. Ang sala ug pagkadili-hingpit sa tawo dugay na kanhi nagsugod, didto pa sa tanaman sa Eden dihang si Adan ug Eva mirebelde sa awtoridad sa Diyos. Busa ang sala nagsugod tungod sa pagrebelde. Bisan karon, may kinaiyanhon kitang hilig sa pagrebelde.​—Genesis 2:15-17; 3:1-7; Salmo 51:5; Roma 5:12.

⁴ Tungod sa atong pagkamakasasala, dali kitang mahimong magarbohon ug mapahitas-on, samtang ang pagkamapainubsanon maoy talagsaon ug kinahanglan natong paningkamotang maugmad ug padayong mahuptan. Bisan pag nag-alagad kitang matinumanon sa Diyos sa daghang katuigan, mosugmat ang atong katig-a ug garbo. Tagda pananglitan si Kore, nga miunong sa katawhan ni Jehova latas sa daghang kalisdanan. Apan nangandoy gihapon siyag mas dakong awtoridad ug mapangahasong nangulo sa pagrebelde batok kang Moises, nga niadtong panahona mao ang labing maaghop nga tawo. (Numeros 12:3; 16:1-3) Hinumdomi usab si Haring Uzzias, nga magarbohong misulod sa templo ni Jehova ug nagsunog ug insenso nga katungdanan lamang sa mga saserdote. (2 Cronicas 26:16-21) Sila nakaagom ug grabe kaayong mga silot tungod sa ilang pagrebelde. Apan, ang ilang daotang mga panig-ingnan maoy mapuslanong pahinumdom natong tanan. Kinahanglan natong pukgoon ang garbo aron dili kita malisdan sa pagtahod sa awtoridad.

5. Sa unsang paagi ang dili-hingpit nga mga tawo nag-abuso sa ilang awtoridad?

⁵ Sa laing bahin, ang dili-hingpit nga mga tawong anaa sa katungdanan daghag gibuhat nga nakapahuyang pag-ayo sa pagtahod sa katawhan sa awtoridad. Daghan ang nagmapintason, abusado, o malupigon. Gani, daghang pag-abuso sa gahom ang natala sa tawhanong kasaysayan. (Ecclesiastes 8:9) Pananglitan, si Saul buotan ug mapainubsanong tawo sa gipili siya ni Jehova nga mahimong hari. Apan siya nahimong magarbohon ug masinahon mao nga iyang gilutos ang maunongong si David. (1 Samuel 9:20, 21; 10:20-22; 18:7-11) Si David sa ulahi nahimong usa sa kinamaayohang mga hari sa Israel, apan miabuso sa iyang gahom sa dihang iyang giilog ang asawa ni Urias nga Hitihanon ug ang inosenteng tawo gipabutang niya sa unahan sa panggubatan aron seguradong mamatay. (2 Samuel 11:1-17) Oo, tungod sa pagkadili-hingpit ang mga tawo malisdan sa paggamit sa ilang gahom sa hustong paagi. Ug kon kadtong anaa sa katungdanan dili motahod kang Jehova, sila mas abusado pa. Human isaysay kon giunsa pagsugod sa pipila ka Katolikong papa ang kaylap nga pagpanglutos, usa ka Britanikong estadista misulat nga ang gahom lagmit makadaot, ug ang bug-os nga gahom makadaot sa bug-os. Samtang naghinumdom sa nangaging pag-abuso sa gahom, hisgotan nato ang pangutana: Nganong angay kitang motahod sa awtoridad?

NGANONG ANGAY KITANG MOTAHOD SA AWTORIDAD?

6, 7. (a) Unsay atong buhaton tungod sa atong gugma alang kang Jehova, ug ngano man? (b) Unsay nalangkit sa pagpasakop, ug sa unsang paagi atong mapasundayag kana?

⁶ Ang maayo kaayong mga katarongan sa pagtahod sa awtoridad gipasukad sa gugma​—atong gugma alang kang Jehova, sa isigkatawo, ug bisan sa atong kaugalingon. Kay atong gihigugma si Jehova labaw sa tanan, buot natong lipayon ang iyang kasingkasing. (Proverbio 27:11; Marcos 12:29, 30) Nahibalo kita nga ang iyang pagkasoberano, ang iyang katungod sa pagmando sa uniberso, giduhaduhaan sa yuta sukad sa pagrebelde sa Eden ug ang kadaghanang tawo midapig kang Satanas ug nagsalikway sa pagmando ni Jehova. Apan malipay kitang mopaluyo sa pagkasoberano ni Jehova. Inigbasa nato sa mapasidunggon nga mga pulong sa Pinadayag 4:11, matukbil ang atong kasingkasing. Tin-aw kaayo kanato nga si Jehova mao ang may-katungod nga Magmamando sa uniberso! Kita nagpaluyo sa pagkasoberano ni Jehova, nga nagdawat sa iyang mga balaod ingong giya sa atong adlaw-adlaw nga pagkinabuhi.

⁷ Dili lang pagkamasinugtanon ang nalangkit sa maong pagtahod. Dali kitang mosugot kang Jehova kay ato man siyang gihigugma. Apan aduna unyay mga higayon nga malisdan kaayo kitang mosugot. Sa maong mga higayon, angay kitang makakat-on sa pagpasakop sama sa bata nga gihisgotan sa sinugdan. Makahinumdom kita nga si Jesus nagpasakop sa kabubut-on sa iyang Amahan bisan pag kadto lisod kaayo. “Matuman unta dili ang akong kabubut-on, kondili ang imoha,” siya miingon sa iyang Amahan.​—Lucas 22:42.

8. (a) Unsay kasagarang nalangkit sa pagpasakop sa awtoridad ni Jehova, ug unsay pagbati ni Jehova bahin niini? (b) Unsay makatabang kanato sa pagpamati sa tambag ug pagdawat sa disiplina? (Tan-awa ang kahon nga “Patalinghog sa Tambag ug Dawata ang Disiplina.”)

⁸ Hinuon, si Jehova dili makig-estorya sa tagsatagsa kanato karon; iyang gigamit ang iyang Pulong ug ang mga tawo nga naghawas kaniya dinhi sa yuta. Busa kasagarang ipasundayag nato ang atong pagpasakop sa awtoridad ni Jehova pinaagi sa pagtahod sa mga tawo nga iyang gihatagag katungdanan ibabaw kanato o gitugotang magpadayon sa paghupot niana. Kon morebelde kita kanila​—pananglit kon dili nato dawaton ang ilang Kasulatanhong tambag ug pagtul-id—​ang Diyos masuko kanato. Sa dihang nagbagulbol ug mirebelde ang mga Israelinhon batok kang Moises, giisip kadto ni Jehova ingong pagrebelde batok kaniya.​—Numeros 14:26, 27.

9. Nganong madasig kita sa pagtahod sa awtoridad tungod sa atong gugma sa isigkatawo? Iilustrar.

⁹ Magpakita usab kitag pagtahod sa awtoridad tungod sa atong gugma alang sa isigkatawo. Nganong tinuod kana? Buweno, handurawa nga ikaw usa ka sundalo. Ang kalamposan ug kaluwasan mismo sa usa ka tropa lagmit nagdepende sa kooperasyon, kamasinugtanon, ug pagtahod sa matag sundalo sa usang labaw kaniya. Kon dili ka magpasakop sa maong awtoridad, mameligro ang tanang nimong isigkasundalo. Tinuod, ang tawhanong mga kasundalohan nakahimog dakong kadaot sa kalibotan karon. Apan si Jehova may kasundalohan nga kaayohan lamang ang ginahimo alang sa katawhan. Ginatos ka beses nga gitumong diha sa Bibliya ang Diyos ingong “Jehova sa mga panon [sa kasundalohan].” (1 Samuel 1:3) Siya ang Komandante sa daghan kaayong gamhanan nga espiritung mga linalang. Usahay, si Jehova nagtandi sa iyang yutan-ong mga alagad ngadto sa kasundalohan. (Ezequiel 37:1-10) Kon kita morebelde batok sa mga tawo nga gihatagag awtoridad ni Jehova ibabaw kanato, dili ba ipameligro nato ang atong espirituwal nga isigkasundalo? Kon morebelde ang usa ka Kristohanon sa tinudlong mga ansiyano, ang uban sa kongregasyon maapektohan usab. (1 Corinto 12:14, 25, 26) Kon morebelde ang usa ka bata, ang tibuok pamilya mahimong mag-antos. Busa magpakita kitag gugma alang sa atong isigkatawo pinaagi sa pag-ugmad sa pagkamatinahoron ug pagpakigtambayayong.

10, 11. Sa unsang paagi ang atong tinguha nga makabatog kaayohan modasig kanato nga magmasinugtanon sa awtoridad?

¹⁰ Motahod usab kita sa awtoridad tungod kay alang kini sa atong kaayohan. Sa dihang sugoon kita ni Jehova sa pagtahod sa awtoridad, subsob niyang hisgotan ang mga kaayohan nga moresulta sa atong pagtuman. Pananglitan, iyang gisugo ang mga anak sa pagsugot sa ilang mga ginikanan aron ilang mapahimuslan ang hataas ug malipayong kinabuhi. (Deuteronomio 5:16; Efeso 6:2, 3) Iya kitang gisugo sa pagtahod sa mga ansiyano sa kongregasyon kay ang dili pagtahod kanila makadaot sa atong relasyon sa Diyos. (Hebreohanon 13:7, 17) Ug iya kitang gisugo sa pagtahod sa sekular nga mga awtoridad aron mapanalipdan kita.​—Roma 13:4.

¹¹ Dili ka ba mouyon nga ang pagkasayod kon nganong buot ni Jehova nga kita magmasinugtanon makatabang kanato aron motahod sa awtoridad? Busa, atong hisgotan kon sa unsang paagi ikapakita nato ang pagtahod sa awtoridad diha sa tulo ka natad sa kinabuhi.

PAGTAHOD DIHA SA PAMILYA

12. Unsang papel ang gihatag ni Jehova sa bana ug amahan diha sa pamilya, ug sa unsang paagi iyang matuman kana?

¹² Si Jehova mismo ang nagmugna sa kahikayan sa pamilya. Kay siya sa kanunay maoy Diyos sa kahusay, iyang giorganisar ang pamilya aron kini magmalamposon. (1 Corinto 14:33) Iyang gihatagag awtoridad ang bana ug amahan ingong ulo sa pamilya. Ang bana motahod sa iyang Ulo, si Kristo Jesus, pinaagi sa pagsundog sa iyang paagi sa pagpanguna sa kongregasyon. (Efeso 5:23) Busa, abagahon gayod sa bana ang iyang responsabilidad sa mahigugmaon, makataronganon, ug malulotong paagi, dili sa malupigon o mapintasong paagi. Hinumdoman niya kanunay nga ang iyang awtoridad dili gayod bug-os apan kini ubos sa awtoridad ni Jehova.

13. Sa unsang paagi ang asawa ug inahan makatuman sa iyang papel diha sa pamilya sa paaging makapahimuot kang Jehova?

¹³ Ang asawa ug inahan maoy katabang o katimbang sa iyang bana. May awtoridad usab siya diha sa pamilya, kay ang Bibliya naghisgot bahin sa “balaod sa imong inahan.” (Proverbio 1:8) Hinuon, ubos ang iyang awtoridad kay nianang sa iyang bana. Ang Kristohanong asawa magpakitag pagtahod sa awtoridad sa iyang bana pinaagi sa pagtabang kaniya nga matuman ang iyang pagkaulo sa pamilya. Dili siya motamay ug magmaniobra kaniya, o moilog sa iyang katungdanan. Siya mopaluyo ug makigtambayayong hinuon kaniya. Kon dili siya moangay sa mga desisyon sa iyang bana, mahimong isulti niya nga matinahoron ang iyang opinyon, apan siya mapinasakopon gihapon. Kon ang iyang bana dili magtutuo, lagmit makaatubang siyag lisod nga mga situwasyon, apan ang iyang mapinasakopong panggawi mahimong magdasig sa iyang bana sa pagpangita kang Jehova.​—1 Pedro 3:1.

14. Sa unsang paagi makapalipay ang mga anak sa ilang mga ginikanan ug kang Jehova?

¹⁴ Malipay si Jehova kon ang mga anak mosugot sa ilang mga ginikanan. Makapasidungog ug makapalipay usab sila sa ilang mga ginikanan. (Proverbio 10:1) Sa mga pamilya nga usa rag ginikanan, ang mga anak makapadapat sa samang prinsipyo sa pagkamasinugtanon, kay nahibalo nga ang ilang ginikanan mas nanginahanglan sa ilang pagpaluyo ug kooperasyon. Diha sa mga pamilya nga ang tanang membro nagtuman sa ilang hinatag-Diyos nga mga papel, ang dakong kalinaw ug kalipay moresulta. Kini makahatag ug kadungganan sa Tagmugna sa tanang pamilya, si Jehova nga Diyos.​—Efeso 3:14, 15.

PAGTAHOD DIHA SA KONGREGASYON

15. (a) Sa unsang paagi ikapakita nato nga atong gitahod ang awtoridad ni Jehova diha sa kongregasyon? (b) Unsang mga prinsipyo ang makatabang kanato nga magmasinugtanon sa mga nagapanguna? (Tan-awa ang kahon nga “Magmasinugtanon Kamo sa mga Nagapanguna Kaninyo.”)

¹⁵ Gitudlo ni Jehova ang iyang Anak ingong Magmamando sa Kristohanong kongregasyon. (Colosas 1:13) Unya gitahasan ni Jesus ang iyang “matinumanon ug maalamong ulipon” sa pagtagana sa espirituwal nga mga panginahanglan sa katawhan sa Diyos dinhi sa yuta. (Mateo 24:45-47) Ang Nagamandong Lawas sa mga Saksi ni Jehova maoy naghawas sa maong ulipon nga matang. Sama sa Kristohanong mga kongregasyon sa unang siglo, ang mga ansiyano karon nagdawat ug mga instruksiyon gikan sa Nagamandong Lawas, mahimong sa direkta o pinaagi sa mga hawas niini, sama sa nagapanawng mga magtatan-aw. Kon ang matag usa kanato nagtahod sa awtoridad sa Kristohanong mga ansiyano, kita nagmasinugtanon kang Jehova.​—Hebreohanon 13:17.

16. Sa unsang diwa ang mga ansiyano gitudlo sa balaang espiritu?

¹⁶ Ang mga ansiyano ug ministeryal nga mga alagad dili hingpit. Sila may mga kahuyangan, sama ra kanato. Bisan pa niana, ang mga ansiyano maoy “gasa nga mga lalaki,” nga gitagana aron matabangan ang kongregasyon nga magpabiling lig-on sa espirituwal. (Efeso 4:8) Sila gitudlo sa balaang espiritu. (Buhat 20:28) Sa unsang paagi? Sa pagkaagi nga kinahanglan silang makakab-ot una sa mga kuwalipikasyon nga natala diha sa inspirado-sa-espiritu nga Pulong sa Diyos. (1 Timoteo 3:1-7, 12; Tito 1:5-9) Dugang pa, ang mga ansiyano nga nagtimbangtimbang kon kuwalipikado ba ang usa ka igsoong lalaki tim-os nga nag-ampo alang sa giya sa balaang espiritu ni Jehova.

17. Sa ilang kalihokan sa kongregasyon, nganong magpandong man usahay ang Kristohanong mga babaye?

¹⁷ May mga higayon tingali diha sa kongregasyon nga walay ansiyano ug ministeryal nga alagad nga makahimo sa usa ka buluhaton nga kasagarang itudlo kanila, sama sa pagdumala sa tigom sa dayon nang pagsangyaw sa kanataran. Nianang mga higayona, kana madumala sa laing bawtismadong mga lalaki. Kon walay bawtismadong lalaki, nan kana madumala sa kuwalipikado nga Kristohanong mga babaye. Apan, kon babaye ang modumala sa usa ka buluhaton nga kasagarang dumalahon sa lalaki, kinahanglan siyang magpandong.a (1 Corinto 11:3-10) Kini nga kinahanglanon wala magpaubos sa mga babaye. Hinunoa, naghatag kinig kahigayonan aron ipasundayag ang pagtahod sa kahikayan ni Jehova bahin sa pagkaulo, diha sa pamilya ug sa kongregasyon.

PAGTAHOD SA SEKULAR NGA AWTORIDAD

18, 19. (a) Sa unsang paagi imong ikapatin-aw ang mga prinsipyo nga gipahayag sa Roma 13:1-7? (b) Sa unsang paagi atong gipakita ang pagtahod sa sekular nga mga awtoridad?

¹⁸ Ang matuod nga mga Kristohanon matinumanong nagsunod sa mga prinsipyo nga natala sa Roma 13:1-7. Samtang imo kanang basahon, imong masabtan nga ang “labaw nga mga awtoridad” nga gihisgotan dinha mao ang mga gobyerno sa kalibotan. Samtang gitugotan pa ni Jehova nga maglungtad kining mga gobyernoha, sila adunay hinungdanong mga buluhaton, sama sa pagpatunhay sa kalinaw ug pagtaganag kinahanglanong mga serbisyo. Kita nagtahod sa maong mga awtoridad pinaagi sa atong pagsugot sa mga balaod. Ato gayong bayran ang atong mga buhis, tukmang pil-apan ang bisan unsang mga dokumento nga gikinahanglan sa gobyerno, ug sundon ang mga balaod nga mapadapat kanato, sa atong pamilya, negosyo, o mga kabtangan. Apan, dili kita magpasakop sa gobyerno kon ila kitang mandoan nga dili sugton ang Diyos. Hinunoa, ang atong tubag sama sa iya sa mga apostoles kanhi: “Kinahanglang among sugton ang Diyos ingong magmamando inay ang mga tawo.”​—Buhat 5:28, 29; tan-awa ang kahon nga “Kansang Awtoridad ang Angay Kong Sugton?”

¹⁹ Ipakita usab nato ang atong pagtahod sa sekular nga mga awtoridad pinaagi sa atong panggawi. May mga higayon nga kita direktang makiglabot sa mga opisyales sa gobyerno. Si apostol Pablo nakiglabot kang Haring Herodes Agripa ug Gobernador Festo. Salawayon kaayo kining mga tawhana, apan matinahoron kaayong nakigsulti si Pablo kanila. (Buhat 26:2, 25) Sundogon nato ang panig-ingnan ni Pablo, nakigsulti man kita sa usa ka dakog-ranggo nga opisyal o ordinaryong polis. Sa tunghaan, ang Kristohanong mga bata maningkamot nga magpakitag susamang pagtahod sa ilang mga magtutudlo ug sa mga opisyales ug empleyado sa tunghaan. Hinuon, dili lang kita motahod sa mga tawong mouyon sa atong mga pagtuo; matinahoron usab kita sa dihang makiglabot sa mga magsusupak sa mga Saksi ni Jehova. Sa pagkatinuod, angayng mamatikdan sa mga dili magtutuo nga kita matinahoron.​—Roma 12:17, 18; 1 Pedro 3:15.

20, 21. Unsay pipila ka kaayohan gumikan sa pagpakitag nahiangayng pagtahod sa awtoridad?

²⁰ Dili kita angayng mag-ukon-ukon sa pagpakitag pagtahod. Si apostol Pedro misulat: “Pasidunggi ang tanang matang sa mga tawo.” (1 Pedro 2:17) Kon mamatikdan sa mga tawo nga kita tinuod nga matinahoron kanila, lagmit makadayeg gayod sila. Hinumdomi, talagsaon kaayo kining hiyasa karon. Busa, ang pagpasundayag niini maoy usa ka paagi sa pagtuman sa sugo ni Jesus: “Palamdaga ang inyong kahayag atubangan sa mga tawo, aron ilang makita ang inyong maayong mga buhat ug maghimaya sa inyong Amahan nga anaa sa mga langit.”​—Mateo 5:16.

²¹ Niining mangiob nga kalibotan, ang matarong-ug-kasingkasing nga mga tawo nadani sa espirituwal nga kahayag. Busa ang atong pagpakitag pagtahod diha sa pamilya, sa kongregasyon, ug sa sekular nga mga awtoridad mahimong makadanig pipila ka tawo ug magdasig kanila sa paglakaw diha sa kahayag uban kanato. Pagkamaayong palaaboton! Apan, bisan pag dili kana mahitabo, segurado ang usa ka butang. Ang atong pagtahod sa mga tawo makapalipay kang Jehova nga Diyos ug makatabang kanato sa pagpabilin diha sa iyang gugma. May ganti ba nga molabaw pa niana?